AMOSI
Amosi e porofete gie‐ticne i jara 784–746 B. C. dameŋ ŋondeŋ ira bahuc juwec. I Usijazi Judaŋic jaŋere ŋicwofuŋ juha, â Jeroboam II eki Israe ŋicguru jaŋere ŋicwofuŋ juhame bawec hâcne. Amosi e juwicnao porofete gie fuŋkerâ mi bawecko lama soŋaŋ juhuc nemuja â jâmbojâc sasara gie bajujec. E porofete mocte motec me wosâekicne mâcne, lama soŋaŋ hâcne juhame Anutu e jahac porofete gie‐ticnere baʒawiewec. Ehuc guŋqâhâŋ bocjaha ecnehuc hawari wiac fuŋne fuŋne âzâcne jâutuc ewec. E iŋuc ecnehuc Amosi maŋne baafeckeme gie‐ticne Wofuŋte micte fuŋkerâ bawec. Erâ e porofete jaŋe jaŋac porofete â findaŋdâŋ‐jeŋic qâreŋkembiŋ irec fufuŋke ŋic hâcne.
Porofete gie‐ticne i Samaria hae qizecko fuŋkerâ bawec mecne. Ehuc Israe ŋic jaŋe uŋ sawaŋ ejarehuc juwec. Israe ŋic jaŋe dameŋ ira ʒika qahuc mâreŋ gâcne ro rauc erâ sindaŋ fuŋne fuŋne ehuc moneŋ mafa bocjaha hurehuc jumbiŋ. Ehame mafa wiac ɋâfoŋne fojare‐bipieha hapetac â qarâ suriŋnefâc‐jeŋic hone takirec‐jopahuc hone bafic moc mi ejarembiŋ. Jaŋe hobu â sahac‐jeŋicte sawa manasuhuc Wofuŋte taha bâzi ririke â hae mâreŋ furu mukicne ira rara i sahaczia sawa ejumbieŋ, maŋjeŋic ine Wofuŋte mocwâc mi râepie domawec. Irec Wofuŋ e jahac taha bâzi ririke hae â alata wiac‐jeŋic i ima baocte manasuhuc porofete dâŋ âzâcnewec, erâ Israe ŋic ŋokac irec uŋ sawaŋ ejareocte soreme rawec.
Erâ e Samaria haeo sawa mâcne, Bete haeo gie‐ticne mâmâc bawec. Bahuc juhame taha bapa sâkozi mana gâpârecnehuc Israe mâreŋkonec jâpeme e jahacne hae mâreŋko risiewec. Bete hae i Israe ŋicwofuŋte furu hae, ɋâŋufuŋ‐ticne i hae ira hâcne ŋewec.
Amosi papia‐ticne bâfâuckepene dâkâne jahec â moc fuakac.
Dâkâne 1, gaŋ 1—2. Irec maŋnao dâŋ kecʒiŋuc forakac: Ŋic gurune gurune Anuturaonec okacne fua‐jareocmu irec findaŋdâŋ, â Juda â Israe ŋic jaŋere uŋsawaŋ dâŋ.
Dâkâne 2, gaŋ 3—6. Ira ine Israe ŋic fuŋne weniŋucte Anuturaonec okacne fisi‐jareocmu irec dâŋsâko jahec â moc fokac.
Dâkâne 3, gaŋ 7—9. Irec maŋnao ine Amosizi hawari wiac 5 fuapie honec‐jopawec irec dâŋ fokac.
Hawari 1. Hâpic hâhâwicne fuaocmu.
Hawari 2. Ʒocsâkozi fuarâ ʒacjopa‐fâreocmu.
Hawari 3. Wofuŋte maŋuruczi taraocmu irec sâsâc.
Hawari 4. Sasac jâchândâŋ qeucnehec i Israe ŋicguru dameŋ‐jeŋic maickeocmu irec sâsâc.
Hawari 5. Taha ufuŋ‐jeŋic tâtieocmu irec sâsâc. Moczi okac dameŋ sâcne moc mi wisecneocmu.
Papia tataranao ine Mesia fufuare findaŋdâŋ moc fokac. Amosi papia‐ticnere dâŋqizecne moc kecʒiŋuc fuame honeŋgopeneŋ: Anutu râpeckehuc râsi ecneeŋgopieŋ me dâŋticne qataraeŋgopieŋ ŋic i jaŋe okac dameŋko bâsirowec‐jopa‐fâreocmu.
1
Ŋicguru gâcne okacne fisi‐jareocte mukicne
1 Tekoa haeonec lama soŋaŋ jumbiŋ jaŋeraonec ŋic moc ʒâŋene Amosi ere dâŋ ʒiŋe hâcne. E maŋʒâŋene tâcneme Israe ŋic jaŋerao wiac fuaocmu i honewec. Eme jufehapie jara 2 tarame homeŋ sâko bawec. Ine Uʒijazi Judaŋic jaŋere ŋicwofuŋ juwec, â Jeroboam, Jehoasire ŋokâ hâcne, eki Israere ŋicwofuŋ juwec dameŋ ira wiac i honewec. 2 Ehuc kecʒiŋuc muwec:
“Wofuŋ owa‐ticnere fânâŋ Zioŋkonec warekac,
â Jerusalem haeonec marac fânâŋ‐ticne fisikac;
ehame lama jaŋere kecɋaŋzi ɋaŋa ururuc ekac,
â Karamele tiki botâŋnao jâc wiac sasawa
hâmo qanʒaraŋ efârekac.”
3 Wofuŋzi kecʒiŋuc mukac:
“Damasko hae rune jaŋe sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe aeŋ keretac sâqe micneheczi
Gileade mâreŋ rune sipiric‐jopambiŋte.
4 No irec hâcne ŋicwofuŋ Haʒaele fic hae‐ticne turuŋkepe ʒazejec,
ehuc ŋicwofuŋ Beŋhada ere ficsanaŋ wiac ʒâseŋkezejec.
5 No Damasko haere motâc babasanaŋ qazupemu,
ehuc Aweŋ wâneŋte ŋecjucfâcne qâmiziec‐jopapemu,
erâ Bete‐Edeŋkonec ŋicwofuŋ gunu bajuekac
e iŋuc jaha qape omaeocmu.
Ehame Siria mâreŋ rune jaŋe
Kiri* Kiri i Siria mâreŋte dâkâne moc. mâreŋko kâpâcwâru ficko raniŋmu.”
Wofuŋte dâŋ iŋuc.
6 Wofuŋzi kecʒiŋuc mukac:
“Gaza hae rune jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe ŋic ŋokac naru motec furu jaha
Edomŋic jaŋere meo râec‐jopambiŋte
kiŋaŋ qaqafâc‐jeŋic bacjopa jumbiŋ hâcne.
7 Eme no irec hâcne Gaza haere sac turuŋkepe
ʒahuc ficsanaŋ‐ticne ŋerakac i ʒâseŋkezejec.
8 Erâ no Asidode ŋecjucfâc‐ticne jaŋe mecne,
â Asikaloŋ haere ŋicwofuŋ gunu bajuekac
e mâmâc bâsirowec‐jopapemu.
No Ekoroŋ ŋic râsi ejarepemu,
ehame Filisa ŋic nâfocne juŋgopieŋ
jaŋe wâc siroweniŋmu.” Wofuŋ Anuture dâŋ iŋuc.
9 Wofuŋzi kecʒiŋuc mukac:
“Tiro hae rune jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe ŋic ŋokac naru motec furu jaha
Edomŋic jaŋere meo râec‐jopahuc,
âgo ʒâʒâfic‐jeŋic fowec irec mi manasumbiŋ.
10 No irec hâcne Tiro haere sac turuŋkepe
ʒahuc ficsanaŋ‐ticne ŋerakac i ʒâseŋkezejec.”
11 Wofuŋzi kecʒiŋuc mukac:
“Edomŋic jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe qomâfâc‐jeŋic busâqoc moc mi mana‐jarehuc
ʒikazi jopa jâpec ejarembiŋ,
ehuc kimbeŋ aaric‐jeŋic sakarehuc raŋɋa raŋɋa bajumbiŋ.
12 No irec hâcne mupe ʒoczi Temaŋ mâreŋko fuarâ ʒazejec,
ehuc Bozera haere ficsanaŋ ʒâseŋke‐fârezejec.”
13 Wofuŋzi kecʒiŋuc mukac:
“Amoŋŋic jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe mâreŋ‐jeŋicte ma bâsokaniŋte
Gileade haeo ŋokac kiwechec jumbiŋ
jaŋe mi akic‐jopahuc bujeŋic hefâuckembiŋ.
14 No irec hâcne Raba haere sac turuŋkepe ʒazejec,
ehuc ficsanaŋ‐ticne i ʒika qahuc aŋara hehapie
ʒâʒâkiriŋ mâŋâŋzi tâpirihec ficneme ʒâseŋke‐fârezejec.
15 Ehame ŋicwofuŋ‐jeŋic e fekicnefâc‐ticne jaŋehec
mâmâc kâpâcwâru ficko bacjopa raniŋmu.”
Wofuŋtao dâŋ iŋuc.