2
1 Wofuŋzi kecʒiŋuc mukac:
“Moabi ŋic jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe Edom ŋicwofuŋ siec‐ticne ʒocko râepie
ʒahuc huc iŋucne duŋtowec.
2 No irec hâcne mupe Moabi mâreŋko ʒoc fuarâ ʒazejec,
ehuc Kerioti hae ficsanaŋ‐ticne ʒâseŋke‐fârezejec.
Ehame Moabi ŋic jaŋe qeŋ dâŋehame
ʒikare fânâŋ â micʒonʒoŋ irec maŋnao hâmonʒepieŋ.
3 Eme no ŋondeŋ‐jeŋicko guriŋ bapa ŋic jukac
e bâsirowehuc fekicnefâc‐jeŋic ehec mâmâc qâhâmoc‐jopapemu.”
Wofuŋte dâŋ iŋuc.
4 Wofuŋzi kecʒiŋuc mukac:
“Judaŋic jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe Wofuŋ nore sâcmutâc dâŋ qâsuahuc
dâŋsanaŋ‐nane mi reŋkembiŋ,
ehuc mamacfâc‐jeŋic jaŋe nemu wiac burecne bâjâpec‐jopahuc jumbiŋ
nemu izi hâcne eatuc‐jopapie qâsoriembiŋ.
5 No irec hâcne mupe Juda mâreŋko ʒoc fuarâ ʒazejec,
ehuc Jerusalem ficsanaŋ‐ticne ʒâseŋke‐fârezejec.”
Israe ŋic jaŋere okacdâŋ
6 Wofuŋzi kecʒiŋuc mukac:
“Israe ŋic jaŋe wiac sindaŋnezi sindaŋne bâfuambiŋte
no okacne bazu‐jarezo mupo, dâŋ i mi hetâtiepemu,
jaŋe ŋic tiŋne moneŋte erâ qikiŋ‐jopaeŋgopieŋ,
â ŋic tac qararacne kikehuhure erâ behec‐jopaeŋgopieŋ.
7 Jaŋe ŋic qarâ suriŋne ro waha âte ejareeŋgopieŋ,
ehuc qoro tutucnefâc‐jeŋic qaisoc‐jopaeŋgopieŋ,
ehame mame ŋokâ jaŋe naru ŋokac mocjaha erao rahuc
tiri ʒâŋe‐nane wâwânâŋ ecneeŋgopieŋ.
8 Jaŋe ŋaqi qoruc hotâ jowac rorâ bajuhuc
alata sasawa maŋfuŋ‐jeŋicko rumackerâ foeŋgopieŋ,
erâ ŋic gâcnezi kiŋ babatara moneŋ râepie
izi waiŋ opâ furine barâ Anutu‐jeŋicte ficko nâeŋgopieŋ.
9 “Noni hâcne bânie‐ŋarehuc Amori ŋic bâsirowec‐jopapo,
jaŋe jâmâzâc jâc iŋucne ŋic ʒoricne,
â sasanaŋ‐jeŋic i bonejâc irec sâc;
eme no sifu faic tieŋnao hândâŋne fuawec
â juwic gâtâne sicneme huwec
i mâmâc bâsirowe‐fârepo.
10 Erâ Amori ŋic jaŋere mâreŋ ro rauc eniŋte
nonizia wâc Aigita mâreŋkonec batarac‐ŋoparâ
mâreŋ sawao jowac‐ŋopa warehuc juhape
jara 40 tarawec.
11 Erâ nonizia ŋokâfâc‐ŋeŋic jaŋeraonec gâcne porofete juniŋte bâwosâec‐jopapo,
â ŋicmotecfâc‐ŋeŋic jaŋeraonec gâcne
Anutu nore biŋe jusanaŋkeniŋte bâtiric‐jopapo.
O Israe ŋicbureŋ, no iŋuc moc mi epo me?”
Wofuŋte dâŋ iŋuc.
12 “Ŋoŋe ine ŋic bâtiric‐jopakicne jaŋe waiŋ opâ gumec‐jopambiŋ,
ehuc porofete ʒiŋuc jazambiŋ,
‘Ŋoŋe findaŋdâŋ mi munʒepieŋ.’
13 “Manaŋgopieŋ, mâreŋ âteeŋgopieŋ
i noni mupe qiriŋ qaocmu,
ine keretaczi mafa sâko derâ
hewic qâwic ehuc raekac irec sâc.
14 Eme kike afec juekaczi wiserâ raocte sifu eipieocmu,
â sasanaŋheczi tâpiri basaocmu,
erâ momori ŋic e juju‐ticne sâcne mi ŋezickeocmu.
15 Tepeŋic e sanaŋkerâ sâcne mi domaocmu,
â kike afeczi sâcne mi wiseocmu,
erâ becâsicko rara ŋic e juju‐ticne sâcne mi ŋezickeocmu.
16 Ehame ŋic momori wânʒâŋ jaŋeraonec hâbihec juekaczi
ʒoaŋ ira ʒikare wiac‐ticne beherâ metariŋ wiseocmu.”
Wofuŋte dâŋ iŋuc.