DANIE
Daniere papia miŋecgac fonârekac i Danie e jahac mi qâreŋkewec. Danie e hâmome faicnao wiac gâcne gâcne fua rawec irec binaŋ i papia maŋnao mâmâc qâreŋkekicne fokac izi iŋuc hâcne mufua‐nârekac. Papia qâreŋkewec ŋic e Danie hone manac mi ehuc mâc gie â juju‐ticnere binaŋ manawecte papia i qâreŋkehuc ʒâŋene “Danie” muwec. Ŋic ʒâŋene Danie mukicne ere fuŋne ine ʒiŋuc manaŋgopeneŋ: E mârâc jaha juwec. Ehame Judaŋic Babiloŋ mâreŋko kâpâcwâruo bacjopa rakicne dameŋ ira Danie e mâmâc barambiŋ. Â Daniere papia fonârekac i ine ʒâhec jara 168–164 dameŋ ŋondeŋ ira mecne qâreŋkekicne. Dameŋ ira hâcne qâpuc ŋicwofuŋ moczi Judaŋic boc bâʒâic‐jopame ʒâra ʒâpâ faio jumbiŋte, Anutuzi bafic‐jopame juju biaŋ mocwâc fua‐jareocmu, qâreŋŋic e iŋuc muhuc hâbi â mamanac‐jeŋic basanaŋkewec.
Daniere papia bâfâuckepene dâkâne jajahec fuakac. Moc i gaŋ 1–6, â moc ine gaŋ 7–12. Dâkâne namba 1 irec maŋnao Danie juju‐ticnere binaŋ bahuc qâreŋkekicne, â dâkâne namba 2 ira ine juku wiac fuazokac irec dâŋ â hawari wiac fuŋne fuŋne Daniezi guŋqâhâŋko â maŋʒâŋe‐ticnezi hone manac ewec irec dâŋ â binaŋ sasawa qâreŋkekicne forakac.
Dâkâne 1: Danie juju‐ticnere dâŋ â binaŋ
Gaŋ 1. Danie â ŋicmotec âgofâcne 3 jaŋe Babiloŋ mâreŋko bacjopa rakicne, â ira mamana ficko râec‐jopapie mamana gie bahuc juku mamana â maŋfânâŋhec erâ jupie ŋicwofuŋte kiŋaŋ qaqa ŋic fekicne râec‐jopakicne.
Gaŋ 2. Ŋicwofuŋ Nebukaneza e guŋ hâhâwicne moc maname mamana ŋicfâc‐ticne jaŋe fuŋne kâuc bapie Daniezi guŋte fuŋne mutâc‐neme ŋicwofuŋzi kia sâko âkendâŋnewec.
Gaŋ 3. Ŋicwofuŋzi e jahacne ɋâŋ qâqâtâc sâko âkendâŋnerâ ŋic sasawazi araŋ bacneniŋte mume Danie â âgofâcne 3 jaŋe ine Wofuŋ Anutu mocjaha araŋ bacnehuc numucnezo, iŋuc muhuc qatarapie ŋicwofuŋzi maname gâpâreme mume ʒocko behec‐jopambiŋ. Eme Anutuzi ŋezic‐jopame ʒoczi sahac‐jeŋic moc mi sipirickewec.
Gaŋ 4. Ŋicwofuŋ Nebukaneza e guŋ mocwâc maname Daniezi fuŋne muwec.
Gaŋ 5. Ŋicwofuŋ Belesaza â fekicnefâc‐ticne jaŋe tiwâ bâzi sâko ehuc bâbâsifuc â sindaŋ epie sâpeo meqâreŋ furune moc fuame Daniezi fuŋne mufua‐jarewec. Eme dâŋ muwec i fârio qame ŋicwofuŋ okacne fisicnewec.
Gaŋ 6. Danie e gie‐ticne bame fârine biaŋne fuame ŋicwofuŋ Dariusizi kia jaŋere fekicne âkendâŋnewec. Eme irec liŋguuŋ ecnehuc qoqoric dâŋ bâfuahuc dâŋko râepie ŋicwofuŋzi mana gâpârecnehuc mume qowi mimicne jaŋere sapao behepie huwec. Wofuŋzi ine jaŋere mickonec batarame honerâ hâwic‐jopame fârepie wefuwec. Eme ŋicwofuŋ e uucmaŋ‐ticnao Danie ere Anutu sawa araŋ bacneniŋte mumutâc râeme hae sâc rafârewec.
Dâkane 2: Findaŋdâŋ â irec hawari 4
Gaŋ 7. Hawari namba 1. Daniezi guŋko qowi 4 â “Ŋic Fâri” honec‐jopawec. Qowi 4 i mâreŋ ŋicwofuŋ 4 jaŋere uucmaŋ irec sâsâc.
Gaŋ 8. Hawari namba 2. Ira Daniezi lama â noniŋ ŋicne ʒuŋe‐jekichec honec‐jofaha aŋelo micne Gabirie eki fuacnerâ fuŋne âzâcne mutâc ewec.
Gaŋ 9. Hawari namba 3. Danie e Jeremiare findaŋdâŋ mocte fuŋne kâuc bawecte Anutuzi mutâcnecneocte numucneme aŋelo Gabiriezi fuarâ mutâcnecnewec.
Gaŋ 10. Hawari namba 4. Ira ine kecʒiŋuc honewec: Israe ŋic jaŋe fific guguriŋ â ʒârâ ʒâpâ faio jufekupie Wofuŋ Anutuzi batarac‐jopame dameŋ biaŋ mocwâc fua‐jareocmu.
1
Danie â âgofâcne jaŋe mamana gie bambiŋ
Juda ŋicwofuŋ Jojakim e ŋicwofuŋ gie bahuc jume jara 3 eha Babe ŋicwofuŋ Nebukanezazi fisirâ Jerusalem hae somâckewec. Ehame Wofuŋ e Juda ŋicwofuŋ Jojakim â Anuture ufuŋkonec wiac gâcne i Babe ŋicwofuŋte meo râewec. Eme eki ine wiac i nemu‐ticnere ufuŋ Sina* I Babilonia mâreŋte mukicne. mâreŋko ŋewec ira barawec. Erâ nemu‐ticnere ficko moneŋ katapao râeme huwec. Erâ ŋicwofuŋzi moneŋ mafa soŋaŋ‐ticne Asipenaʒa e Israe ŋic rocjopahuc ŋicwofuŋ â fekicne jaŋere motecfâc gâcne bâwosâec‐jopaocte âzâcnewec. Ine motec kecʒiŋucne jaŋe hâcne: Motec ɋiɋicne, sahac hawari biaŋhec, mamanahec, maŋɋârâŋ â maŋfânâŋhec, erâ ŋicwofuŋte ficko kiŋaŋ gie aafec faio bapane. Motec iŋucne rocjoparâ Kaldea ŋic jaŋere qâreŋ hawari â dâŋ qazu‐jareniŋte mutâcnecnewec. Erâ ʒoaŋ sâc ŋicwofuŋzi nânâ â waiŋ opâ nâhuc juwec irec nâfocne jare gumec eniŋte mutâcnewec. Jaŋe wiac qazu‐jarekupie jara jahec â moc tarame ŋicwofuŋte kiŋaŋ gie fuŋkerâ baniŋte mukicne. Motec rocjopakicne jaŋere ŋondeŋko Juda motec ʒiŋuczi jumbiŋ: Danie, Hanania, Misae erâ Aʒaria. Eme kiŋaŋ qaqa jaŋere micnezi ʒâŋe ʒiŋuc jare rawec: Danie ere ʒâŋe Beletesaza, â Hananiare ʒâŋe ine Sadaraka, Misae ere ʒâŋe Mesaka â Aʒariare ʒâŋe Abenego, iŋuc mucjopawec.
Danie e ine ŋicwofuŋte nânâ â waiŋ opâ nâhuc maŋticne hegâpârezacte mi nâocte mupaŋkewec, irec nânâ wiac i mi nâzore nânâ soŋaŋ micnezi manacneocte numucnewec. Eme Anutuzi manaha nânâ soŋaŋ micnezi Daniere maname boc biaŋkeha mi qataracnewec. 10 Mâc ʒiŋuc sawa âzâcnewec: “No ŋicwofuŋ‐nanere hâwicnukac, eki hâcne nânâ opâ‐ŋeŋicte mumupaŋ râewec. E sahac‐ŋeŋiczi âgofâc‐ŋeŋic jaŋere sahac irec sâc mi eme honerâ mume juju‐nane omaeocmu.” 11 Iŋuc mume kiŋaŋŋic jaŋere micnezi Danie â Hanania â Misae erâ Aʒaria jaŋere soŋaŋ moc râewec e hâcne Daniezi dâŋ ʒiŋuc âzâcnewec: 12 “Go sifu esâickerâ kiŋaŋ qaqafâcge nâŋe ʒoaŋ gie bapa 10 irec sâc monʒaŋ â opâ sawa gumec‐nâponʒaŋ. 13 Eme dameŋ i tarame nâŋe mecne â ŋicwofuŋte nânâ nâeŋgopieŋ jaŋe mecne mâmâc sahac‐nâŋec gowatupene honezemec. Erâ honec‐nâpocmu irec sâcko wiac enârezemec.” 14 Eme soŋaŋ e dâŋjeŋic manarâ ʒoaŋ gie bapa 10 iŋuc ejarewec. 15 Ʒoaŋ gie bapa 10 tarame sahac hawari‐jeŋiczi motec gâcne ŋicwofuŋte nânâ nâmbiŋ jaŋere sahac sirickehuc biuc wokemaŋ sâkohec ewec. 16 Iŋuc fuame nânâ soŋaŋzi nânâ â waiŋ nâniŋte mujarekicne i bârâriehuc monʒaŋ sawa gumec‐jopawec.
17 Eme Anutu e ŋicmotec 4 jaŋe qâreŋ honehuc wiac fuŋne fuŋne mana taraniŋte mamana bâfua‐jarewec; Danie eki ine maŋko fuac dâŋ â guŋte fuŋne i mâmâc mana tarawec. 18 Eme motec sasawa jaŋe ŋicwofuŋte maio fuaniŋte mukicne dameŋ i maickeme kiŋaŋŋic jaŋere micne sâkozi ŋicwofuŋ Nebukanezare ficko jowac‐jopa fewec. 19 Eme ŋicwofuŋ e jaŋehec dâŋ muc manac embiŋ. Ehame motec sasawa jaŋere ŋondeŋko Danie â Hanania â Misae erâ Aʒaria jaŋe iŋucne moc mi bâfuac‐jopawec. Irec jaŋe hâcne ŋicwofuŋte motec fuŋfuŋfâcne juniŋte râec‐jopakicne. 20 Eme ŋicwofuŋ e wiac irec me irec mu indiŋ ejareme jaŋere mamana â maŋɋârâŋzi e jahacne mâreŋko qaŋgec bapa â mamana ŋic jumbiŋ jaŋere sâc jâuru‐fârewec. 21 Eme Danie e ira kiŋaŋ qaqa gie bahuc juhame ŋicwofuŋ Kiru ere dameŋ maickewec.

*1:2: I Babilonia mâreŋte mukicne.