2
Daniezi guŋte fuŋne muwec
Nebukaneza e ŋicwofuŋ gie‐ticne bahuc jume jara 2 eha guŋ moc manawec, ehuc maŋne gâckeme mana ɋâɋârerâ faharewec. Erâ guŋ manawec irec fuŋne qahuc âzâcneniŋte ŋicwofuŋzi fuŋne qaqa â ŋic maŋfânâŋhec â qaŋgec bapa erâ Kaldea ŋic jaŋe hefârec‐jopawec. Eme jaŋe fisirâ ŋicwofuŋte maio tumaŋnembiŋ. Tumaŋnepie ŋicwofuŋzi ʒiŋuc jazawec: “No guŋ manapac, ehuc fuŋne mana tarapemurâ eipiehuc maŋhâhâŋ enarekac.” Iŋuc mume Kaldea ŋic jaŋe ʒiŋuc âzâcnembiŋ: “O ŋicwofuŋ, go dameŋ tâmiric jufezemec! Go guŋ manamec i kiŋaŋŋicfâcge nâŋe nâzâtec irec fuŋne gaza mutâc enʒepeneŋ.” Iŋuc mupie ŋicwofuŋzi Kaldea ŋic dâŋ ʒiŋuc bâtikie‐jarewec: “No dâŋ ʒiŋuc mupaŋke‐jâmbâŋkekopac: Ŋoŋe guŋ wenimoi manapac i mufuahuc irec fuŋne naza mutâc mi eniŋmuo ine henʒaŋ qanʒaŋ‐ŋopahuc fic hae‐ŋeŋic imackepemu. Ŋifec ine guŋ manapac i â irec fuŋne mutaniŋke‐nareniŋmuo ine taha â bubiaŋte wiac ŋare tahac epe ʒâŋe biŋehec eniŋmu. Irec guŋ manapac â irec fuŋne i mâmâc naza mutâc eniŋ.” Eme jaŋe dâŋ ʒiŋuc bâtikiecnepie arecne jajahec ewec: “O ŋicwofuŋ, go guŋgere binaŋ banâretec fuŋne gaza mutâc enʒepeneŋ.” Eme ŋicwofuŋzi jazawec: “No mana‐jâmbâŋkekopac, ŋoŋe dâŋnanere manapie fârine eha dameŋ âke suepie fekac. Dâŋnane kecʒiŋucte manapie fârine ekac hâcne: Ŋoŋe guŋte fuŋne mi mananiŋmuo ine okacne bazu‐ŋarepemu. Ŋoŋe ʒiŋuc muc manac ehuc maŋ mocjaha embiŋ: E eatuckehuc juhapene dameŋ moc maickezejec. Irec ŋoŋe guŋ wenimoi manapac i nazaniŋ, nazapie ʒiŋuc mana tarapemu: Jaŋe irec fuŋne wâc sâcne naza mutâc eniŋmu.” 10 Eme Kaldea ŋic jaŋe ŋicwofuŋ dâŋ ʒiŋuc bâtikiecnembiŋ: “Mâreŋko ŋic moczi ŋicwofuŋ go guŋgere dâŋ gaza mutâc eene i mi fokac, erâ juwicnao ŋicwofuŋ sâko moczi fuŋne qaqa me qaŋgec bapa me Kaldea ŋic wiac iŋucnere moc mi wio‐jarewec. 11 Ŋicwofuŋ go wiac enaŋte mukomec i ŋemâcne jâmbâŋ, irec i mâreŋŋiczi mâcne, nemu mâreŋŋic jaŋehec mi jueŋgopieŋzi ŋicwofuŋ go sâcne gaza mutâc eniŋmu.”
12 Iŋuc mupie ŋicwofuŋzi aaric sâko manahuc maŋne bâruŋkeme Babe mâreŋkonec mamana ŋic sasawa bâsirowec‐jopaniŋte muwec. 13 Eme mamana ŋic hâcne jopaniŋte dâŋ râepie rawec. Ehame Danie â âgofâcne jaŋe mâmâc bâfuac‐joparâ jopaniŋte basac‐jopambiŋ. 14 Eme Arioko e ŋicwofuŋte momori fuŋfuŋfâc jaŋere micne juweczi Babe mâreŋkonec mamana ŋic jopaocte rahame Daniezi kamierâ ʒiŋuc muhuc wiocnewec: 15 “Ŋicwofuŋ e wemocte dâŋ hâhâwicne iŋucne râekac?” Iŋuc wiocneme Ariokozi Danie fuŋne qahuc âzâcnewec. 16 Eme Danie e fuŋne manarâ erificko ferâ ŋicwofuŋzi dameŋ moc bacneocte numucnewec; i ŋicwofuŋ guŋticnere fuŋne âzâcne mutâc eocte iŋuc ewec.
17 Erâ Danie e ficticnao risierâ âgofâcne Hanania, Misae â Aʒaria jaŋe wiac irec binaŋ bajarewec. 18 Ehuc jaŋe jaŋacne Babe mamana ŋic gâcne jaŋehec sipirickenʒipiŋte sambâŋte Anutu numucnepie eki busâqoc mana‐jarehuc guŋte fuŋne mumure bafickeocte jazawec. 19 Eme Danie e ŋafeo guŋqâhâŋ ecneme guŋte fuŋne mana tarawec, mana tarahuc sambâŋte Anutu ʒiŋuc muhuc muteŋ bâteŋ ecnewec:
20 “Maŋɋârâŋ â tâpiri focneekac,
Anutu e hâcne muteŋ bâteŋ ecnehuc juzo.
21 Eki hâcne mume dameŋzi hec hetikic eekac;
eki ŋicwofuŋ âkendâŋ‐jopaekac â bârâriec‐jopaekac;
eki ŋic maŋɋârâŋhec maŋɋârâŋ jaha afuse‐jareekac,
â maŋfânâŋhec jaŋe mamana tahac‐jopaekac.
22 Wiac qame hukicne soŋsoŋko foekac i bataniŋkeekac;
â wiac dapâc qisiricko foekac i manaekac,
erao tatamaczi qaja fuserâ foekac.
23 O mamacfâc‐nane jaŋere Anutu,
no daŋge mumuteŋ egarekopac,
goki hâcne maŋɋârâŋ â tâpiri bâfua‐naremec,
erâ numu‐garembeneŋ i honehuc
irec fuŋne naza mutâc emec,
go ŋicwofuŋ guŋticnere fuŋne bataniŋke‐nâremec hâcne.”
 
24 Ŋicwofuŋ e Babe mamana ŋic bâsirowec‐jopaocte Arioko mutâcnecnewec, eme irec hâcne Danie e Arioko fuacnerâ ʒiŋuc âzâcnewec: “Go Babe mamana ŋic mi qâhâmoc‐jopazemec, aricne, go ŋicwofuŋtao jowacnu fetec guŋticnere fuŋne âzâcne mutâc epemu.”
25 Mume Ariokozi Danie bâruŋ jaha ŋicwofuŋtao jowa ferâ ʒiŋuc âzâcnewec: “No Juda kâpâcwâru ŋic jaŋere ŋondeŋkonec ŋic moc bâfuakopac eki hâcne ŋicwofuŋ guŋgere fuŋne mutaniŋkeocmu.” 26 Eme ŋicwofuŋzi Beletesaza, Danie hâcne, e ʒiŋuc âzâcnewec: “Guŋ manapo irec fuŋne i goki sâcne mutâcne‐narecmu me?” 27 Eme Daniezi ŋicwofuŋ dâŋ ʒiŋuc bâtikiecnewec: “Wiac soŋnere mu wioc ekomec i ŋic mamanahec me fuŋne qaqa me qaŋgec bapa me bâpiŋte fuŋne mamana ŋic jaŋe sâcne mi gazaniŋmu. 28 Mâc sambâŋko Anutu moc jukac eki wiac soŋsoŋko foekac i sâcne bataniŋkeekac. Ekizia wâc juku wiac weniŋucne fuazokac irec dâŋ i ŋicwofuŋ Nebukaneza go hâcne gaza gowatuc ewec. Go guŋ manahuc maŋʒâŋege tâcneme wiac hone manac emŋ irec fuŋne kecʒiŋuc: 29 O ŋicwofuŋ, go fofogao fohuc juku wiac fuazokac irec manatâc qâtâc emeŋ, ehame wiac soŋsoŋko fome bataniŋkeekaczi wiac fuaocmu i mutâcne‐garewec. 30 Nore maŋɋârâŋzi ŋic gâcne jaŋere maŋɋârâŋ i sirickekacte mâcne, ŋicwofuŋ go maŋgezi guŋte fuŋne mana taracmurâ wiac soŋne kecʒi bataniŋke‐narekicne.
31 “O ŋicwofuŋ, go guŋko ɋâŋ hawari moc honemeŋ. Ɋâŋ hawari i kâcɋene sâko erâ qaŋ kisieckekicne, gore maio domame honerâ bipic tatara egarewec. 32 Qizec‐ticne golzi bakicne, mejahecne â amecne i siliwazi bakicne erâ bune â gâjoŋne aeŋ bâbâroŋzi bakicne. 33 Kike dâtâŋne i aeŋzi bakicne â kike tapene ine aeŋ â afezi ocŋondeŋ bakicne. 34 Eme go honehaŋtecne qânâ moc ŋicmezi mi fasaekicne izi waharâ ɋâŋ qâqâtâc kike tapene aeŋ â afezi bakicne i mi henʒaŋnezejec i! 35 Ehuc aeŋ mecne afe mecne aeŋ bâbâroŋ mecne erâ siliwa â gol i mâmâc jaha henʒaŋ qanʒaŋneme padi bâbâmârâŋ ficko padi jawane foekac irec sâc ewec; eme mâŋâŋzi bawiseme omae‐fârewec. Qânâ ɋâŋ qâqâtâc henʒaŋnewec izi ine soka ŋedâmârec ehuc tiki sâko erâ mâreŋ sâko mâreŋ ŋefusucmawec.
36 “O ŋicwofuŋ, go guŋ iŋuc hâcne manameŋ, ʒi ine fuŋne gazapemu. 37 O ŋicwofuŋ, go ŋicwofuŋ jaŋere ŋicwofuŋ, sambâŋte Anutuzi guriŋ bapa gie â tâpiri â sasanaŋ erâ ʒâŋe biŋe i go hâcne tahacguwec. 38 Gore meo hâcne mâreŋ sâc irec ŋic â qowi erâ sawa wipe râec‐jopa‐fârewec, ehuc rauc‐joparâ hone soŋaŋ ejarecmurâ tâpiri qikiŋne‐garewec. Ɋâŋ qâqâtâcte qizec golzi bakicne honemeŋ i go hâcne. 39 Juku gore gie bapa dameŋ tarame guriŋ bapa ŋic moc fuarâ gore waha micne juocmu; eme ere dameŋ tarame ine guriŋ bapa ŋic moc fuame arecne 3 eocmu. Eki aeŋ bâbâroŋ tinac eocmu, ehuc mâreŋ sâko mâreŋ hone soŋaŋ ecneocmu. 40 Eme guriŋ bapa ŋic namba 4 fuarâ aeŋ iŋucne erâ juocmu. E aeŋzi wiac sasawa henʒaŋ qanʒaŋne‐fâreekac irec sâc jaha mâreŋko wiac sasawa henʒaŋ qanʒaŋne‐fâreocmu. 41 Kike tape â kike motecne afe â aeŋzi ocŋondeŋ bakicne honemeŋ irec fuŋne ine kecʒiŋuc: Juku uucmaŋ ʒizi fâuckeocmu, erâ sifu sasanaŋ piticne focneocmu, afe â aeŋ ocŋondeŋ fome honemeŋ irec sâc. 42 Eme kike motecne ŋifec afe â ŋifec aeŋzi bakicne honemeŋ irec sâc jaha uucmaŋ ŋifeczi dockeha ŋifeczi sanaŋkeocmu. 43 Eme aeŋ â afe bâsifuckekicne honemeŋ irec sâc jaha ŋic ŋokac jaŋe roroc ehuc sisifuc eniŋmu; aeŋ â afe jahe bobohota sanaŋ mi eekopirec iŋuc jaha ŋic ŋokac jaŋe qâfâsâerâ mocjaha mi eniŋmu. 44 Mâc ŋicwofuŋ keci jaŋe juniŋmu dameŋ ira ine sambâŋte Anutuzi uucmaŋ fuŋmoc bâfuaocmu i ima bapanere sâc mi eocmu, erâ guriŋ bapa gie‐ticne i ŋic gâcne jaŋerao moc mi fotâcneocmu, aricne, i ŋic gurune gurune ʒi jaŋe qanʒaŋ‐jopahuc sipiric‐jopaocmu; uucmaŋ izi ine dameŋ tâmiric fofehuc juocmu sanaŋ. 45 Go qânâ moc ŋicmezi mi fasaekicne i tikionec waharâ aeŋ â aeŋ bâbâroŋ â afe â siliwa erâ gol qanʒaŋneme honemeŋ irec sâc fuaocmu hâcne. Anutu sâkozi juku wiac fuazokac i ŋicwofuŋ go hâcne gaza gowatuc ewec. Guŋ i fârine, â fuŋne qahuc gazakopac i wâc fârine jaha.”
46 Eme ŋicwofuŋ Nebukaneza e ʒâŋe maine mâreŋko hetutuckerâ Daniere maŋfuŋko fodapehuc taha bâzi â hosâc âsu biaŋ rikecneniŋte mutâcne‐jarewec. 47 Erâ Danie ʒiŋuc âzâcnerâ muwec: “Anutuge e jâmbomac nemu jaŋere Anutu fârine â ŋicwofuŋ jaŋere Wofuŋ Sâko. Eki hâcne wiac soŋsoŋko foekac i bataniŋkeekac, eme go irec hâcne guŋte fuŋne wâc sâcne bataniŋke‐nâremec.” 48 Ŋicwofuŋ e iŋuc murâ Danie ʒâŋe biŋe‐ticne bafaharehuc taha wiac furi sâko râcnerâ Babe mâreŋte ŋic fekicne âkendâŋnewec, ehuc Babe mâreŋkonec mamana ŋic jaŋere micne bapa wâc râewec. 49 Eme Danie e ŋicwofuŋ numucneme eki Sadaraka, Mesaka â Abenego jaŋe Babe hae mâreŋte soŋaŋ micne âkendâŋ‐jopawec. Danie e jahacne ine ŋicwofuŋte maŋfuŋko ʒuhuckerâ juwec.