1 “Dameŋ ira aŋelo micne sâko Mikae e Israe ŋic âgofâcge ŋezic‐jopaekaczi fua tâcneocmu. Ehame ʒârâ hâriŋ dameŋ fuaocmu dameŋ iŋucne i ŋic fua wefumbiŋkonecteaŋ moc mi fuarâ fowec. Ŋicfâcge ʒâŋe‐jeŋic juju sanaŋte papiao qâreŋkekicne fokac jaŋe ine dameŋ ira batarac‐jopazo. 2 Eme hâmorâ mâreŋmaŋko foeŋgopieŋ jaŋeraonec bocjahazi ɋârerâ fahareniŋmu, ehuc gâcne jaŋe juju sanaŋte biŋe ehapie gâcne jaŋe ine mimi busâqoc â sisipiric sanaŋte biŋe eniŋmu. 3 Ŋic maŋɋârâŋhec jaŋe sambâŋ tatamac iŋucne tamaeniŋmu, â ŋic bocjaha tiŋne jujure hatao jowac‐jopambiŋ ŋic i jaŋe ine bâpiŋ iŋucne tamaehuc juniŋmu sanaŋ. 4 Danie goki ine dâŋ gaza gowatuc ekicne i ŋic moc mi jajaza papia sâfâzi basanaŋkerâ mâc râetec foha dameŋ tarazejec. Eme dameŋ ira ine ŋic bocjaha jaŋe wose gufuc ekupie mamana‐jeŋic fua ɋârâŋkezejec.”

5 Eme Danie no ʒâŋe fipe rame mi aŋelo opâ ʒiŋuc ocniŋuc domahapire honec‐jofazepac i! 6 Ehuc aŋelo moc opâ faicnao qoruc ʒora rodomawec e ʒiŋuc muhuc wiocnepo: “Wiac hâhâwicne keci mo dameŋko taraocmu?” 7 Eme aŋelo opâ faicnao qoruc ʒora rodomawec eki mejahec‐ticne sambâŋkopec sicnehuc juju sanaŋ rune erao ɋetickehuc dâŋ ʒiŋuc mupaŋkewec: “Jara jahec â moc â nâfocne taraocmu. Eme tiri ŋic ŋokac jaŋerao sisipiric gie baekac ere tâpiri omaeha wiac i sasawa tara‐fâreocmu hâcne.” 8 No dâŋ i manarâ fuŋne mi mana tarapo, irec ʒiŋuc muhuc wiopo: “O bomboŋ‐nane, wiac kecirec fârine juku weniŋuc fuazokac?” 9 Eme muwec: “Danie, go razemec, dâŋ keci ŋic hesoŋke‐jarehuc sâfâzi basanaŋkekicne iŋuc foha juku dameŋ taraocmu hâcne. 10 Ŋic bocjahazi maŋjeŋic ʒure ʒumururuc epie ɋaɋac taeŋne eocmu; ŋic hehesicne jaŋe wiac hehesicne jaha eniŋmu, ehuc mamana tarahec mi eniŋmu, maŋɋârâŋhec jaŋe ine mana taraniŋmu. 11 Taha bâzi ririkere aka hehuc wiac mamakâcne sisipiric‐ticnehec ebac eniŋmu dameŋ ira fuŋkerâ jufekuhapie ʒoaŋ gie bapa 1 tauseŋ 290 taraocmu. 12 Ŋic moc e ʒoaŋ gie bapa 1 tauseŋ 335 taraocte woŋec jufeocmu ere manape ʒerine eocmu. 13 Go ine rahuc jukuhaŋtec dameŋge tarazejec. Eme ʒâŋeruŋko foku dameŋ tataranao faharerâ wiac kâdoc qagarekicne i rauckezemec.”