HOSEA
Porofete femicne jaŋere papia râpenao porofete wahamicne 12 jaŋere papia forakac. Eme micne barâ fokac i Hoseare papia hâcne.
Hosea e porofete Jesajazi juhame juwec, â porofete gie‐ticne bahuc juwec ine jara 750–725 B. C. dameŋ ŋondeŋ ira. Papia‐ticne wosehuc ʒiŋuc hone manac eeŋgopeneŋ: Hosea e Judaŋic me Jerusalem hae irec binaŋ mâcne, Israe ŋicguru 10 Palestaiŋ mâreŋ faicpec jumbiŋ jaŋere dâŋ â binaŋ qâreŋkewec. Porofete Hosea e taha bapa gie irec fuŋne mana‐hâmowec, izi ʒiŋuc mufua‐nârekac: E ŋic fekicne jaŋere guruonec; mâc e jahac taha bapa juwec me mâcne, i mi manaŋgopeneŋ. Hosea e jahacne â juju â eebapa‐ticnere dâŋ binaŋ gaŋ 1–3 maŋnao qâreŋkekicne fokac i sawa manaŋgopeneŋ.
Papia‐ticne bâfâuckepene dâkâne jajahec fuakac. Moc i gaŋ 1–3, â moc i gaŋ 4–14.
Dâkâne namba 1 maŋnao dâŋ forakac i kecʒiŋuc: Porofete Hosea juhame Israe ŋicguru 10 jaŋe sindaŋ erâ nemu wiac fuŋne fuŋne araŋ bajarehuc Anutu tatara ecnembiŋte okac dameŋ‐jeŋic maickezo ewec. Eme irec hâcne porofete e ŋifec Anutu kimbeŋ‐ticnere fuŋne â ŋifec ine buuruc‐ticnere fuŋne mutaniŋke‐jareocte jaŋerao sorekicne. Eme Israe ŋic jaŋere fuŋne bataniŋkeocte e jahacne juju â eebapao sâc mutaniŋkewec. Israe e ŋokâc sâqocne, sasec ŋokac iŋucne, ruticne beherâ kosa juwec. Porofete ŋonâŋ‐ticnezi iŋuc hâcne ewec. Irec e jahacne ŋowe ŋonâŋ jujuzi Israe ŋicguru juju‐jeŋicte sâsâc eha fuŋne‐jeŋic mu rituc ewec hâcne.
Dâkâne namba 2 ira porofete dâŋ sasawa forakac, Israe ŋicguru jaŋere uŋsawaŋ â okacnere findaŋdâŋ hâcne. Hosea e Anuture fuŋne kecʒiŋuc manarâ mutaniŋkehuc juwec: Anuture maŋjauŋ i tatarane tâmiric. E maŋjauŋ enârehuc ŋifec bâtiŋ‐nâpoekac, â ŋifec ine akic‐nâpoekac wâc. Anutu maŋjauŋ‐ticnere fuŋne i gaŋ 11:8–9 ira fua taniŋkekac.
1
Porofete Hosea ŋokac naru motecfâcne jaŋere dâŋ
Juda ŋicwofuŋ Uʒija, Jotam, Ahaʒi â Hisikia jaŋe tuczi tuc juwefuhapie Jeroboam, Jehoasire ŋokâ hâcne, e Israe ŋicwofuŋ juwec dameŋ ira Wofuŋte dâŋ i Berire ŋokâ Hosea erao fuawec.
Wofuŋ e dâŋticne bâbâni Hosea mufuacnehuc kecʒiŋuc âzâcnewec: “Go rarâ sasec ŋokac moc rorâ naru motec bâfuac‐jopazemec, i mâreŋ ʒirec rune jaŋe Wofuŋ râpeckehuc sasec gie boc baeŋgopieŋ irec.” Eme rarâ Dibilaimte otâ, ʒâŋene Gomera e ŋonâŋ‐ticne rowec, eme eki motec kiweckerâ rowec.
Eme Wofuŋzi Hosea âzâcnewec, “Go ʒâŋe‐ticne Jesere muzemec! Dameŋ bembeŋne sawa fokac i tarame no Jesere haeo soc wahawec irec kiŋ i Jehu wiacfâcne jaŋerao batarapemu, ehuc Israe kikefuŋko ŋicwofuŋ juju i mutarape omaeocmu. No ʒoaŋ ira Jesere wâneŋko Israere tepe neŋgoc i qazupemu.”
Eme ŋokac e mocwâc kiweckerâ juku naru moc rowec. Eme Wofuŋzi Hosea âzâcnewec: “Go ʒâŋene ‘Uruc jauŋ mi ecnekicne’ iŋuc muzemec. No Israe kikefuŋ maŋjauŋ mocwâc mi ejarepemu, â kiŋjeŋic mocwâc mi behe‐jarepemu irec. Juda kikefuŋ jaŋe ine aki anonoc ejarerâ Wofuŋ Anutu‐jeŋic juhuc bafic‐jopapemu, tepe me tubac me ʒika me becâsic me becâsicko rara ŋic wiac izi ine mi bafic‐jopapemu.”
“Uruc jauŋ mi ecnekicne” e moŋ qikiŋneme neŋgocnezi mocwâc kiweckerâ motec moc rowec. Eme Wofuŋzi muwec: “Go ʒâŋe‐ticne ‘Nore kikefuŋ aricne’ iŋuc muzemec, ŋoŋe nore kikefuŋ mi juŋgopieŋ â no ŋoŋere Anutu wâc mi jukopacte iŋuc ezemec.”
Israe kikefuŋ jaŋe Wofuŋ râpeckepie sifu maŋjauŋ ejarewec
10 Israe kikefuŋfâcne jaŋere ʒare i hâwecmecko moŋgeŋ forakac irec sâc fuarâ junʒepieŋ, moŋgeŋ i sâcticne mi mamanane â mi wowosene. Eme “Ŋoŋe nore kikefuŋ aricne” iŋuc muŋareeŋgopieŋ irec okacne kecʒiŋuc muniŋmu: “Anutu jujune ere kikefuŋ.” 11 Eme Judare kikefuŋ mecne, Israere kikefuŋ mecne jaŋe mâmâc qâturehuc micne‐jeŋic mocjaha âkendâŋnerâ mâreŋne mâreŋne irecnec fisiniŋmu; eme Jesere dameŋ i dameŋ fekicne moc eocmu.