2
1 Ŋoŋe hahac ɋafâc‐ŋeŋic jaŋere ʒâŋe ʒiŋuc munʒepieŋ: “Kikefuŋfâc‐nane”, â seŋ qofâc‐ŋeŋicte jaŋere ine, “Uruc jauŋ eŋarekicne.”
2 “Neŋgoc‐ŋeŋic e dâŋko râe‐jâmbâŋkenʒepieŋ,
e ŋonâŋ‐nane mi jukac,
â no ŋowe‐ticne wâc mi jukopac irec;
e ʒâŋe mai‐ticnaonec sasec ŋokacte mai kura bârâriezejec,
â boe saure eri wiac susu ŋondeŋko qonaŋkeme
waha domakac i mâmâc bârâriezejec.
3 Iŋuc mi eocmuo ine noni ŋaqi heunuckecnepe
fufua dameŋ‐ticnao fowec
irec sâc erâ biuctac domazejec;
noni mupe mâreŋ burocne iŋucne ezejec,
â mâreŋ hahaŋkekicne iŋucnea eha
opâ sakarecnepe opâre hâmo sipiric ezejec.
4 Naru motecfâc‐ticne jaŋe
sasec ŋokacte ɋâricfâc juŋgopieŋte mi akic‐jopapemu.
5 Neŋgoc‐jeŋic e sasec gie bahuc kiwec‐jopaweczi
wiac miminehec ewec i kecʒiŋuc muhuc ewec:
‘No sasecŋicfâc‐nane bâjâpec‐jopahuc juzepac,
jaŋe hâcne nânâ opâ â ŋaqi qoruc â wokemaŋ
erâ opâ wiac nânâne gâcne i nâre tahac eeŋgopieŋ.’
6 No irec hâcne hata‐ticne fâpâ uupiczi aka hecnerâ
mai‐ticnao qânâsac moc bape hata‐ticne basazejec.
7 Eme sasecŋicfâc‐ticne bâjâpec‐jopa‐bipiehuc
basac‐joparâ muocmu:
‘No faharerâ mârâc ŋowe‐nanerao risiezepac,
no ehec jupo dameŋ ira sâcne juhâmopo.’ ”
8 Eme Wofuŋzi ʒiŋuc mukac:
“Noni hâcne wiac kecʒiŋuc râcne tahac epo
i mi mana tarawec:
Padi jacgoŋ, waiŋ â wokemaŋ,
erâ siliwa â gol bocjaha râcnepo
i Baali nemure behewec.
9 No irec hâcne padi jacgoŋ‐nane i qa roro dameŋko,
â waiŋ opâ‐nane i dameŋ‐ticne maickeme
mocwâc ro sakac epemu,
ehuc ŋaqi qoruc mimi‐ticne sâockeocte râcnepo
i wâc iŋuc jaha jâoc ropemu.
10 Erâ mimi‐ticne i sasecŋicfâc‐ticne jaŋere maio bajaŋgeŋkehape
moczi moc nore meonec mi batarazejec.
11 Noni mupe bubiaŋ‐ticne sasawa,
â hombaŋ â mosa wahame
ʒeri bubiaŋ â sabata erâ hombaŋte tutumaŋ wiac‐ticne
i sasawa omae‐fârezejec.
12 Ehame no waiŋ qaŋeŋ‐ticne
â jâmbojâc‐ticne sipirickepemu.
Wiac irec hâcne ʒiŋuc muwec:
‘I sasecŋicfâc‐nane jaŋe sasec giere furi narembiŋ.’
No ine wiac i mupe uupic wânʒâŋ fuame
kâte qowi jaŋe nâhuc junʒepieŋ.
13 Eme hombaŋ sâc Baali nemu hosâc âsu rike‐jarehuc
e jahacne sahac ʒânoŋ bibiri
â maŋguc resoneheczi erickewec,
erâ sasecŋicfâc‐ticne bâjâpec‐jopahuc nore nikeckewec
irec okacne bazucnepemu, Wofuŋ nore dâŋ iŋuc.
14 “Manakic, no irec hâcne mu baafec ecnehuc
mâreŋ sawao jowa rarâ bâbâmiriŋ dâŋ âzâcnepemu.
15 Erâ no ira waiŋ gie‐ticne râcnepemu,
ehuc Akoro Wâneŋ* Nâŋâcne dâŋko: Ʒârâ ʒâpâ wâneŋ. i mupe jujuhâmore motâc ezejec.
Eme e ira dâŋnane manaocmu,
naru‐ticne Aigita mâreŋkonec wefurâ ehuc juwec
irec sâc eocmu hâcne.”
16 Wofuŋzi ʒiŋuc mukac: “E dameŋ ira ‘Baali‐nane’ mâcne, ‘Ŋowe‐nane’ iŋuc munareocmu. 17 No Baali ʒâŋe‐jeŋic micticnaonec bârâriepemu, eme ʒâŋe wiac irec mocwâc mi manasuzejec. 18 No dameŋ ira Israe jaŋere erâ kâte qowi â sawa wipe erâ mâreŋko wiac foforâ juekac jaŋehec ʒâʒâfic moc epemu, ehuc tepe neŋgoc â ʒika erâ ʒikare wiac gâcne mâreŋkonec bârâriepemu, erâ ejarepe wama faio ŋec juc enʒepieŋ. 19 No ŋokac‐nane rocgupe juzemec sanaŋ, no tiŋne â mumutiŋ dâŋko jowacgurâ maŋjauŋ â buuruc egarehuc ŋonâŋ‐nane rocgupemu hâcne. 20 No erâ‐eesanaŋ‐nanere erâ ŋonâŋ‐nane rocgupemu, eme Wofuŋ no hâcne mana taracnuzemec.
21 “No dameŋ ira sambâŋ manacnehape
mâreŋ gume hesiwiŋ ecnezejec,
Wofuŋ nore dâŋ iŋuc.
22 Eme mâreŋzi padi jacgoŋ â waiŋ erâ wokemaŋ âgo ejareme
fuahuc Jesere dopeckenʒepieŋ.
23 Iŋuc fuame nore biŋe juocte âkendâŋnepemu,
ehuc ‘Uruc jauŋ mi ecnekicne’ e jauŋkepemu,
â ‘Nore kikefuŋ aricne’ jaŋe ʒiŋuc jazapemu:
‘Ŋoŋe nore kikefuŋfâc,’
eme jaŋe muniŋmu, ‘Go nâŋere Anutu.’ ”