27
Ebali tikio sâcmutâc dâŋ qâreŋkeniŋte jazakicne
1 Mose â Israe soŋaŋ micne jaŋe ŋic ŋokac dâŋ kecʒiŋuc jaza mutâc embiŋ: “Ŋoŋe miŋecgac sâcmutâc dâŋ ŋaza mutâc embeneŋ i reŋke‐fârenʒepieŋ. 2 Ehuc Wofuŋ Anutu‐ŋeŋiczi mâreŋ ŋare tahac ekac ira raniŋte Jordaŋ opâ fotâcneniŋmu dameŋ ira qânâzi ma âkendâŋnehuc simeŋzi batakirenʒepieŋ. 3 Ehuc fainao sâcmutâc dâŋ ʒi sasawa qâreŋke‐fârenʒepieŋ. Wofuŋ Anutu‐ŋeŋiczi mâreŋ ŋare tahac eme ro rauc eniŋte raʒihuc iŋuc hâcne enʒepieŋ. Mâreŋ ira susu â baŋac fusucmarâ qâmbâriŋkeekac i hâcne mamacfâc‐ŋeŋic jaŋere Wofuŋ Anutuzi ŋareocte mupaŋkewec. 4 Ŋoŋe Jordaŋ opâ fotâcnerâ, dâŋ ŋaza mutâc embeneŋ irec sâcko qânâzi ma i Ebali tikio âkendâŋnenʒepieŋ, ehuc simeŋzi batakirenʒepieŋ. 5 Erâ ira Wofuŋ Anutu‐ŋeŋicte alata moc aeŋ wiaczi mâcne, qânâzi sawa banʒepieŋ. 6 Ine hâcne, ŋoŋe Wofuŋ Anutu‐ŋeŋicte alata i qânâ hâcbuczi banʒepieŋ, ehuc fainao Wofuŋ Anutu‐ŋeŋicte qowi bâzi rikenʒepieŋ. 7 Erâ wama bâzi wâc rikerâ nâhuc Wofuŋ Anutu‐ŋeŋicte maio ʒeri enʒepieŋ. 8 Ŋoŋe sâcmutâc dâŋ ʒi qânâo qâreŋke‐hâmopie fua taniŋkezejec.”
9 Eme Mose â Lewiŋic taha bapa jaŋe Israe ŋic ʒeŋgoma ʒiŋuc jazambiŋ: “O Israe ŋicbureŋ, ŋoŋe niniŋkerâ hazec râeniŋ: Ŋoŋe ʒoaŋ ʒira Wofuŋ Anutu‐ŋeŋicte ŋic ŋokac eŋgopieŋ. 10 Ŋoŋe irec hâcne Wofuŋ Anutu‐ŋeŋicte dâŋ mananʒepieŋ, ehuc sâcmutâc â dâŋsanaŋ‐ticne miŋecgac ŋaza mutâc eŋgopeneŋ i reŋkenʒepieŋ.”
Sâwecdâŋ gâcne
11 Eme Mose e ʒoaŋ ijaha ŋic ŋokac dâŋ ʒiŋuc jaza mutâc ewec: 12 “Ŋoŋe Jordaŋ opâ fotâcnerâ ŋicguru kecʒiŋuc jaŋe ŋic ŋokac jambuŋ‐jopaniŋte Geriʒim tikio domanʒepieŋ: Simeoŋ, Lewi, Juda, Isasa, Josefe â Benjamiŋ. 13 Â sâwec‐jopaniŋte ine ŋicguru kecʒiŋuc jaŋe Ebali tikio domanʒepieŋ: Rubeŋ, Gade, Ase, Sebuloŋ, Daŋ â Naftali. 14 Ehame Lewiŋic jaŋe Israe ŋic ʒeŋgoma hahaŋne bahuc dâŋ kecʒiŋuc jazanʒepieŋ:
15 “ ‘Metâ bapa ŋic jaŋe ɋâŋ qâqâtâc wiac bapie Wofuŋzi maname wiac mamakâcne eekac i ŋic moczi moc jâczi me aeŋzi barâ soŋsoŋko heme ŋeocmu ŋic e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
16 “ ‘Ŋic moczi neŋgoc mamac jahec‐ticne ʒaubac ejacteocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
17 “ ‘Ŋic moczi âgo‐ticnere mâreŋte ma bârârieocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
18 “ ‘Ŋic moczi ŋic ʒâŋe tiŋtuŋ moc ecneme hata qâsorieocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
19 “ ‘Ŋic moczi ŋic jabane me hozec bekâ jaŋere dâŋ muhasickeocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
20 “ ‘Ŋic moczi mamac‐ticnere ŋonâŋhec fohuc mamac‐ticne mimi qaqac ecneocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
21 “ ‘Ŋic moczi qowi jaŋehec sasec gie baocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
22 “ ‘Ŋic moczi seŋoc‐ticnehec foocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
23 “ ‘Ŋic moczi safeŋ‐ticnehec foocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
24 “ ‘Ŋic moczi ŋic âgo‐ticne soŋsoŋko qâhâmoocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’
25 “ ‘Ŋic moczi ŋic moc kiŋ tâmiric qâhâmoocte furine râcnepie roocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jambomac.’
26 “ ‘Ŋic moczi sâcmutâc dâŋ ʒi reŋkehuc mi bajuocmu e sâweckenʒepieŋ.’ Iŋuc epie ŋic ŋokac jaŋe ʒeŋgoma dâŋ okacne ʒiŋuc munʒepieŋ: ‘Jâmbomac.’