1 “Ŋoŋe Wofuŋ Anutu‐ŋeŋicte dâŋ mana rereŋ ehuc sâcmutâc dâŋticne miŋecgac ŋaza mutâc ekopac i aimuŋ jaha bajuniŋmuo ine Wofuŋ Anutu‐ŋeŋiczi bafaharec‐ŋopame mâreŋ sâc ŋicne ŋicne juraŋgopieŋ jaŋe siric‐jopaniŋmu. 2 Ŋoŋe Wofuŋ Anutu‐ŋeŋicte dâŋ mana rereŋ eniŋmuo ine jambuŋte fârine kecʒiŋuc bâfuanʒepieŋ: 3 Hae‐ŋeŋicko juhâc qâhâmonʒepieŋ â gie boze‐ŋeŋicko iŋuc jaha juhâc qâhâmonʒepieŋ. 4 Ɋâricfâc‐ŋeŋic jaŋe fua sawec enʒepieŋ â giegaŋ‐ŋeŋicte fârine mazuc mâriri fuazejec erâ lama bulimakaofâc‐ŋeŋic sasawa jaŋe sawe mâririackenʒepieŋ. 5 Heŋeŋicko me rowaŋ‐ŋeŋicko dameŋ sâc nânâzi fusucmarâ fozejec. 6 Fahare raniŋmu me fisi foniŋmu ine Wofuŋzi jambuŋ‐ŋopahuc juzejec.

7 “Wofuŋ e râsifâc‐ŋeŋic jaŋe qâzuckerâ guru mocjaha warehapie ʒâŋe fai‐ŋeŋicko bawahac‐jopame siŋsaŋ qarâ gurune gurune ehuc wise‐fâreniŋmu. 8 Wofuŋ e iŋuc ehuc rowaŋ fic wiac‐ŋeŋic jambuŋkeme mazuc mâriri sâkohec eocmu â gie wiac‐ŋeŋic sasawa jambuŋkeme qarâ biaŋ fua‐fâreocmu. Wofuŋ Anutu‐ŋeŋiczi mâreŋ ŋare tahac eocmu ira juhapie jambuŋ‐ŋopaocmu hâcne. 9 Ŋoŋe Wofuŋ Anutu‐ŋeŋicte sâcmutâc dâŋ mana rereŋ ehuc itiroc‐ticne bâjâpeniŋmuo ine mupaŋke‐ŋarewec irec sâcko tiri ŋicgurufâc‐ticne bacŋopaocmu. 10 Iŋuc eme Wofuŋte ŋicfâc muŋareeŋgopieŋ i mâreŋ sâc ŋic jaŋe manarâ ŋoŋere erâ hâwic‐jopazejec. 11 Ehame Wofuŋzi mâreŋ ŋare tahac eocte mamacfâc‐ŋeŋic mupaŋke‐jarewec ira juhapie jambuŋ‐ŋopame ɋâricfâc‐ŋeŋic mecne, bulimakaofâc‐ŋeŋic mecne jaŋe sawe mâririackehapie nânâ wiac‐ŋeŋic wâc fua biaŋ ezejec. 12 Ehame Wofuŋzi mume sambâŋ aŋkeme hoezi dameŋ‐ticnaoa hehuc mâreŋ‐ŋeŋic bâgunuckezejec. Iŋuc eme nânâ mâriri fua‐ŋareme ŋicne ŋicne kime dopec ejarehuc jaŋere wiac tofamâc mi jowac ronʒepieŋ. 13 Wofuŋ e iŋuc ehuc bafaharec‐ŋopame ŋicguru gâcne jaŋere kiŋaŋ qaqa mi junʒepieŋ, ehame juju ʒae‐ŋeŋiczi wawahane mi eha fefene jaha fozejec. Ŋoŋe Wofuŋ Anutu‐ŋeŋic ere sâcmutâc dâŋ miŋecgac ŋaza mutâc ekopac i mana rereŋ ehuc aimuŋ jaha bajuniŋmuo 14 me miŋecgac dâŋ wiac gâcne ŋaza mutâc ekopac i qatarahuc fâreopec me qanaopec qâsorierâ nemu gâcne araŋ moc mi bajareniŋmuo ine iŋuc hâcne eŋareocmu.

15 “Me ŋoŋe Wofuŋ Anutu‐ŋeŋicte dâŋ mana rereŋ mi eniŋmu me sâcmutâc â dâŋsanaŋ‐ticne miŋecgac ŋaza mutâc ekopac i aimuŋ jaha mi bajuniŋmuo ine sâwec ʒiŋuc hotâckeniŋmu: 16 Hae‐ŋeŋicko juhapie sâwec‐ŋopazo, me gie boze‐ŋeŋicko ŋec juc ehapie sâwec‐ŋopazo wâc. 17 Heŋeŋic me rowaŋ‐ŋeŋic i sâweckezo jaha. 18 Ɋâricfâc‐ŋeŋic mecne, giegaŋ‐ŋeŋicte fârine mecne, lama bulimakaofâc‐ŋeŋic jaŋe mâmâc sâwec‐jopa‐fârezo. 19 Ehame sâweczi fai‐ŋeŋicko feha fahare ranʒepieŋ me fisi fonʒepieŋ.

20 “Ŋoŋe behecnurâ wiac hehesicne embiŋte gie i me i bahuc juhapie Wofuŋ noni mupe ʒika â ʒârâ hâriŋ faio sisi hâhâŋ juju i fua‐ŋareme izia hâmo sipiric enʒepieŋ. 21 Wofuŋ nonizia mupe huc sâqocnezi rocŋopa‐fâreme mâreŋ ro rauc eniŋte raʒizo eŋgopieŋ ira sirowe‐fâreniŋmu. 22 Erâ Wofuŋ nonizia wâc mupe hucsanaŋ me huc ʒocnehec, me huc ʒupu me sahac ɋâɋâfoŋ fua‐ŋareocmu, me ʒoaŋ sanaŋ qaocmu, me nânâ wiac‐ŋeŋic râec mâʒiac efâreme hâmo sipiric efâreniŋmu hâcne. 23 Ehame sambâŋko karoraczi aeŋ bâbâroŋ iŋucne eme hoe mocwâc mi heocmu â mâreŋzi aeŋ iŋucne eme wiac nânânezi wâc mi fuaocmu. 24 Wofuŋ noni mupe mâreŋ‐ŋeŋicko hoezi herisieme kâmbâc â rufe iŋucne waharâ sipiric‐ŋopa‐fâreocmu.

25 “Ŋoŋe râsifâc‐ŋeŋic jopaniŋte qâzuckerâ guru mocjaha rahapie Wofuŋzi râsifâc‐ŋeŋic mana‐jareme bawahac‐ŋopapie siŋsaŋ qarâ gurune gurune ehuc wise‐fâreniŋmu. Ehame mâreŋ sâc ŋic gurune gurune jaŋe honec‐ŋoparâ bipic tatara ejareocmu. 26 Iŋuc fuame qâŋɋâŋfâc‐ŋeŋic wipe qowi jaŋere nânâ ehapie ŋic moczi moc jopa jâpec sâcne mi ejareocmu. 27 Eme Wofuŋzi mume Aigita ŋic jaŋere wicsanaŋ mecne, erâ wakoc â sisiwiŋ â kore i mâmâc fua‐ŋareme bâbâpiaŋkenere sâc mi eocmu. 28 Ehuc Wofuŋzia mume bemiroc â ʒâŋe tiŋtuŋ erâ maŋsifuc wâc fua‐ŋareocmu. 29 Ehame ŋic ʒâŋe tiŋtuŋzi dapâcko âtesac qasac ehuc juekac irec sâc jaha ŋoŋe ʒoaŋ ɋaɋacko âtesac qasac ehuc juniŋmu. Ehuc gie i me i bapie fâri tâmiric eocmu, ehame ŋic jaŋe bâʒâic‐ŋopahuc wiac‐ŋeŋic fiuckepie ŋic moczi moc sâcne mi bafic‐ŋopaocmu. 30 Dameŋ ira ŋic moc ŋokac biŋe qacnehapie ŋic moczi ŋokac ehec foocmu. Â fic moc barâ maŋnao ŋec juc mi eniŋmu, â waiŋ gie bapie fârine fuame ro nâc wâc mi eniŋmu. 31 Erâ wâc bulimakaofâc‐ŋeŋic ʒâŋe fai‐ŋeŋicko jopapie biuc‐jeŋic moc mi nâniŋmu, â doŋgifâc‐ŋeŋic ʒâŋe fai‐ŋeŋickoa fiuc rocjoparâ mocwâc mi bârisiec‐jopaniŋmu. Râsifâc‐ŋeŋic jaŋe lamafâc‐ŋeŋic rocjopa‐fârepie moczi moc sâcne mi bafic‐ŋopaocmu. 32 Ehame otâ ŋokâfâc‐ŋeŋic jaŋe ŋic gâcne jaŋere meo fepie hone jâjâpec‐jopahuc juku ʒâŋe‐ŋeŋic râŋgeŋkeocmu, ehame ŋaŋaczia sanaŋkeniŋte eipieniŋmu. 33 Eme ŋicguru furune, mi manac‐jopaeŋgopieŋ jaŋe fisirâ giegaŋ‐ŋeŋicte fârine ro nâc efâreniŋmu, erâ bâʒâic‐ŋopahuc sipiric‐ŋopa‐fâreniŋmu. 34 Iŋuc eŋarepie ʒâŋe‐ŋeŋiczi honerâ mutuc heŋeŋicko huocmu. 35 Ehame Wofuŋzi mume dieŋ â dâtâŋ‐ŋeŋicko bârâc fua‐ŋareme bâbâsomienere sâc mi eha soka ŋedâmârec ehuc sahac‐ŋeŋic sâcke‐fâreocmu.

36 “Wofuŋ e ŋoŋe ŋaŋacne â ŋicwofuŋ‐ŋeŋic âkendâŋneŋgopieŋ e mâmâc ŋicguru furune jaŋerao bacŋopa raocmu. Ŋic furune i jaŋe ŋoŋe â mamacfâc‐ŋeŋic ŋoŋe mi manac‐jopaeŋgopieŋ. Eme ŋoŋe jaŋerao juhuc nemuɋâŋ jâc â qânâzi ba akic ekicne jaŋe kiŋaŋ qajareniŋmu. 37 Ehame Wofuŋzi ŋic gurune gurune jaŋere ŋondeŋko bacŋopa rame ira juhapie ŋoŋere qâqiŋ qahuc gâwie‐ŋareniŋmu â mana wahac‐ŋopaniŋmu. 38 Erâ wâc gie‐ŋeŋicko wiac ukicne bocjaha sara mama eniŋmu, â fârine ine hâpic gisic jaŋe nâfârepie afecne sawa qa roc eniŋmu. 39 Â waiŋ gie‐ŋeŋic he sarac epie fârine qokiczi nâfâreme ro nâc moc mi eniŋmu. 40 Oliwa jâczi mâreŋ‐ŋeŋic sâckerâ doma raocmu, ehuc fârine ine mâc mâtâckehuc wahame wokemaŋne ruaniŋte basaniŋmu. 41 Erâ wâc naru motec bâfuac‐jopapie ŋoŋere biŋe mi juhuc kâpâcwâru ficko rafâreniŋmu. 42 Â jâc wiac doma raekac i mecne â giegaŋ‐ŋeŋicko wiac nânâne fua raekac i mâmâc hâpic gisic wiac jaŋere biŋe efârezejec. 43 Ehame ŋic jabane ŋondeŋ‐ŋeŋicko jueŋgopieŋ jaŋe siric‐ŋoparâ ʒâŋe biŋehec ehapie ŋoŋe ŋaŋacne ine wawahane erâ junʒepieŋ. 44 Jaŋe hâcne wiac hotâ bajare juniŋte ŋarehapie ŋoŋe wiac moc sâcne mi jareniŋmu; jaŋe qizecne juhapie ŋoŋe gecne sawa junʒepieŋ. 45 Ŋoŋe Wofuŋ Anutu‐ŋeŋicte dâŋ mana rereŋ ehuc sâcmutâc â dâŋsanaŋ‐ticne ŋaza mutâc ewec i mi bajumbiŋte sâwec wiac sasawa ŋoŋere faio feku kinduŋ bânduŋ eŋareme omaenʒepieŋ. 46 Sâwecdâŋ izi hâcne ŋaŋacne â ɋâricfâc‐ŋeŋic ŋoŋerao aka â ma erâ fohuc juzejec.

47 “Ŋoŋe wiac sasawa irec mâriri foŋareha mana‐bipiehuc Wofuŋ Anutu‐ŋeŋic bubiaŋ manacnehuc buafec jaha kiŋaŋ mi qacnembiŋ. 48 Irec hâcne Wofuŋzi râsifâc‐ŋeŋic ejareme fisi ŋebâzic‐ŋopapie nânâ opâre hâmohuc ŋaqi qoruc me wiac gâcne basahuc kiŋaŋ qajarenʒepieŋ; ehame aeŋ qeŋqeŋ i upe‐ŋeŋicko hepie hurâ kihâmoc‐ŋopame omaenʒepieŋ. 49 Wofuŋ e ŋicguru moc ʒorickonec, mâreŋ qaŋeŋnaonec hâcne, ejareme fisi‐ŋareniŋmu jaŋe gagasac‐jeŋic i wâuc wipere gagasac irec sâc, â dâŋjeŋic i ŋoŋe mi manaeŋgopieŋ. 50 Jaŋe ŋic ʒâʒâicne juhuc ŋic ŋokac qizecne mecne naru motec mecne moc mi akic‐jopaniŋmu. 51 Ehuc bulimakaofâc‐ŋeŋic motecne mecne â giegaŋ‐ŋeŋicte fârine mecne i nâfârepie ŋoŋe nânâre hâmo sipiric eniŋmu. Erâ ŋic izia padi jacgoŋ wiac‐ŋeŋic me waiŋ â oliwa wokemaŋ‐ŋeŋic me lama bulimakaofâc‐ŋeŋic i wâc ŋowac rofârepie hâmo miziec eniŋmu. 52 Ŋoŋe hae‐ŋeŋic sâc juhapie somâc‐ŋopaniŋmu; iŋuc eŋarekupie hae sâc sacsanaŋ‐ŋeŋic ʒoricnere manapie fewec i rândiŋkerâ waha qaocmu. Wiac i Wofuŋ Anutu‐ŋeŋiczi hae mâreŋ ŋare tahac ewec ira iŋuc hâcne eŋareniŋmu. 53 Râsifâc‐ŋeŋic jaŋe somâ râe‐ŋarehapie ŋoŋe sisi hâhâŋ faio juhuc Wofuŋ Anutu‐ŋeŋiczi naru motecfâc‐ŋeŋic tahac‐ŋopawec jaŋe jopa nâc ejareniŋmu. 54 Ehame ŋic moc e mârâc jaha nânâ mâriri sâkohec juweczi dameŋ ira nânâre hâmohuc naru motecfâc‐ticne jopa hezuc ejarerâ hahac ɋafâcne me ŋonâŋ motecfâcne ʒanʒaŋne jaŋe sakare‐jarehuc kâdoc moc mi qajareocmu. 55 Râsifâc‐ŋeŋic jaŋe hae sâc somâ râe‐ŋarehapie sisi hâhâŋ faio juhuc nânâ wiac basarâ ŋiczi iŋuc hâcne eniŋmu. 56-57 Â ŋokac moc e mârâc jaha nânâ mâriri sâkohec juhuc nânâ‐ticne fuaocte gie mocwâc mi baweczi dameŋ ira nânâre hâmohuc naru motec roro dameŋko kogoc roocmu i mecne â hahac ɋaticne i mâmâc ŋowe‐ticne me naru motecfâcne sakare‐jarehuc kâdoc moc mi qajareocmu. Râsifâc‐ŋeŋic jaŋe hae sâc somâ râe‐ŋarehapie sisi hâhâŋ faio juhuc nânâ wiac basarâ wiac i soŋsoŋko nâniŋte iŋuc hâcne eniŋmu.

58 “Ŋoŋe papia qizec kecʒirec maŋnao sâcmutâc dâŋ qâreŋkekicne fokac i aijakic jaha mi bajuniŋmu me Wofuŋ Anutu‐ŋeŋicte ʒâŋe tirine â qeŋ bipinehec i araŋ mi bacneniŋmuo 59 ine Wofuŋzi mume ŋoŋe â ɋâricfâc‐ŋeŋic ŋoŋere faio ʒârâ ʒâpâ wiac hâhâwicne ferâ foocmu. 60 Erâ wâc ekizia mume Aigita ŋic jaŋere hucukic fuŋne fuŋne irec hâhâwic bajueŋgopieŋ hucukic i hâcne fai‐ŋeŋicko ferâ fosanaŋkeocmu. 61 Ehame hucwiac gâcne gâcne â ʒârâ ʒâpâ wiac gâcne gâcne ʒâŋe biri‐jeŋic papia kecʒirec maŋnao mufuahuc mi qâreŋkekicne i Wofuŋzia fai‐ŋeŋicko râeme fekume omaenʒepieŋ. 62 Ŋoŋe sambâŋko bâpiŋ ŋeraŋgopieŋ irec sâc jumbiŋzi afeckepie ʒare‐ŋeŋic wawahane ezejec, i Wofuŋ Anutu‐ŋeŋicte dâŋ mana rereŋ mi embiŋte iŋuc hâcne fua‐ŋarezejec. 63 Wofuŋ e buafec faio ehâmo‐ŋarehuc basawec‐ŋopawec irec sâc buafec faio jaha imac‐ŋopahuc bâsirowec‐ŋopaocmu. Ehuc mâreŋ ro rauc eniŋte raʒiŋgopieŋ irecnec unuc‐ŋopame sipiricke‐fâreniŋmu. 64 Erâ wâc Wofuŋzia bâtâtiec‐ŋopame ŋicne ŋicne jaŋere ŋondeŋko siŋsaŋ qarâ juniŋmu, ehuc nemuɋâŋ jâc me qânâzi ba akic ekicne, i ŋoŋe mecne mamacfâc‐ŋeŋic mecne ŋoŋe mi manac‐jopambiŋ jaŋe hâcne kiŋaŋ qajareniŋmu. 65 Ehuc ŋicne ŋicne jaŋere ŋondeŋko ŋezu ŋewâneŋ mi ehuc hahata sasawa juniŋmu, ehame Wofuŋzi eŋareme buŋeŋic taŋtaŋ âeckeocmu â ʒâŋe‐ŋeŋic hâpoocmu erâ wâc maŋŋeŋic gâckeocmu. 66 Eme ŋoŋe juju‐ŋeŋicte manabâc ehuc ʒoaŋko â ŋafeo hâwic‐ŋopame juju‐ŋeŋicte mezac‐ŋopaocmu. 67 Ehame hâhâwiczi maŋŋeŋic fusucmaha ʒâŋe‐ŋeŋiczi wiac bipic tataranehec honerâ furicte ʒiŋuc muniŋmu: ‘Hae biac ŋafezac me!’ Me hae owâeme ʒiŋuc muniŋmu: ‘Hae biac furezac me!’ 68 Wiac iŋuc fua‐ŋare‐fâreha Wofuŋzi ʒuhuckerâ wokeo râec‐ŋopahuc Aigita mâreŋko bârisiec‐ŋopaocmu. E hata ira mi risie raniŋte mupaŋke‐ŋareweczi sifu râec‐ŋopame raniŋmu. Eme ŋoŋe ira moneŋte erâ râsifâc‐ŋeŋic jaŋere kiŋaŋ qaqa erâ juniŋte mupie sifu furi mi bacŋopaniŋmu.”