MITI MUMU ŊIC
Papia maŋnao dâŋ forakac irec dâŋ qizecne ʒiŋuc honeŋgopeneŋ: Mâreŋko wiac forakac â jurakac erâ hurerâ ro rauc erâ bajueŋgopeneŋ i fâri tâmiric sasawa. Dâŋ izi arecne 22 fuakac, erâ Mataio gaŋ 16:26 dâŋ fokac irec âgone ekac. Eme dâŋ wiac gâcne forakac izi qizecne â wâtuŋne i hâcne keteŋkehuc basanaŋkekac. Mâc Anutuzi wiac iŋucne nâre tahac eocmuo ine daŋge mumuteŋ ecnerâ bubiaŋ manahuc nâ bac enʒepeneŋ, qâreŋŋic e iŋuc mukac. E Anuture fuŋne mana taraocte emâmâŋkekac, erâ wiac sasawa fâri tâmiric ekac, mâreŋ â wiacte wiac â ŋic juju â eebapa‐nâŋecte fuŋne iŋuc hone tarahuc sifu Anutu mi bebehe eraoa qohotahuc jaha ʒiŋuc mukac: “Anutu e ŋic tiŋne â biaŋne bâfuac‐nâpowec, ehame ŋic nâŋâc ine mamana biri hatane fuŋne fuŋne bâfuaeŋgopeneŋ.” (7:29) Miti Mumu Ŋic papia irec ʒâŋe Miti Ɋârio mi fuakac â Anuture ʒâŋe “Wofuŋ” i papia maŋnao wâc basaŋgopeneŋ.
Papia qâreŋkewec qâreŋŋic ere ʒâŋe mi manaŋgopeneŋ. Mâc ʒiŋuc sawa honeŋgopeneŋ: E Salomozi maŋɋârâŋ dâŋ mu qâreŋ ewec ira iticnehuc papia‐ticne qâreŋkewec. Erâ papia tataranao ʒiŋuc woseŋgopeneŋ: Miti Mumu Ŋic e ŋic maŋɋârâŋhec juwecte ŋic ŋokac maŋɋârâŋ dâŋ jaha jaza qazuc ewec. Ine hâcne e maŋɋârâŋ dâŋ mumure qaqazu moc juwec.
Ŋic e mâreŋ sâko mâreŋ me irec fainao wiac forakac â jurakac irec mâretec manabâc ehuc juwec. Wiac sasawa i dameŋ‐ticnehec â mâreŋte temane â fâri tâmiric. E iŋuc manapaŋkehuc, Anuture micdâŋ â ŋic jaŋere juju hata mana‐fâreŋgopeneŋ, ŋic dâŋ iŋuc mueŋgopieŋ jaŋere dâŋ bawahaocte dâŋticne mu qâreŋ ewec hâcne.
Papia maŋnao dâŋ me binaŋ wiac ʒuʒuhuc moc mi fokac, aricne.
Dâkâne 1 Mi Mu 1—6 ira dâŋ forakac i gae wiac titinac sasawa.
Dâkâne 2 Mi Mu 7—12 irec maŋnao ine dâŋ wiac buc buc râe rakicne.
1
Wiac sasawa forakac i fâri tâmiric
1 Dawidire ŋokâ Miti Mumu Ŋiczi Jerusalem haeo ŋicwofuŋ juwec ere dâŋ ʒine hâcne.
2 Miti Mumu Ŋic e dâŋ kecʒiŋuc muwec: Wiacte wiac forakac i fâri tâmiric, â juju i wâc fâri tâmiric jaha. 3 Ŋoŋe mâreŋko juhuc gie ʒocnehec baeŋgopieŋ irec fârine wemo wiac mo bâfuaeŋgopieŋ? 4 Ŋic gaŋne gaŋne jaŋe fua omaec eeŋgopieŋ, â mâreŋ sâko mâreŋ e ine foweczi fohuc juekac jaha. 5 Ehame ʒoaŋzi huc wefuc eekac, ehuc mocwâc wefuocte wefuekacko risieekac. 6 Mâŋâŋ e juwic mâreŋkonec wefuekac erâ wâc faic mâreŋkonec wahaekac, iŋuc ehuc mâreŋ râreckehuc mocwâc risieekac. 7 Opâ sâko sasawa jaŋe hâwecko hueŋgopieŋ, ehame sifu hâweczi mi qâmbâriŋkeekac; erâ opâ jaŋe qizec‐jeŋicko risierâ mocwâc fuŋkerâ raeŋgopieŋ. 8 Ŋic nâŋâc wiac sasawa ebac ehuc docke betaŋ eeŋgopeneŋ, ehuc irec fuŋne munaŋte dâŋ basaeŋgopeneŋ. Ʒâŋe‐nâŋeczi wiac tatakic tâmiric honeekac â hazec‐nâŋeczi tatakic tâmiric dâŋ manaekac. 9 Wiac fuarâ fowec izia mocwâc fuarâ foocmu â wiac ebac ekicne ijaha mocwâc ebac eniŋmu; mâreŋko wiac furune moc mi fuaekac. 10 Irec wiac moc fuame honerâ ʒiŋuc sâcne muniŋmu: “Honec, wiac keci furune?” Aricne, i mârâc jaha jâmbâŋ, nâŋâc mi fuarâ juhapene biac fuarâ fowec hâcne. 11 Mimiŋnefâc‐nâŋec jaŋe juhapie wiac fuawec i moc mi manasueŋgopeneŋ iŋuc jaha ŋic jufenʒoŋgopieŋ me ʒiŋuczia jueŋgopeneŋ dameŋ ŋondeŋ irec maŋnao wiac fua raocmu i wâc mi manasunʒoŋgopieŋ.
Miti Mumu Ŋic wiac ebac ewec irec dâŋ
12 Miti Mumu Ŋic no Jerusalem haeo Israe ŋic jaŋere ŋicwofuŋ jupo. 13 Ehuc ŋic nâŋâc mâreŋko wiac sasawa ebac eeŋgopeneŋ irec fuŋne hone mana tarac epemurâ mamana gie sâko bahuc jupo. Manaŋgopieŋ, Anutu e ŋic nâŋâc gie munârewec i wiac ŋemâcne â ʒâic busâqoc‐ticnehec. 14 Ŋic nâŋâc mâreŋko wiac sasawa ebac eeŋgopeneŋ i hone‐fârepo, ehuc ʒiŋuc mana tarapo: I fâri tâmiric sasawa, mâŋâŋ mezi rorâ basanaŋkezo eipieŋgopeneŋ irec sâc. 15 Wiac hehesicne i bâbâpiaŋkenere sâc mi eekac, â wiac mi foha basahuc sâcne mi woseeŋgopeneŋ.
16 No maŋnanezi ʒiŋuc manapo: “No ŋic maŋɋârâŋ sâkohec jukopac, juwicnao Jerusalem haeo guriŋ bapa gie bahuc jumbiŋ ŋic i jaŋere sâc sirickehuc maŋɋârâŋhec jukopac hâcne. Irec no maŋɋârâŋ â mamana tara jahere fuŋne manakopac.” 17 No iŋuc manahuc maŋɋârâŋ â mamana tara erâ mutuc matacne irec fuŋne mana tarapemurâ gie sâko bahuc jupo. Ehuc ʒiŋuc mana tarapo: Gie i mâŋâŋ mezi rorâ basanaŋkezo eipieeŋgopeneŋ irec sâc jaha. 18 Maŋɋârâŋ fekicne fonâreocmuo ine mana mezac bocjaha enaŋmu, â mamana sâkohec junaŋmuo ine ʒâic busâqoc wâc boc mananaŋmu.