31
Ŋicwofuŋ mocte uŋsawaŋ dâŋ
1 Ŋicwofuŋ Lemue e neŋgoc‐ticnezi dâŋ kecʒiŋuc âzâcne qazuc ewec:
2 “Joroc ŋokâ‐nane, go nunumu‐nanere fârine hâcne, no wemo dâŋ moc gazapemu? 3 Go tâpirige sasec gieo mi qâmiezemec, â moneŋge i ŋokac jaŋerao mi sipirickezemec. Manakic, iŋucne jaŋe ŋicwofuŋ wâc sipiric‐jopambiŋ. 4 O Lemue, go manac: Ŋicwofuŋ jaŋe waiŋ opâ mi nânʒepieŋ, â opâ sanaŋ gâcne irec andac wâc mi enʒepieŋ. 5 Jaŋe opâ sanaŋ nâhuc sâcmutâc dâŋte nikec‐jopaekac, ehame ŋic qarâ suriŋne hone takirec‐jopaeŋgopieŋ. 6 Opâ sanaŋ i ŋic ʒâic sâko manahuc hâmozo eŋgopieŋ jaŋere biŋe. 7 Jaŋe hâcne nâhuc bawaha qaqane â busâqoc faio jueŋgopieŋ irec nikec‐jopazejec.
8 “Go ŋic nâŋguŋne â ba bititicne jaŋere dâŋ muhuc bafic‐jopazemec. 9 Go jaŋe bafic‐jopahuc dâŋjeŋic mutiŋnezemec, ehuc ŋic waha qaqane â qarâ suriŋne jaŋere dâŋ fâretiŋ jaha muhuc dopec‐jopazemec.”
Ŋokac biaŋnere dâŋ
10 Mozi ŋokac biaŋne moc sâcne bâfuaocmu? Ŋokac biaŋne moc e qânâ furi sâko irec sâc sirickeekac.
11 Ehame ŋowe‐ticnezi erao roweckerâ juhuc batac qatac mi eocmu.
12 Ŋokac iŋucne e jufeekac sâc ŋowe‐ticne busâqoc moc mi bâfuacnehuc biaŋne jauŋkehuc juekac.
13 E qâoma moc mi ehuc he fufu â ŋaqi qoruc ɋâɋâtâ gie ʒuʒuhuc jaha baekac.
14 E mafa woke iŋucne nânâ wiac mâreŋ ʒorickonec rome fisiekac.
15 E furic qârurure faharerâ wiacfâc‐ticne jaŋere nânâ rike bâmoc ehuc kiŋaŋ narufâcne giedâŋ mujareekac.
16 E gie hehe mâreŋ moc honerâ e jahac gie bahuc moneŋ hotâckeekac izi furine baocmu.
17 E gie ʒoɋac sasanaŋhec baekac.
18 E wiac ebac ehuc irec maname fârine sasawa eekac, ehame gie bahuc juhame ŋafe ʒâŋiŋkeekac.
19 E he fuocte muc jâmume feekac.
20 E ŋic hapetac â qarâ suriŋne jauŋ bacjopaekac.
21 E wiacfâcne jaŋere ʒoc bocjaha roekacte mâmâteŋ dameŋko jaŋere mana mezac mi eekac.
22 E fofo baekac, erâ wâc ŋaqi qoruc‐ticne ɋâtâekac.
23 Iŋuc eme ŋowe‐ticne e ʒâŋe biŋehec ehuc ŋic micne juekac.
24 Ŋokac e maŋguc â hewiac furâ nareŋ gareŋ tomao furire râeekac.
25 E sasanaŋhec jume ŋic jaŋe manacnepie fefene eekac, â juku ʒâhec wiac fuaocmu irec mi hâwickeekac.
26 E micticnaonec maŋɋârâŋ â âgo miriŋ dâŋ sawa wahaekac.
27 E dameŋ sâc gie ʒoɋachec bahuc wiacfâcne jaŋe hone bafic ejareekac.
28 Ehame naru motecfâcne jaŋe manacnepie fefene eha ŋowe‐ticnezi mumbiaŋkeekac.
29 Ehuc ʒiŋuc âzâcneekac: “Ŋokac gâcne jaŋe biaŋne jaha, goki ine jaŋere sâc sirickehuc biaŋne jâmbâŋ jukomec.”
30 Sahaczi babanic i eatuc‐ticnehec â sahac hawari biaŋne i oomaene, ŋokac moc Wofuŋ araŋ bacnehuc juocmu e ine mumbiaŋkezo.
31 E gie‐ticne sasawa baekac irec furine rozejec, ehame ŋic ŋokac jaŋe ʒeŋgoma muac baafec ecnenʒepieŋ.