1 Juku ʒâhec ine ŋicwofuŋ Ahasiwero aaric‐ticne fâre wahame Wasitizi mâsi ewec irec mecne â mumupaŋ dâŋticne weniŋuc mukicne irec mâmâc manasuwec. 2 Iŋuc eme kiŋaŋ qaqafâcne jaŋe ʒiŋuc âzâcnembiŋ: “Ŋicwofuŋ, go mutec naru ʒeŋoŋ hawari biaŋ bâwosâec‐jopapie gore biŋe junʒepieŋ. 3 Erâ gokizia uucmaŋgere mâreŋ dâkâne dâkâne forakac irec ŋic micne mucjopatec jaŋe naru ʒeŋoŋ hawari biaŋ hâcne bâtumaŋ‐joparâ hae qizec Susa ira ŋokacficko guruc‐jopanʒepieŋ. Ehuc ŋicwofuŋte ŋic fekicne Hegai ere meo râec‐jopanʒepieŋ. Eki hâcne ŋokac soŋaŋ jukac. 4 Ehame ŋokac ʒeŋoŋ e me e manacnetec sâckeha Wasitire okacne ŋokac wofuŋ âkendâŋnezemec.” Dâŋ iŋuc mupie ŋicwofuŋzi maname biaŋkeha iŋuc ewec.

5 Eme Susa hae qizec ira Benjamiŋte guruonec Judaŋic moc juwec ʒâŋene Morodekai; e Jairi ere ŋokâ, Jairi e ine Simeire ŋokâ â Simeizi Kisire ŋokâ. 6 Morodekai e Babe ŋicwofuŋ Nebukanezazi Juda ŋic ŋokac â ŋicwofuŋ‐jeŋic Jekonia kâpâcwâruo bacjopa rawec dameŋ ira Jerusalem haeonec mâmâc barakicne. 7 Ŋic eki mamac pitic‐ticnere otâ Hadasa, Esite hâcne, e bekâ juwecte gume jowac ecneha sokawec. Naru e sahac hawari‐ticne biaŋne â gâjoŋ sereŋ. Neŋgoc mamac jahec‐ticne hâmopire Morodekaizi rorâ e jahacne otâ iŋucne bajuwec. 8 Eme ŋicwofuŋ e sâcmutâc dâŋticne râeme rame naru ʒeŋoŋ bocjaha bâtumaŋ‐joparâ Susa hae qizecko Hegaire meo râec‐jopambiŋ dameŋ ira Esite mâmâc ŋicwofuŋte ficko jowa rarâ ŋokac soŋaŋ juwec ere meoa râembiŋ. 9 Hegai e ine naru ere maname biaŋkewec â sâckewec. Irec e wokemaŋ âsu biaŋ â nânâ wiac biaŋne afeckerâ râcnehuc kiŋaŋ narufâcne 7 ŋicwofuŋte fickonec bâwosâec‐joparâ râcnewec. Erâ naru e jahacne â kiŋaŋ narufâcne jaŋe ŋokacfic maŋne biaŋnao râec‐jopawec wâc. 10 Esite e Morodekaizi mic muac ecnewecte e jahacne âgo soctofafâc‐ticne â qomâfâc‐ticne mi mufuac‐jopawec. 11 Morodekai eki ine Esite weniŋuc ehuc jukac irec fuŋne manaocte ʒoaŋne ʒoaŋne ŋokacficte hae ʒoŋao rac warec ehuc juwec.

12 Naru ʒeŋoŋ rocjopa jumbieŋ jaŋe sahac eemasaŋ gie bahuc juhapie mosa 12 tara jujec. Mosa 6 irec maŋnao saife âsu â wokemaŋ rua jumbieŋ â mosa 6 ira ine tokic â huc âsu rua jumbieŋ. Eme juku gie i tarame ŋicwofuŋ Ahasiwerore maio buc buc fuaniŋte dameŋ maicke jujec. 13 Ehame naru moc e ŋokacfickonec wiac i me i barazo mume manacne jumbieŋ. 14 Eme naru jaŋe owâcne ŋicwofuŋte ficko fejumbieŋ â furicte ine mocwâc waha jumbieŋ. Waharâ ine ŋokacfic moc ŋicwofuŋ ŋokacfâc‐ticne mamare jumbieŋ ira rajumbieŋ. Ŋokac i jaŋe ine ŋicwofuŋte ŋic fekicne Sasigaʒezi soŋaŋ‐jopahuc juwec. Ehame naru jaŋe ŋicwofuŋtao kosa mocwâc mi rajumbieŋ, e jahac mana‐jareme biaŋkeha ʒâŋe‐jeŋic muhuc hefârec‐jopame sâc ficticnao fejumbieŋ.

15 Juku Morodekai e mamac pitic‐ticne Ahibai ere otâ Esite hâcne, e jahacne otâ fuŋfuŋ tinac bajuwec e ŋicwofuŋtao feocte dameŋ‐ticne maickewec. Eme Esite e maŋticnere wiac i me i ŋicwofuŋ ficko bafeocte mi muwec, mâc ŋicwofuŋte fekicne ŋokac soŋaŋ juwec, Hegai hâcne, eki âzâcnewec irec sâc sawa bafewec. Ehame Esite honembiŋ ŋic ŋokac i jaŋe sasawa manacnepie biaŋkewec. 16 Eme ŋicwofuŋ Ahasiwero e guriŋ bapa gie bahuc jume jare 7 eha mosa 10, Tebeti mosa hâcne, ira Esite ŋicwofuŋte ficko jowa fembiŋ. 17 Eme ŋicwofuŋ e ŋokac gâcne jaŋere aŋackewec irec sâc sirickehuc Esitere boc ecnewec; ehuc naru ʒeŋoŋ gâcne jaŋere maname wawahane eha Esitere maname fefene ewec. Irec ehâmocnehuc eri hendiŋ qizecnao hecneme hume Wasitire âkehoc ŋokac wofuŋ âkendâŋnewec. 18 Ŋicwofuŋ e iŋuc erâ Esite sâsehuc fekicne â kiŋaŋŋicfâc‐ticne jaŋere tiwâ bâzi sâko moc qame fisiwec. Ehuc mume mâreŋ‐ticne dâkâne dâkâne forawec ira hombaŋ ŋehapie ŋicwofuŋzi bubiaŋ wiac aameo jarewec.

19 Eme naru ʒeŋoŋ mocwâc hefârec‐jopapie arecne jajahec ewec dameŋ ira Morodekaizi ŋicwofuŋ fic motâcko ŋewec. 20 Esite eki ine Morodekaizi mutâcnecnewec irec sâc ehuc âgo soctofafâc‐ticne â qomâfâc‐ticne mi mufuac‐jopawec. E juwicnao Morodekaihec juhuc micticne reŋke jujec irec sâc jaha reŋkewec. 21 Eme Morodekai e ŋicwofuŋ ficte motâcko ŋewec dameŋ ira ŋic fekicne jajahec, Bigita â Teresi, jahe motâc soŋaŋ jupiczi aaric‐jofame ŋicwofuŋ Ahasiwero qâhâmozo mupic. 22 Ehame dâŋjekic i Morodekaire hazecko hume ŋokac wofuŋ Esite âzâcnewec, eme Esite e Morodekaire micte ŋicwofuŋ mufuacnewec. 23 Eme dâŋ irec fuŋne bataniŋkerâ honepie fârine eme ŋic jahe jâcko bituac‐jofambiŋ. Erâ irec dâŋ i ŋicwofuŋte maio Binaŋ Qâhâc papia qizecko qâreŋkembiŋ.