ESITE
Papia qizec irec maŋnao Juda ŋokac moc ere binaŋ qâreŋkekicne fokac, ŋokac ʒâŋene Esite. Ŋokac e Juda mâreŋko mâcne, Perisia mâreŋko juwec. E Juda ŋokaczi Judaŋic âgofâc‐ticne jaŋehec mâreŋ ira kâpâcwâru juwec hâcne.
Eme binaŋ‐ticne râekicne fokac i gâcne manapene boc mi biaŋkekac. Erâ Anuture ʒâŋe me dâŋ i papia irec maŋnao wâc mi fuakac. Dâŋ gâcne izi mâc Judaŋic sahackopec eebapa‐jeŋicte mumuteŋ dâŋ ekac. Ehame Judaŋic jaŋe mâsi wiac gâcne embiŋ i honepene qâpuc mâsi erâ mamakâcne ekac.
Gaŋne gaŋne dâŋ forakac ine kecʒiŋuc:
Esi 1—2. Ira Perisia ŋicwofuŋ Ahasiwero e Susa haeo juhuc ŋonâŋ‐ticne ʒâŋene Wasiti e qaqatara‐ticnere erâ qaisockehuc jâperâ Juda ŋokac, Esite hâcne e ŋonâŋ‐ticne rowec, irec dâŋ fokac.
Esi 3. Irec maŋnao dâŋ â binaŋ kecʒiŋuc qâreŋkekicne fokac: Ŋicwofuŋte micne sâko Hamaŋ e â micne âgofâc‐ticne jaŋe Judaŋic râsi mâretec ejarerâ bomac‐jopahuc bocjaha qâhâmoc‐jopaniŋte mumupaŋ râembiŋ.
Esi 4—8. Esite e Judaŋic âgofâc‐ticne jaŋere busâqoc manahuc ŋicwofuŋ ŋowe‐ticne e mumupaŋ i bârârieocte, erâ micne sâko‐ticne wâc beheocte mu qafeŋ ecnewec. Erâ i sawa mâcne, micne sâko ere âkehoc ine Judaŋic Morodekai e micne âkendâŋneocte âzâcnewec. Iŋuc ecnekume ŋicwofuŋzi ŋonâŋ‐ticnere dâŋ manahuc micne‐ticne Hamaŋ beherâ ere âkehoc Morodekai micne âkendâŋnewec. Erâ mumupaŋ dâŋ râekicne i wâc mâmâc bârâriewec. Iŋuc eme Judaŋic jaŋe tâpirihec erâ okac babazu gie bambiŋ. Ehuc Hamaŋ bituambiŋ â Perisia ŋic bocjaha jâmbâŋ qâhâmoc‐jopambiŋ. Iŋuc fuame Judaŋic jaŋe rambaŋ juhuc ʒeri sâko embiŋ. Erâ juku ʒâhec wiac irec manasuhuc jarane jarane hombaŋ‐ticne ŋejumbieŋ. Hombaŋ ʒâŋene ine Purim mumbiŋ.
1
Ŋokac wofuŋ Wasitizi ŋicwofuŋte dâŋ qatarawec
1 Wiac kecʒirec binaŋ bakicne i Ahasiwerozi India mâreŋkonec fuŋkerâ raku Etiopia mâreŋko tarakac, mâreŋ ŋondeŋ ira mâreŋ dâkâne dâkâne 127 forawec irec ŋicwofuŋ juha fuawec. 2 Ŋicwofuŋ Ahasiwero e dameŋ ira hae qizec‐ticne Susa ira juhuc ŋicwofuŋ gie bawec. 3 Bahuc jume jara jahec â moc eha fekicnefâc‐ticne â kiŋaŋ qaqafâc‐ticne erâ Perisia â Mede mâreŋkonec momori micne â mâreŋ dâkâne gâcne irec soŋaŋ micne jaŋe tiwâ bâzi qajareme fisiwec. 4 Ehame uucmaŋ‐ticnere moneŋ mafa â ŋicwofuŋ juju‐ticnere wiac furi sâko erâ eri qaraweŋ i jowatuhuc juhame ʒoaŋ gie bapa 180 tarawec. 5 Tarame ŋicwofuŋ e hae qizec‐ticne Susa ira ŋic jufârembiŋ, fekicne â wahakicne jaŋere tiwâ bâzi moc ficticnere hae ʒoŋao qame fisiwec. Eme nâhuc juhapie ʒoaŋ gie bapa 7 tarawec. 6 Hae ʒoŋare qoruc ââketâc qaŋqaŋ â keŋkeŋne i muc hahameŋne â âmuc âmucne izi finʒuŋ siliwazi bakicne ira basanaŋkerâ qânâ wâtuŋko ɋetickembiŋ, ehuc fofo wiac gol â siliwazia bakicne i qânâ fuŋne fuŋne furi sâkozi hata bakicne irec qaŋeŋnao hepie ŋewec. 7 Waiŋ opâ ine tase hawarine fuŋne fuŋne ira hoŋkepie hume jarembiŋ; waiŋ opâ i ŋicwofuŋ e rowaŋ‐ticnao bocjaha focnewecte buafec jaha jare gumec eme nâ gapec embiŋ. 8 Ŋicwofuŋ e ŋic jaŋe aŋac‐jeŋicte sâc sawa waiŋ opâ nâniŋte manasuhuc kiŋaŋ qaqafâcne sâcmutâc ejareme irec sâcko jarehuc ʒoɋac moc mi ejarembiŋ. 9 Eme ŋokac wofuŋ Wasiti e wâc iŋuc jaha ŋicwofuŋ Ahasiwero erific‐ticnao ŋokac jaŋere tiwâ bâzi moc qame fisiwec.
10-11 Ʒoaŋ gie bapa 7 ira ine waiŋ opâzi ŋicwofuŋ maŋticne bâsifuckeme ʒeri ehuc kiŋaŋ qaqafâc‐ticne fekicne Mehumaŋ, Bireta, Harebona, Bigita, Abagita, Setari â Karikasi jaŋe ŋokac wofuŋ Wasiti e eridu‐ticnehec ŋicwofuŋte maio jowa wareniŋte mutâcne‐jarewec. Ŋokac e sahac hawari‐ticne biaŋne, irec ŋicwofuŋzi ŋic ŋokac jowatuocte manasuwec. 12 Eme ŋokac wofuŋ Wasiti eki ine kiŋaŋ qaqa ŋic fekicne jaŋe ŋicwofuŋte dâŋ âzâcnepie qatarawec. Iŋuc eme ŋicwofuŋ e maŋʒoc‐ticne fuame aaricke sâqorewec.
13 Eme ŋicwofuŋ e sâcmutâc dâŋ â ŋic ŋokac eebapa‐jeŋicte fuŋne manambiŋ ŋic i jaŋe mu wioc ejare jujec, irec sâc jaha mamana ŋicfâc‐ticne dameŋte fuŋne mana jumbieŋ jaŋe mu wioc ejarewec. 14 Dameŋ ira ŋicwofuŋte maŋfuŋko Perisia â Mede mâreŋkonec mamana ŋic fekicne 7 kecʒiŋuc jaŋe jumbiŋ: Karasena, Setari, Adamata, Tarasisi, Meresi, Maresena erâ Memukaŋ. Jaŋe hâcne ŋicwofuŋ uucmaŋ‐ticnere ŋic fekicne juhuc ŋicwofuŋ iqicke jumbieŋ. Irec jaŋe kecʒiŋuc muhuc wio‐jarewec: 15 “Ŋokac wofuŋ Wasiti e ŋic fekicne jaŋe ŋicwofuŋ Ahasiwero nore dâŋ âzâcnepie qatarawec, irec e weniŋuc ecnehuc sâcmutâc dâŋnâŋecte sâcko bâtiŋnenaŋmu?” 16 Iŋuc wio‐jareme Memukaŋ e ŋicwofuŋ â ŋic fekicne jaŋere maio kecʒiŋuc muwec: “Ŋokac wofuŋ Wasiti e ŋicwofuŋ sawa mâcne, ŋic fekicne â ŋic gâcne sasawa ŋicwofuŋ Ahasiwero uucmaŋ‐ticnao jufâreŋgopieŋ jaŋe mâmâc bawahac‐jopawec. 17 Ŋokac wofuŋzi mâsi ewec i ŋokac sasawa jaŋe mana‐fâreniŋmu, ehuc ŋowefâc‐jeŋic jaŋere manapie wawahane eha ʒiŋuc muniŋmu hâcne: ‘Ŋicwofuŋ Ahasiwero e ŋokac wofuŋ Wasitizi mai‐ticnao fuaocte mume dâŋticne qatarawec.’ 18 Irec Perisia â Mede ŋokac fekicne jaŋe miŋecgac jaha ŋokac wofuŋzi mâsi ewec irec biŋe manarâ ŋic fekicne dâŋbinaŋ ejarehuc mana wahac‐jopapie aaric boc fuaocmu. 19 Irec ŋicwofuŋ, go manatec sâckekacko ine Perisia â Medeŋic jaŋere sâcmutâc fokac, sâcmutâc sanaŋ iŋucne moc kecʒiŋuc muhuc hae sâc râetec razejec: Wasiti e ŋicwofuŋ Ahasiwero nore maio mocwâc mi fuazejec. Go iŋuc erâ ŋokac biaŋne moc ŋeŋetac‐ticnao âkendâŋnetec ŋokac wofuŋ erâ juzejec. 20 Erâ ŋicwofuŋ go sâcmutâc râetec rarâ uucmaŋge sâcke‐fâreme ŋokac sasawa jaŋe manarâ ŋowefâc‐jeŋic fekicne â wahakicne mâmâc sâsec‐jopa‐fârenʒepieŋ.” 21 Eme ŋicwofuŋ â fekicnefâc‐ticne jaŋe dâŋ i manarâ bubiaŋ manambiŋ, ehuc ŋicwofuŋ e Memukaŋzi dâŋ muwec irec sâc ewec. 22 Ehuc mâreŋ‐ticnere dâkâne sasawa ira papia râeme rafârewec. Ine mâreŋ dâkâne dâkâne qâreŋ hawari‐jeŋic forawec â ŋic ŋokac dâŋmarac‐jeŋicte sâcko râeme rawec, i ŋic sasawa jaŋe ficjeŋicte micne juhuc ŋokacfâc‐jeŋic jaŋere dâŋ mutaraniŋte iŋuc ewec.