1 Eme ʒoaŋ ira jaŋe Mosere papia qizec i ŋic ŋokac wose‐jarembiŋ. Ehuc dâŋ ʒiŋuc qâreŋkekicne i bâfuambiŋ: Amoŋŋic me Moabi ŋic moczi Anuture kikefuŋko moc mi raʒi‐jâmbâŋkezejec. 2 Jaŋe Israe ŋic nânâ opâ mi bâmocke‐jarehuc Bileam furi râcnepie eki sâwec‐jopawec. Erâ sifu Anutu‐nâŋeczi sâwec i hetikieme jambuŋ ewec. 3 Eme ŋic ŋokac jaŋe sâcmutâc i manarâ ŋic jaba jaŋeraonec fua sawec embiŋ jaŋe Israe guruonec bâtâc bacjopambiŋ.

4 Eme irec juwicnao ine taha bapa Eliasibi e Anuture ufuŋ maŋne maŋne i hone soŋaŋ eocte âkendâŋnekicne, erâ e Tobiahec ʒuʒuhuc‐ticne fowec. 5 Irec e mârâc nânâ bâzi â wiac âsu biaŋ furi sâko â kuʒi râqâc erâ jacgoŋ â waiŋ â wokemaŋ taha wiac i sâcmutâc sanaŋte sâcko Lewiŋic â gae hehe ŋic â motâc soŋaŋ jaŋere biŋe, erâ taha bapa jaŋere biŋe taha râekicne guruckepie ŋewec ficmaŋ kâcɋene i Tobia baʒawiecnewec. 6 No wiac i fuahuc fowec dameŋ ira Jerusalem haeo mi jupo. Babe ŋicwofuŋ Arataʒeʒe e ŋicwofuŋ gie‐ticne bahuc juha jara 32 ewec dameŋ ira erao risiepo. Erâ piticne juferâ ŋicwofuŋzi mana‐nareme mocwâc risiepemurâ numucnepo. 7 Eme Jerusalem haeo fisirâ ine Eliasibizi mâsi repicne kecʒiŋuc eme honepo: E Anuture ufuŋte hae ʒoŋao ficmaŋ moc Tobiare biŋe baʒawiewec. 8 Iŋuc honerâ aaricnu sâqoreme Tobiare ŋeŋe wiac i ficmaŋkonec rorâ sârockepe sahacnao hufârewec. 9 Iŋuc erâ ŋic ejarepe ficmaŋ i emasaŋkembiŋ. Eme no Anuture ufuŋte kuʒi râqâc wiac â nânâ bâzi erâ wiac âsu biaŋ furi sâko i mocwâc bârisierâ ira râepo.

10 Eme Lewiŋic jaŋere nânâ biŋe mi jarekicne i wâc honepo. Jaŋe iŋuc epie Lewiŋic â gae hehe ŋic jaŋe gie bahuc jumbiŋ i hetararâ hesarac mâreŋ‐jeŋic sâc wiserâ rambiŋ. 11 Eme no irec micne jaŋere manape sâqoreme ʒiŋuc mupo: “Anuture ufuŋ i wemocte râpeckekicne?” Iŋuc murâ hetumaŋ‐joparâ dodoma‐jeŋic sâc râec‐jopa rapo. 12 Ehame Judaŋic jaŋe jacgoŋ â waiŋ â wokemaŋ teŋkonec wâŋ i rowaŋficko bafisi râembiŋ. 13 Eme no rowaŋficte moneŋ soŋaŋ taha bapa Selemia â qâqâreŋ ŋic Zadoko â Lewi guruonec Pedaja, iŋuc âkendâŋ‐jopapo. Erâ jaŋere manape sâckeme babafic‐jeŋic ine Ʒakurure ŋokâ Matania ŋosa‐ticne Hanaŋ e hâcne râepo. Eme qomâfâc‐jeŋic wiac kâdoc qaqa‐jare izi gie‐jeŋic ewec. 14 O Anutu‐nane, go wiac ʒirec erâ manasucnuc, ehuc no gore ufuŋte â giere eehâmo gie bapo i mi bârârâŋnec.

15 Eme no dameŋ ira Judaŋic jaŋe sabata hombaŋko waiŋ âte pisickepie honec‐jopapo, erâ jacgoŋ ropie gurune gurune feme doŋgi faio râembiŋ. Erâ wâc waiŋ opâne â hândâŋne â jâmbo hândâŋ erâ tagi fuŋne fuŋne i mâmâc sabata hombaŋko Jerusalem haeo bafisimbiŋ. Eme no nânâ furi bapa gie bambiŋ ʒoaŋ ira uŋ jazapo. 16 Eme Tiro mâreŋkonec ŋic Jerusalem haeo jumbiŋ jaŋe wâc hâwec qowi â wiac fuŋne fuŋne bambiŋ i sabata hombaŋkoa Jerusalem haeo Judaŋic jaŋerao bafisipie furine bambiŋ. 17 Jaŋe iŋuc epie no Judaŋic fekicne jaŋere manape sâqoreme dâŋ ʒiŋuc mujarepo: “Ŋoŋe wemocte sabata hombaŋ sipirickehuc mâsi repicne ʒi eŋgopieŋ? 18 Apa ŋosafâc‐ŋeŋic jaŋe mâsi ijaha embiŋ. Ehame Anutu‐nâŋeczi hae ʒira wiac hâhâwicne ʒi bâfuahuc fai‐nâŋecko râewec. Ehame ŋoŋe sifu sabata hombaŋ sipirickehuc Anutu kimbeŋ‐ticnere ʒocbâruŋ hâhâwicne jâmbâŋzi Israe ŋic fai‐nâŋecko feocte muŋgopieŋ me?”

19 Eme sabata hombaŋ maickehame hae ŋafezo ewec dameŋ ira Jerusalem haesac motâc hepie hehe jaha fohame juku sabata hombaŋ taraocte mujarepo. Ehuc sabata hombaŋko tagi wiac moc mi bafisiniŋte kiŋaŋ qaqafâc‐nane gâcne motâcne motâcne ira soŋaŋ râec‐jopapo. 20 Ehame wiac fuŋne fuŋne irec furi bapa â nareŋ gareŋ ŋic jaŋe arec mocjaha me jajahec Jerusalem haesac râpeo fombiŋ. 21 Eme no uŋdâŋ jazahuc ʒiŋuc mupo: “Ŋoŋe wemocte haesac fuŋnao ŋec foc eŋgopieŋ? Ŋoŋe mâsi keci mocwâc epie dâŋgieo râec‐ŋopapemu.” No iŋuc ejarepe jaŋe sabata hombaŋko fifisi i behe sanaŋkembiŋ. 22 Eme no Lewiŋic jaŋe eemasaŋ gie barâ fisi motâc soŋaŋkehapie sabata hombaŋzi tiri foocte mujarepo. O Anutu‐nane, go irec wâc manasu‐narehuc aki anonocge ɋârâŋnea fokac irec sâcko akicnuc.

23 Eme no dameŋ ira Judaŋic jaŋe Asidode, Amoŋ â Moabi ŋokac rocjopambiŋ i wâc honec‐jopapo. 24 Eme naru motecfâc‐jeŋic dâkâne jaŋe Asidode dâŋ mumbiŋ. Ine hâcne, jaŋe ŋicne ŋicne jaŋere dâŋ muhuc Judadâŋ sâcne mi mumbiŋ. 25 Iŋuc epie no mana sâqore‐jarerâ sâwec‐jopahuc gâcne jopapo, ehuc qizec susuc‐jeŋic unuckepo. Erâ ejarepe kecʒiŋuc muhuc Anuture ʒâŋeo mujomirembiŋ: “Nâŋe otâfâc‐nâŋec jaŋe jaŋere ŋokâfâc mi jarenaŋmu, â ŋokâfâc‐nâŋec me nâŋe nâŋâcne biŋe jaŋere otâfâc wâc mi rocjopanaŋmu. 26 Israe ŋicwofuŋ Salomo e ŋokac iŋucne jaŋerao hâcne sâqorewec. Ŋic gurune gurune jaŋerao ŋicwofuŋ e iŋucne moc mi jumbiŋ, e Anutu‐ticnezi hone aŋac ecnehuc Israe ŋic qaŋeŋ‐joparâ juocte ŋicwofuŋ âkendâŋnewec. Erâ sifu ŋokac jabane jaŋe e wâc ecnepie sâqorewec. 27 Irec nâŋe ŋokac jabane rocjoparâ eebapa repic qapicne ʒi ehuc Anutu‐nâŋec bunao mocwâc mi banʒepeneŋ.”

28 Eme taha bapa fekicne Eliasibire ŋokâ Jojadare ŋokâfâc jaŋeraonec moczi Horoni ŋic Saŋbalatire kimo juwec. Irec e jâpepe rawec. 29 O Anutu‐nane, jaŋe taha bapa juju erâ taha bapa â Lewiŋic jaŋehec ʒâʒâfic ekicne i bâbiembiŋ, go irec manasuhuc okacne jarezemec.

30 No iŋuc ehuc wiac jabane sasawa irecnec bâfiriec‐jopapo, erâ taha bapa â Lewiŋic jaŋere gie biricke‐hâmorâ ŋic buc buc gie‐jeŋicko râec‐jopapo. 31 Iŋuc erâ no tahare biŋe ʒoc â jâcfâri bâsukicne i bafisiniŋte ʒâfo wâc bajarepo. O Anutu‐nane, go irec wâc mâmâc manasuhuc ehâmo‐narezemec.