40
Tiri boze mutirimbiŋ
Eme Wofuŋzi Mose kecʒiŋuc âzâcnewec: “Fufuŋke mosare ʒoaŋ gie bapa namba wâŋ ira tiri boze, tutumaŋ qoruc boze hâcne wisetec huzejec. Ehame qorac tapa katapa i maŋnao hetec ŋeha qoruc ââketâczi sâockezejec. Erâ tebo iŋuc jaha boze maŋnao hetec ŋeha fainao poroŋ furu mukicne i râe biric ezemec, â lambe dodoma wâc baferâ lambe wiac‐ticne âkendâŋnezemec. Erâ hosâc âsu ririkere alata golzi bakicne i qorac tapa katapa maŋfuŋnao hetec ŋeha tiri boze motâcte qoruc ââketâc ɋetickezemec. Qowi bâzi ririkere alata ine tutumaŋ qoruc bozere motâc fuŋnao hetec ŋezejec. Ʒuʒure râqâc sâko ine tutumaŋ qoruc boze â alata ŋondeŋ‐jekicko hetec ŋeha opâ qatec huzejec. Erâ rârec rârec hae ʒoŋare sac bafârehuc motâc‐ticnere qoruc ɋetickezemec. Izi rurua wokemaŋ rorâ tiri boze â maŋnao wiac ŋerakac sasawa i ruacnetec tiri ŋezejec. 10 Qowi bâzi ririkere alata â gie bapare wiac‐ticne sasawa i iŋuc jaha wokemaŋ ruacnehuc bâtirizemec, eme alatazi tiri jâmbâŋ ŋezejec. 11 Erâ ʒuʒure râqâc â kikene i iŋuc jaha wâc wokemaŋ ruacnehuc bâtirizemec. 12 Iŋuc erâ Aroŋ â ŋokâfâcne ejaretec ware tutumaŋ qoruc bozere motâcko domahapie opâ rua‐jarezemec. 13 Erâ Aroŋ tiri ŋaqi‐ticne hecnetec hume wokemaŋ ruacnehuc mufirietecne taha bapa‐nane erâ juzejec. 14 Eme ŋokâfâcne jaŋe wâc mutec ware domahapie ŋaqi ʒora hejaretec huzejec. 15 Eme mamac‐jeŋic wokemaŋ ruacnecmu iŋuc jaha jaŋe wokemaŋ rua‐jaretec taha bapafâc‐nane erâ junʒepieŋ. Eme wokemaŋ rua‐jarehuc mimiŋzi ɋâric taha bapa gie forahuc juocte mutara‐jarezemec.”
16 Eme Mose e Wofuŋzi mutâcnecnewec irec sâcko jâmbâŋ wiac efârewec. 17 Eme jara namba 2 irec fufuŋke mosare ʒoaŋ gie bapa wâŋ ira tiri boze wiseme huwec. 18 Mose e tiri boze ʒiŋuc ehuc bafaharewec: Râqâc wiac‐ticne heme ŋeha katapa âkendâŋnewec, erâ babasanaŋ‐ticne râerâ wâtuŋ bâfeŋnewec. 19 Eme tiri boze bupunere qoruc fâreme sâcke‐fârewec, erâ fainao bupu sâsâc‐ticne i Wofuŋzi Mose âzâcnewec irec sâcko qaratiewec. 20 Izi ine Sâcmutâc Sanaŋ qorac tapa katapa maŋnao râeme huwec, erâ reŋ i fofonao esorieme raʒiwec, eme tapa‐ticne qorac tapa katapa fainao heme ŋewec. 21 Eme qorac tapa katapa i tiri bozeo baferâ qoruc ââketâc ɋetickeme qorac tapa katapa sâockewec. Wofuŋzi Mose âzâcnewec irec sâcko ewec hâcne. 22 Erâ tebo i tutumaŋ qoruc boze ira faic mâreŋkopec qoruc ââketâc sahacnao heme ŋewec. 23 Ŋehame fainao poroŋ furu mukicne i Wofuŋte maio râe biric ewec, i Wofuŋzi Mose dâŋ âzâcne mutâc ewec irec sâcko jaha ewec. 24 Izi lambe dodoma i tiri boze juwic mâreŋkopec ira tutumaŋ qoruc bozeo tebo ŋifecnao heme ŋewec. 25 Erâ Wofuŋzi Mose âzâcne mutâc ewec irec sâcko lambe wiac‐ticne i wâc Wofuŋte maio âkendâŋnewec. 26 Eme alata golzi bakicne i tutumaŋ qoruc bozeo ââketâc qoruc heririŋnao heme ŋewec. 27 Ehame wiac âsu biaŋzi hosâc âsu rikewec, i Wofuŋzi Mose mutâcnecnewec irec sâcko ewec. 28 Ehuc tiri bozere motâcko qoruc ɋetickewec. 29 Qowi bâzi ririkere alata i ine tiri boze motâcnao heme ŋeha fainao qowi bâzi rikewec â taha bawec. Wofuŋzi Mose dâŋ âzâcnewec irec sâcko ewec hâcne. 30 Eme wiac ʒuʒure râqâc i tutumaŋ qoruc boze â alata ŋondeŋ‐jekicko heme ŋeha opâ qame huwec. 31 Eme Mose mecne â Aroŋ â ŋokâfâcne mecne jaŋe ira me kike‐jeŋic ʒure jumbieŋ. 32 Ine tutumaŋ qoruc boze raʒimbiŋ sâc me alata maickembiŋ sâc iŋuc ejumbieŋ hâcne. I Wofuŋzi Mose âzâcne mutâc ewec irec sâcko embiŋ. 33 Wiac i tara‐fâreme tiri boze â alata rârec rârec hae ʒoŋa bafârewec. Ehuc hae ʒoŋa motâc irec qoruc ɋetickewec. Mose e iŋuc ehuc gie batarawec hâcne.
Karoraczi tiri boze qofackewec
(Ʒar 9:15–23)
34 Eme karoraczi tutumaŋ qoruc boze qofackewec, ehame Wofuŋte tatamaczi tiri boze fusucmawec. 35 Eme karoraczi tutumaŋ qoruc boze qofackehuc fowecte â Wofuŋte eri tatamaczi tiri boze fusucmawecte Mose e ira wemocko moc raʒizac. 36 Eme Israe ŋicguru jaŋe mâreŋ sawao jumbiŋko karoraczi tiri bozeonec fewec sâc hata‐jeŋic ʒuhuckerâ rajumbieŋ. 37 Karoraczi mi fahareme ine jaŋe mi rara fahareocte mâc woŋec jujumbieŋ. 38 Ʒoaŋko Wofuŋte karoraczi tiri boze qofackerâ fowec hâcne, â ŋafeo ine Israe ŋicguru ʒeŋgoma jaŋere maio ʒocbâruŋ tinac bâruŋkewec. I mâreŋ sawao juhapie iŋuc hâcne fua jujec.