TAHA BAPARE SÂCMUTÂC
Papia irec maŋnao Israe ŋic ŋokac juju â eebapa‐jeŋic irec sâcmutâc, erâ Anutu mai eecne, â taha bapa â taha bâzi ririke gie irec sâcmutâc mufua‐fârekicne. WAHA RARA papaio ira qoruc boze bapare sâcmutâc fokac, eme ʒi qoruc boze maŋnao weniŋuc erâ Anutu mai ecnepie sâckeocmu irec dâŋ â sâcmutâc qâreŋkekicne forakac hâcne. Eme Israe ŋic jaŋe sâcmutâc izi hâcne jowa qataŋ ejarehame Anutu araŋ bacnehuc mai ecne jumbieŋ.
Dâŋne dâŋne forakac irec qizecne kecʒiŋuc: Ŋic sâqocne‐nâŋec fokacte Anutu, Israere Tiri rune e mâc sâcne mai mi ecnezo. E mai ecnezo murâ taha bacnehuc mai ecnezo.
Taha bapare sâcmutâc fuŋne fuŋne forakac i Israe ŋic jaŋere biŋe. Ŋifec ine sifu nâŋâc wâc ʒiŋuc manasu‐nârekac: Soc tâmiricko sâqocne bâbâtâmire mi fokac. Irec Jesuzi sâqocne‐nâŋec bâtâmireocte socticne hoŋkewec hâcne. Erâ sâcmutâc i ʒiŋuc nâzâkac wâc: Anutu araŋ bacnehuc daŋge mumuteŋ eecne â kiŋaŋ qaqacne izi taha bâzi ɋaɋacne â fârine.
Gaŋne gaŋne dâŋ neŋgocne forakac irec birine ʒi:
Tah 1—7. Taha bâzi fuŋne fuŋne â irec gie â sâcmutâc.
Tah 8—10. Taha bapa giere mumufiriec‐jopa irec sâcmutâc.
Tah 11—15. Ŋic ŋokac me qowi wiac i weniŋuc ehuc baɋaɋac‐jopazo, irec mumutâc dâŋ.
Tah 16. Ira jara sâc miriŋ bapa hombaŋ ŋeŋe irec sâcmutâc.
Tah 17—26. Soczi taha gie bapa, erâ maŋfuru â tiri juju irec sâcmutâc dâŋ.
Tah 27. Ira mumupaŋ dâŋ mumu â taha teŋkonec wâŋ rârâe irec sâcmutâc fokac.
Dâŋ mamana‐nâŋec moc gaŋ 19:18 ira fokac, kecʒiŋuc: “Ŋoŋe ŋaŋacnere eŋareekac sâc ijaha âgofâc‐ŋeŋic jaŋere eŋarezejec.” Jesuzi dâŋ irec hâcne sâcmutâc dâŋ qizecne namba 2 mukac. (Mataio 22:39)
1
Qowi bâzi ririkere dâŋ
1 Wofuŋ e tutumaŋ qoruc bozeo juhuc Mose hefârerâ kecʒiŋuc âzâcnewec: 2 “Go Israe ŋic ŋokac dâŋ kecʒiŋuc muhuc jazazemec: Ŋoŋeraonec ŋic moczi Wofuŋ taha bacneoctemurâ ine bulimakao moc me lama me noniŋ moc rorâ taha bacnezejec.
3 “E qowi bâzi moc rikezo murâ ine bulimakao ŋicne biaŋne moc taha bazejec, ehuc Wofuŋzi maname biaŋkeocte tutumaŋ qoruc bozere motâcko taha bazejec. 4 E meticne taha bâzi qowire qizec faio râeme Wofuŋzi manacneme biaŋkeha kiŋticne tarazejec. 5 Izi Wofuŋte maio bulimakao i hâcne qâhâmozejec, eme taha bapa, Aroŋ ŋokâfâcne hâcne, jaŋe socticne rorâ alata qoruc bozere motâcfuŋko ŋekac i râreckehuc tienʒepieŋ. 6 Ehame tahare qowi sahacne âkehockerâ fârine hezuzejec. 7 Eme taha bapa, Aroŋ ŋokâfâcne jaŋe ʒoc ruqenʒepieŋ. 8 Ehuc alata faio ʒoc ʒakac ira qowi dâkâne â qizecne erâ wokemaŋne râe‐fârenʒepieŋ. 9 Hone â kikene ine opâo ʒure‐fârezejec. Eme taha bapa e wiac i mâmâc sasawa alata faio qowi bâzi rike siŋsiŋkeme Wofuŋte maio âsu biaŋ fuazejec.
10 “Me qowi bâzire biŋe lama me noniŋ moc rikezo murâ ine ŋicne biaŋne moc taha bazejec. 11 Ehuc alata tambaraŋne faicpec ira Wofuŋte maio qâhâmozejec, ehame taha bapa, Aroŋte ŋokâfâc hâcne, jaŋe socticne rorâ alata râreckehuc tienʒepieŋ. 12 Eme ŋic eki hezume taha bapa jaŋe dâkâne dâkâne â qizecne erâ wokemaŋne alata faio ʒoc ʒakacko ira râe guruc enʒepieŋ. 13 Hone â kikene ine opâo ʒurezejec. Eme taha bapa eki wiac i sasawa alata faio qowi bâzi rike siŋsiŋkeme Wofuŋte maio âsu biaŋ fuazejec.
14 “Wofuŋ taha bacneocte qowi bâzire biŋe wipe râecnezo murâ ine hapâ â buni râecnezejec. 15 Eme taha bapa e alatao bararâ upene ʒâkiriŋkerâ alata faio rikezejec. Socticne ine alata ŋifecnao hoŋkeme razejec. 16 Erâ nârowaŋne â suhucne i alata ŋifecne ʒoaŋ wewefunaopec ʒafe hohoŋke hae fokac ira beheme huzejec. 17 Â fakecne ine mâc bazu banʒaŋ eme fârinehec fozejec. Ehuc taha bapa e alata faio ʒoc ʒakacko ira qowi bâzi rike siŋsiŋkeme Wofuŋte maio âsu biaŋ fuazejec.