1 “Moc e Wofuŋ taha bacneocte taha bâzi râezo murâ ine poroŋ uucne râecnezejec, ehuc wokemaŋ fainao hoŋkehuc wiac âsu biaŋ ʒuhuckezejec. 2 Iŋuc erâ Aroŋ ŋokâfâcne taha bapa jaŋerao barazejec. Eme jaŋeraonec moczi wiac irecnec poroŋ uucne â wokemaŋ me fufusuc jaha rorâ wiac âsu biaŋ sasawa ihec alata faio ʒocko rike siŋsiŋkeme Wofuŋte maio âsu biaŋ fuazejec. 3 Taha bâzire nâfocne izi ine Aroŋ â ŋokâfâcne jaŋere biŋe ezejec, i Wofuŋte taha bâzi rikepie wiac tirine jâmbâŋ ewec irec nâfocne hâcne.

4 “Ŋoŋe taha bâzi ofeŋ maŋnao rikekicne tahare biŋe râezo murâ ine poroŋ uucne goreŋ tâmiric wokemaŋ opânehec bâsifuckekicne me poroŋ goreŋ tâmiric wokemaŋ opâ ruacnekicne i râenʒepieŋ. 5 Me taha bâzi ofeŋ fainao rikekicne tahare biŋe râezo murâ ine poroŋ uucne goreŋ tâmiric wokemaŋ opânehec bâsifuckekicne râenʒepieŋ. 6 Ŋoŋe poroŋ bâfâuckepie piic piic eme wokemaŋ ruacnenʒepieŋ. Iŋuc epie taha bâzi eocmu hâcne. 7 Me taha bâzi‐ŋeŋic ʒocrâqâcko rikekicne tahare biŋe râezo murâ ine poroŋ uucne jaha wokemaŋ opânehec bâsifuckerâ rikenʒepieŋ. 8 Erâ taha bâzi wiac izi bakicne i Wofuŋtao baranʒepieŋ, ehuc taha bapa râcnepie alatao râezejec. 9 Erâ taha bapa e taha bâzi nâfocne rorâ alata faio ʒocko rike siŋsiŋkeme Wofuŋte maio âsu biaŋ fuazejec. 10 Taha bâzire tiwâne ine Aroŋ â ŋokâfâcne jaŋere biŋe ezejec, i Wofuŋte taha bâzi rikepie tirine jâmbâŋ ewec irec nâfocne hâcne.

11 “Ŋoŋe Wofuŋte biŋe taha bâzi râezo murâ goreŋ tâmiric banʒepieŋ. Ŋoŋe goreŋ me baŋac wiac Wofuŋ taha bacnehuc ʒocko moc mi rikepie ʒazejec. 12 Wiac iŋucne i Wofuŋte biŋe râezo murâ nânâ nânâsu dameŋko taha râeeŋgopieŋ irec sâc râenʒepieŋ, âsu biaŋ fuaocte ine alata faio mi rikenʒepieŋ. 13 Ŋoŋe taha bâzi wiac‐ŋeŋic râezo murâ hâwec hefârenʒepieŋ. Anutuhec ʒâʒâfic ekicne irec hâwec i behepie taha bâzi‐ŋeŋic nocne mi ezejec. Aricne taha bâzi wiac‐ŋeŋic sasawa i hâwec hefârehuc râenʒepieŋ.

14 “Ŋoŋe gie ɋârionec jacgoŋ taha bâzire biŋe Wofuŋ râcnezo murâ ine hazecne moc ʒocko rikekicne me ɋâricne banʒaŋnekicne râenʒepieŋ. 15 Ehuc wokemaŋ opâne hoŋkepie ruacnezejec. Erâ wiac âsu biaŋhec ʒuhuckenʒepieŋ, iŋuc epie taha bâzi eocmu hâcne. 16 Eme taha bapazi hândâŋne banʒaŋnekicne â wokemaŋ irec nâfocne, erâ wiac âsu biaŋhec sasawa i rorâ rikeme ʒazejec. Iŋuc eme Wofuŋte taha bâzi rikekicne eocmu.