1 “Ŋic moc e wama bâzi rikezo manasurâ bulimakao ŋicne me ŋokacne moc roocte ecneme ine biaŋne moc rorâ Wofuŋte maio râezejec. 2 E meticnezi qowi qizecne bânduŋkerâ tutumaŋ qoruc bozere motâcko qâhâmozejec, ehame Aroŋ ŋokâfâcne taha bapa jaŋe socticne rorâ alata râreckehuc tienʒepieŋ. 3 Eme qowi taha bâzire biŋe bâmockekicne irec wokemaŋ qârurune raruŋkerâ Wofuŋ bâzi rikecnezejec. 4 Ehuc râpe hândâŋ jajahecko wokemaŋzi bohotarâ fokac, erâ bugâpâcko qârurune fokac i mâmâc bârâriec‐jopazejec. 5 Eme Aroŋ ŋokâfâcne jaŋe wiac i rorâ qowi bâzi ʒocko fokac irec fainao râerâ rikenʒepieŋ. Iŋuc rike siŋsiŋkepie Wofuŋte maio âsu biaŋ fuazejec.

6 “Me Wofuŋ wama bâzi rikecnezo manasurâ lama noniŋfâcne jaŋeraonec ŋicne me ŋokacne moc roocte ecneme ine biaŋne moc rozejec. 7 E lama moc bâzi rikezo murâ Wofuŋte maio rikezejec. 8 Ehuc meticnezi qowi qizecne bânduŋkerâ tutumaŋ qoruc bozere motâcko qâhâmozejec; ehame Aroŋ ŋokâfâcne jaŋe socticne rorâ alata râreckehuc tienʒepieŋ. 9 Eme qowi wama bâzire biŋe bâmockekicne irec wokemaŋ qârurune raruŋkerâ Wofuŋ bâzi rikecnezejec. Ehuc gecne wokemaŋnehec fuŋnao hetâcnekicne â qârurune sasawa, 10 erâ râpe hândâŋ jajahecko wokemaŋzi bohotarâ fokac erâ bugâpâcko qârurune fokac i mâmâc bârâriec‐jopazejec. 11 Eme taha bapazi wiac i rorâ alata faio Wofuŋ tiwâ bâzi rikecnezejec.

12 “Me taha bâzire biŋe noniŋ moc râeocmu ine Wofuŋte maio rikezejec. 13 Ehuc meticnezi qowi qizecne bânduŋkerâ tutumaŋ qoruc bozere motâcko qâhâmozejec; ehame Aroŋ ŋokâfâcne jaŋe socticne rorâ alata râreckehuc tienʒepieŋ. 14 Eme qowi irec qârurune sasawa raruŋkeme taha bâzi‐ticne eha Wofuŋ rikecnezejec. 15 Ehuc râpe hândâŋ jajahecko wokemaŋzi bohotarâ fokac erâ bugâpâcko qârurune fokac i mâmâc bârâriec‐jopazejec. 16 Eme taha bapazi wiac i rorâ alata faio Wofuŋ tiwâ bâzi rikecneme âsu biaŋ fuazejec. Wokemaŋ sasawa i Wofuŋte biŋe hâcne. 17 Ŋoŋe wokemaŋ me soc mi nâjâmbâŋkenʒepieŋ, dâŋsanaŋ i mimiŋzi ɋâric ira me ira jufeniŋmu sâc bajunʒepieŋ.”