1 Wofuŋzi Mose dâŋ kecʒiŋuc âzâcnewec: 2 “Go Israe ŋic ŋokac dâŋ ʒiŋuc jazazemec: Wofuŋzi wiac ebac ezore sâcmutâc râewec i ŋic moczi mi mana tarahuc huckeocmuo, 3 me taha bapa wokemaŋ ruacnekicne e sâqocne bâfuahuc ŋic ŋokac bâbiec‐jopame kiŋhec eniŋmuo ine sâqocne bâfuawec irec erâ bulimakao ŋicnezi motecne biaŋne moc Wofuŋte maio sâqocne tâtâmire taha moc bazejec. 4 Ehuc bulimakao i tutumaŋ qoruc bozere motâcko Wofuŋte maio bafisizejec, erâ meticnezi qizecne bânduŋkehuc qâhâmozejec. 5 Erâ taha bapa wokemaŋ ruacnekicne e bulimakao soc gâcne rorâ tutumaŋ qoruc boze maŋko bafezejec. 6 Ehuc memotec‐ticne socko âke uruckerâ Wofuŋte maio tirificte ââketâc fuŋnao tieme arecne 7 ezejec. 7 Erâ taha bapa e soc gâcne Wofuŋte maio hosâc âsu ririkere alata, tutumaŋ qoruc bozere maŋko ŋekac irec ʒuŋene ruacnezejec. Soc tiwâne ine tutumaŋ qoruc bozere motâcko qowi bâzi ririkere alata ŋekac irec fuŋnao hoŋkezejec. 8 Erâ bulimakao sâqocne tâtâmirere biŋe qakicne irec wokemaŋ â qârurune honao bohotarâ fokac i raruŋkezejec. 9 Ehuc râpe hândâŋ jajahecko wokemaŋzi bohotarâ fokac, erâ bugâpâcko qârurune fokac i mâmâc bârâriezejec, 10 (wama bâzire biŋe bulimakao taha bahuc wiac ecnekicne sâc ijaha ecnezo). Ehuc taha bapa e wiac i taha bâzi ririkere alata faio rikezejec. 11 Bulimakao sahacne â biucne â qizecne â kikene erâ hone 12 i sasawa hae râpenao ʒafe hohoŋke mâreŋ biaŋnao bararâ ʒocko rikenʒepieŋ.

13 “Me Israe kikefuŋ ʒeŋgoma jaŋe Wofuŋzi wiac ebac ezore sâcmutâc râewec i mi mana tarahuc huckerâ tutumaŋko hesoŋkehuc kiŋhec eniŋmu. 14 Eme sâqocne bâfuakicne i fua taniŋkeme kikefuŋzi bulimakao ŋicnezi motecne moc rorâ sâqocne tâtâmirere biŋe taha baniŋte tutumaŋ qoruc bozeo bafisinʒepieŋ. 15 Ehame soŋaŋ micne jaŋe Wofuŋte maio mejeŋiczi bulimakao qizecne bânduŋkerâ qâhâmonʒepieŋ. 16 I tarame taha bapa wokemaŋ ruacnekicne eki bulimakao soc gâcne rorâ tutumaŋ qoruc bozeo bafezejec. 17 Erâ memotec‐ticne socko âke uruckerâ Wofuŋte maio ââketâc fuŋnao tieme arecne 7 ezejec. 18 Izi soc gâcne rorâ tutumaŋ qoruc bozere maŋko alata Wofuŋte maio ŋekac irec ʒuŋene ruacnezejec; soc tiwâne ine tutumaŋ qoruc bozere motâcko qowi bâzi ririke alata ŋekac irec fuŋnao hoŋkezejec. 19 Ehuc wokemaŋ‐ticne sasawa alata faio rikezejec. 20 Sâqocne tâtâmirere biŋe mârâc bulimakao wiac ecnekicne sâc ijaha bulimakao ʒi ecnezejec. Taha bapa e iŋuc ehuc kiwiric‐jeŋic rome sâqocne bâbâtâmire fua‐jarezejec. 21 Eme bulimakao hae râpenao bahurâ mârâc moc rikewec iŋuc jaha rikezejec. I kikefuŋte sâqocne tâmireocte wiac iŋuc hâcne fuazejec.

22 “Me ŋic fekicne moc e Wofuŋ Anutu‐ticnezi wiac ebac ezore sâcmutâc râewec i mi mana tarahuc huckerâ kiŋ bâfuaocmuo, 23 me sâqocne bâfuawec i mutaniŋkecneniŋmuo ine taha baocte noniŋ ŋicne biaŋne moc râezejec. 24 Ehuc meticnezi noniŋ qizecne bânduŋkerâ taha bâzire qowi qâhâmoeŋgopieŋ ijaha Wofuŋte maio qâhâmozejec. E iŋuc eme sâqocne tâtâmire taha eocmu. 25 Eme taha bapa e sâqocne tâtâmire taha irec soc gâcne rorâ memotec‐ticnezi qowi bâzi ririkere alata ʒuŋene ruacnezejec; soc tiwâne ine alata irec fuŋnao hoŋkezejec. 26 Wokemaŋne sasawa ine alata faio wama bâzire wokemaŋ rikewec irec sâc jaha rikezejec. Taha bapa e iŋuc ehuc ŋic sâqocne ere kiwiric rome sâqocne bâbâtâmire fuacneocmu.

27 “Me ŋic ŋokac omane jaŋeraonec moc e Wofuŋzi wiac ebac ezore sâcmutâc râewec i mi mana tarahuc huckerâ kiŋ bâfuaocmuo, 28 me sâqocne bâfuawec i mutaniŋkecneniŋmuo ine taha baocte noniŋ ŋokacne biaŋne moc râezejec. 29 Ehuc meticnezi noniŋ qizecne bânduŋkerâ noniŋ i taha bâzire qowi qaeŋgopieŋ ira okacne qâhâmozejec. 30 Eme taha bapa e meticnezi soc gâcne rorâ qowi bâzi ririkere alata ʒuŋene ruacnezejec; soc tiwâne ine alata fuŋ nao hoŋkezejec. 31 Ehuc wama bâzire wokemaŋ bârârieeŋgopieŋ irec sâc jaha wokemaŋ‐ticne sasawa bârâriezejec. Erâ alata fâio rike siŋsiŋkeme Wofuŋte maio âsu biaŋ fuazejec. Taha bapazi iŋuc ehuc ŋic ere kiwiric rome sâqocne bâbâtâmire fuacnezejec.

32 “Me ŋic ekizia sâqocne tâtâmire taha baocte lama moc râeocmuo ine ŋokacne biaŋne moc râezejec. 33 Ehuc meticnezi lama qizecne bânduŋkerâ bâzire qowi qâhâmoeŋgopieŋ ijaha sâqocne tâtâmirere qowi qâhâmozejec. 34 Eme taha bapa e sâqocne tâtâmire irec soc gâcne rorâ memotec‐ticnezi qowi bâzi ririkere alata ʒuŋene ruacnezejec; soc tiwâne ine alata fuŋnao hoŋkezejec. 35 Wokemaŋ‐ticne sasawa i wama bâzire lama irec wokemaŋ bârârieeŋgopieŋ irec sâc jaha bârârierâ alatao Wofuŋte taha bâzi gâcne ʒahuc fokac irec fainao râeme ʒazejec. Taha bapa e iŋuc ehuc ŋic sâqocne bâfuawec ere kiwiric rome sâqocne bâbâtâmire fuacnezejec.