22
Ŋic ŋaqi tâmiric ere binaŋ
1 Jesu e kesaic dâŋ mocwâc ʒuhuckerâ kecʒiŋuc muwec: 2 “Sambâŋte kikefuŋ i ŋicwofuŋ moczi wiac ewec ira sâc hepe. Ŋicwofuŋ e ŋokâ‐ticne ŋokac râcneocte tiwâ bâzi sâko qame fisiwec. Joh 3:29 3 Iŋuc erâ kiŋaŋ motecfâcne sorec‐jopame jaŋe ŋic ʒâfo qanaŋ ejarekicne jowac‐jopaniŋte rambiŋ. 4 Ra mupie qikiŋnepie ŋicwofuŋzi motec gâcne mocwâc jaza sorec ehuc muwec, ‘Ŋoŋe rarâ ŋic ʒâfo ejarekicne jazaniŋ: Manaŋgopieŋ, no tiwâ bâzi qape fisijec â bec bulimakao mupe hezu rikec embieŋ, ehuc wiac sasawa emoc bâmoc efârembieŋ, irec ŋoŋe warepie ŋic ŋokac bâturec‐jofahuc nâ ʒeri enʒepeneŋ.’ Mat 21:36 5 Eme jaŋe rarâ iŋuc jazapie dâŋ mana takirehuc moc e gie‐ticnao rawec, moc e ŋicmanac rawec. 6 Tucne jaŋe ine motec rocjoparâ râsi ejarehuc qâhâmoc‐jopambiŋ. 7 Iŋuc epie ŋicwofuŋzi manarâ mana gâpârerâ momori ejareme jaŋe ʒika qaqa jopahuc hae‐jeŋic turuŋkepie ʒawec. Mat 24:2
8 “Eme ŋicwofuŋ e kiŋaŋ motec ʒiŋuc jazawec: ‘Tiwâ ʒepec i rike bâmoc ekicne, eme ʒâfo ejarekicne jaŋe takic‐jopame qikiŋneŋgopieŋte 9 ŋoŋe bozene bozene rarâ bâfuac‐jopaniŋmu sâc rocjopapie warenʒepieŋ.’ Mat 13:47; 21:43 10 Mume motec jaŋe bozene bozene jufârehuc ŋic kosa, biaŋne mecne sâqocne mecne mâmâc amec‐jopapie fisirâ tutumaŋ fic fusucmarâ ŋembiŋ. 11 Ŋehapie ŋicwofuŋzi honec‐jopaocte ferâ ŋic moc hombaŋ ŋaqi tâmiric ŋeme honewec; 12 erâ ʒiŋuc âzâcnewec: ‘Âgo, go weniŋuc erâ hombaŋ ŋaqi tâmiric wefu ŋekomec?’ Mume ŋic e fâsâerâ ŋewec. 13 Eme ŋicwofuŋzi motecfâcne jazarâ muwec, ‘Ŋoŋe me kikene qarâ duŋdapâc maŋko sârockepie huoc. Ira ki oowa ehuc mic kikiaric kihuc fozejec.’ Mat 8:12 14 Hefârec‐jopakicnezi bocjaha, rowosâec‐jopakicnezi ine afecne.”
Jesu moneŋte esâickembiŋ
(Mar 12:13–17; Luk 20:20–26)
15 Jesuzi iŋuc jazame farisaio jaŋe ficjeŋicko rarâ, dâŋzi bitiŋ moc weniŋuc bapene kizejec, muhuc dâŋ bâwosâembiŋ. Joh 8:6 16 Eku motecfâc‐jeŋic â Herodere ŋic tucne jaza sorec epie rarâ ʒiŋuc mumbiŋ: “Qaqazu, nâŋe gore fuŋne manaeŋgopeneŋ, go dâŋ burec mi ehuc jâmbomac jaha muekic, â mitire hata i fekicne wahakicne sâckoa nâzâ nâwotuc eekomec. Ehuc fekicne fosâoc‐jopahuc dâŋ mi muhasickeekomec. Mar 3:6; Joh 3:2 17 Irec wio‐garepene nâzâc: Sisa,* Roma ŋicwofuŋte mukicne. takesi moneŋ râcneeŋgopeneŋ i manatec sâckekac me aricne?” 18 Mupie maŋsioc‐jeŋic hone tararâ muwec, “Burecŋic, ŋoŋe wemocte dâŋzi bitiŋ banareŋgopieŋ? 19 Ŋoŋe takesi moneŋ râeeŋgopieŋ i moc nowatupie honepe.” Mume 10 toea bâfuarâ jâutumbiŋ. 20 Eme Jesuzi wio‐jare muwec, “Hawari â qâreŋ ʒi more?” 21 Jaŋe mumbiŋ, “Sisare.” Iŋuc mupie jazawec, “Murâ Sisare biŋe i Sisa râcnenʒepieŋ, â Anuture biŋe i Anutu râcnenʒepieŋ.” Rom 13:7 22 Iŋuc muhuc jazame jaŋe wareckerâ beherâ rambiŋ. Joh 8:9
Hâmockonec fafahare irec Jesu esâickembiŋ
(Mar 12:18–27; Luk 20:27–40)
23 Ʒoaŋ gie bapa ijaha sadukaio ŋic jaŋe Jesurao fisimbiŋ. Ŋic i jaŋe, hâmockonec fafahare mi fokac, iŋuc muhuc jumbiŋ. Jaŋe hâcne fisirâ dâŋ moc wiocnembiŋ, Apo 23:6, 8 24 ʒiŋuc muhuc: “Qaqazu, Mose e dâŋ kecʒiŋuc qâreŋkewec: ‘Ŋic moczi ɋâric tâmiric hâmome ɋanezi hozec‐ticne rozejec, ehuc hahac‐ticnere biŋe ɋâric bâfuazejec.’ Fuf 38:8; Sâc 25:5, 6 25 Eme ŋondeŋ‐nâŋecko hahac ɋa 7 jumbiŋ, ehuc mârâc hahac‐jeŋic ŋokac rorâ ɋâric tâmiric jurâ hâmome ɋanezi hozec‐ticne rowec. 26 E iŋuc jaha hâmome ɋaticne moczi hozec ijaha rowec. Iŋuczi iŋuc eku hahac ɋa 7 jaŋe mâmâc hâmo‐fârembiŋ. 27 Izi ʒâhec hozec‐jeŋic e wâc hâmowec. 28 Eme jaŋe mâmâc sasawa ŋokac ijaha rombiŋte fafahare dameŋko more ezokac?” 29 Mupie Jesuzi ʒiŋuc jazawec: “Ŋoŋe miti â Anutu tâpiri‐ticne kâuc bahuc dâŋ musifuckeŋgopieŋ. 30 Fafahare dameŋko ŋic ŋokac roroc mocwâc mi enʒoŋgopieŋ. Jaŋe sambâŋ aŋelo iŋucne erâ mâc junʒoŋgopieŋ. 31 Eme ŋoŋe fafaharere muŋgopieŋte ŋazape. Anutu e dâŋ kecʒiŋuc ŋazawec i ŋoŋe wose manac mi eeŋgopieŋ me? 32 ‘No Abraham â Isaka â Jakobo jaŋere Anutu.’ Ine hâcne, e hâmokicne jaŋere Anutu mâcne, e ɋâricne juju jaŋere Anutu.” Mat 8:11; Wah 3:6 33 Jesuzi dâŋ iŋuc mume ŋic ŋokac guru sâko jaŋe miti mumu‐ticnere manapie bipinehec ewec.
Jesu sâcmutâc qizecnere wiocnembiŋ
(Mar 12:28–31; Luk 10:25–28)
34 Jesure dâŋzi sadukaio ŋic bâniniŋ‐jopawec, i farisaio jaŋe manarâ qâturerâ 35 âgo‐jeŋic moc sâcmutâc mamana saric e ecnepie Jesu esâickehuc kecʒiŋuc muwec: 36 “Qaqazu, sâcmutâc dâŋ wenimoizi qizecne sâko?” 37 Mume Jesuzi ʒiŋuc âzâcnewec: “Go maŋge â qâqâtâcge â mamanasuge Wofuŋ Anutuge furu jaha qikiŋnecnetec fozejec. Sâc 6:5 38 Dâŋ izi sâcmutâc dâŋ fârine â femicne. 39 Erâ âgone moc fokac, jahe sâckoa ekopirec, ine kecʒiŋuc: Go gahacnere egareekac sâc ijaha âgogere egarezejec. Tah 19:18 40 Sâcmutâc i jahe hâcne Mose â porofete jaŋere dâŋ qâhâcke‐fârekopirec.” Mat 7:12; Rom 13:10; Gal 5:14
Jesu e jahacne fuŋnere esâic‐jopawec
(Mar 12:35–37; Luk 20:41–44)
41 Farisaio ŋic qâturerâ juhapie Jesuzi mu indiŋ ejarerâ 42 kecʒiŋuc muwec: “Ŋoŋe Kristore weniŋuc muŋgopieŋ, e more ɋâric?” Jaŋe mumbiŋ, “Dawidire.” Joh 7:42 43 Mupie Jesuzi jazawec, “Eme Dawidi e Mârozi ecneme weniŋucte Kristo ‘Wofuŋnane’ mucnewec? Kecʒiŋuc muhuctecne:
44 ‘Wofuŋzi nore Wofuŋ âzâcnewec,
go ware fâre‐naneo ŋehaŋtec
râsifâcge kikegere rurumaŋko guruc‐jopazepac’. Mat 26:64; Mi Mâ 110:1
45 Irec Dawidi e ‘Wofuŋ‐nane’ mucnewec, iŋucnezi weniŋuc erâ ɋâric‐ticne ekac?” 46 Iŋuc muhuc wio‐jareme jaŋe dâŋ bâtikiecneniŋte efefeckembiŋ. Erâ ʒâhec mocwâc esâickeniŋte mi afeckembiŋ.