Kâte Bible MATAIO 26

Jesuzi hâmoc biŋe‐ticne jazawec

(Mar 14:1–2; Luk 22:1–2)

1 Jesu e dâŋ i sasawa muku mufârerâ motecfâcne ʒiŋuc jazawec: 2 “Fureme aakic hombaŋ maickeocmu, i manaŋgopieŋ. Eme ira Ŋic Fâri Wâtuŋne e ŋic jaŋere meo feme maripoŋko qaniŋmu.” 3 Eme dameŋ ira taha bapa micne â soŋaŋ jaŋe taha bapa sâko Kaifa ere tutumaŋ ficko fefârerâ 4 Jesu kamierâ rorâ qaniŋte dâŋ mumockembiŋ. 5 Ehuc mumbiŋ, “Hombaŋko misac, ŋic bâiŋ‐jopapene ʒika kosa fuazackohec.”

Ŋokac moczi Jesu opâ âsu biaŋ ruacnewec

(Mar 14:3–9; Luk 7:36–50; Joh 12:1–8)

6 Eme Jesu e Betania haeo rarâ Simoŋ wicsanaŋ ecnewec ere ficko nânâ nâwec. 7 Nâhuc ŋehame ŋokac moczi erao rarâ opâ âsu biaŋ furi sâko ere qizecko hesieme ruacnewec. 8 Iŋuc eme motec jaŋe honerâ mu takic erâ mumbiŋ, “Wiac furi sâko wemocte sipirickekac? 9 Izi moneŋ bocjaha kitâcneme ŋic hapetac jarepene sâckezac.” 10 Mupie Jesuzi manarâ ʒiŋuc jazawec: “Ŋoŋe wemocte ŋokac mumu hehec ecneŋgopieŋ me? Ŋokac e jauŋ bacnume biaŋkekac. 11 Ŋic hapetac dameŋ sâc ŋoŋerao juniŋmu, no ine ŋoŋerao boc mi jupemu. 12 No biac hâmope ducnuniŋmu, irec qanaŋ sahac‐nane mâzockekac. 13 No jâmbomac ŋazape, miti mâreŋne mâreŋne murahuc ŋokac kecʒi mâzocnukac irec biŋedâŋ mâmâc murapie haŋ baocmu.”

Juda e Jesu doc baocte moneŋ rowec

(Mar 14:10–11; Luk 22:3–6)

14 Eme motecfâcne 12 jaŋeraonec moc ʒâŋene Juda Karioto haeonec eki taha bapa micne jaŋerao rarâ 15 kecʒiŋuc jazawec: “No doc baŋarepe ŋoŋe moneŋ wezimuc nareniŋmu?” Wio‐jareme izia siliwa moneŋ 30 wose biric ecnepie rowec. 16 Rorâ Jesu doc bame roniŋte hone jâjâpehuc juwec.

Jesu e motecfâcne jaŋehec aakic lama nâmbiŋ

(Mar 14:12–21; Luk 22:7–14, 21–23)

17 Eme goreŋ sowa jujumbieŋ irec dameŋ maickeme motec jaŋe Sekiqanâcko Jesu indiŋkerâ mumbiŋ, “Nâŋe miŋecgac fic wena aakic tiwâ rike bâmoc egarenʒepeneŋ?” 18 Mupie jazawec, “Ŋoŋe haeo ferâ ŋicmae ʒiŋuc âzâcnenʒepieŋ: ‘Qaqazu‐nâŋec e gore mukac, dameŋ‐nane bembeŋkekacte gorao fârâ motecfâc‐nane jaŋehec aakic tiwâ nanaŋte mukopac.’ ” 19 Eme Jesuzi muwec dâŋ i motecfâcne reŋke‐fârerâ aakic tiwâ rike bâmoc embiŋ. 20 Hae ŋafeme Jesu e motecfâcne 12 rocjopame fic ira ferâ aakic tiwâ nâmbiŋ. 21 Nâhuc Jesuzi ʒiŋuc jazawec: “No jâmbomac ŋazape, ŋoŋeraonec moczi no doc bacnuocmu.” 22 Mume motec jaŋe bujeŋic mâretec sâqoreme moc moc wiocne rahuc mumbiŋ, “Wofuŋ, nore wiac moc murâ?” 23 Eme eki ʒiŋuc jazawec: “Sicko nohec mâmâc poroŋ âke uruckeperec eki doc bacnuocmu. 24 Ŋic Fâri Wâtuŋne e mitio hata muʒâwecnekicne ira razo ekac hâcne. Â Ŋic Fâri Wâtuŋne doc baocmu e ine, jei, okacne mo iŋucne roocmu. Ŋic e neŋgoc bumaŋkonec mi fuame muzac, afeckecnezac.” 25 Iŋuc mume Juda doc bapa eki iŋuc jaha wiocnerâ muwec, “Qaqazu, nore wiac moc murâ?” Mume âzâcnewec, “Goki hâcne.”

Jesuzi Ŋafe Tiwâ gumec‐jopawec

(Mar 14:22–25; Luk 22:15–20; Joh 13:21–26; Kor I 11:23–26)

26 Eme tiwâ nârâ Jesuzi poroŋ rorâ jambuŋkerâ bazurâ motecfâcne ʒiŋuc muhuc jarewec: “Ro nâniŋ, kecʒi fâri‐nane.” 27 Iŋuc murâ waiŋ râqâc rorâ daŋge murâ ʒiŋuc muhuc jarewec: “Ŋoŋe mâmâc sasawa nâniŋ, 28 kecʒi ʒâʒâfic ɋâricnere socnane. Ŋoŋere kiŋ taraocte qikiŋnekicne. 29 Erâ ŋazape mananiŋ, mâreŋko waiŋ opâ miŋecgac natarakopac, eme mocwâc mi nânâ juku Mamac‐nanere uucmaŋko ŋoŋehec waiŋ opâ fuŋmoc nânʒoŋgopeneŋ.”

Gezemane jufuo rambiŋ

(Mar 14:27–42; Luk 22:31–34, 40–46; Joh 13:36–38)

30 Eme gae herâ haeonec rahurâ ocniŋuc Oliwa tikio fembiŋ. 31 Hatao rahuc Jesuzi ʒiŋuc jazawec: “Ŋafe ʒira ŋoŋe nore mâmâc sasawa manapie sâqoreocmu. Dâŋqâreŋ moc kecʒiŋuc fokac i sanaŋkeocmu hâcne: ‘No soŋaŋ qape lama jaŋe siŋsaŋ qaniŋmu.’ 32 Eme hâmockonec faharerâ ine Galilaia mâreŋko rahuc bânie‐ŋarepemu.” 33 Mume Petorozi ʒiŋuc âzâcnewec: “Gâcne jaŋe mâmâc sasawa gore manapie sâqoreocmu mecne, â noni ine gore manape sâsâqore i moc mi epemu.” 34 Iŋuc mume Jesuzi âzâcnewec, “No jâmbomac gazape manac, goki ŋafe ʒira qâqâczi mi dâŋehame mic bacnutec jahec â moc eocmu.” 35 Eme Petorozi muwec, “Go gahacne guhuc no mâmâc nuzo mupie sifu mi mic bacgupemu.” Eme motec âgofâcne bafickerâ ijaha mumbiŋ.

36 Eme raku jufu moc ʒâŋene Gezemane ira fisirâ Jesuzi motec ʒiŋuc jazawec: “Ŋoŋe ʒira ŋehapie noni ocna rarâ numupemu.” 37 Iŋuc murâ Petoro â Ʒebedaio ŋokâ jahec‐ticne rocjopame rambiŋ. Rahuc fuŋkerâ hâhâwic manarâ me kikene fâfârewec. 38 Iŋuc ehuc jazarâ muwec, “Maŋnane hâhâtâweme hâhâmocne enarekac, irec ŋoŋe ʒira ŋehuc nohec mâmâc maŋɋâri junʒepieŋ.” 39 Iŋuc jazarâ ipec rarâ ʒâŋe maine mâreŋko hetutuckerâ kecʒiŋuc muhuc numuwec: “Mamac‐nane, manatec eene ekacko ʒâic guru ʒi nowaruoc. Erâ nore dâŋ mâcne, gore dâŋ sanaŋkezejec.” 40 Iŋuc numurâ motec jahec â moc jaŋerao risierâ guŋ fohapie honec‐joparâ Petoro ʒiŋuc âzâcnewec: “Ŋoŋe nohec piticne ɋâricne sâcne mi junʒapiŋ me? 41 Eesâicko dockenʒipiŋte maŋɋâri juhuc numuniŋ. Maŋzi afeckekac, sahaczi ine ŋemâckekac.” 42 Eme mocwâc rarâ dâŋ ʒiŋuc muhuc numuwec: “Mamac‐nane, ʒâic guru ʒi nowaruocte manatec mi sâckeme sifu mana‐fârepe gore dâŋ sanaŋkezejec.” 43 Iŋuc murâ risierâ motec jaŋe ʒâŋe‐jeŋic guŋtea eme qâmâc‐jopame fohapie bâfuac‐jopawec. 44 Irec mocwâc behec‐joparâ ra numume jahec â moc ewec. Dâŋ mârâc muwec ijaha muhuc numuwec. 45 Numu‐fârerâ motec jaŋerao risierâ jazawec, “Ŋoŋe guŋ jaha fohuc fomanaŋgopieŋ me? Ʒi dameŋ maickekac. Ŋic Fâri Wâtuŋne e doc bapie sâqocne bapa jaŋere meo fekac. 46 Faharepie ranaŋ, ʒi docbapazi bâqiŋnukac ine.”

Râsi jaŋe Jesu rombiŋ

(Mar 14:43–50; Luk 22:47–53; Joh 18:3–11)

47 Iŋuc jazahuc domahame mi motec 12 âgo‐jeŋic Juda eki râsi guru sâko micne bajareme ututuŋ fisinʒepieŋ i! Taha bapa micne â soŋaŋ jaŋe sorec‐jopapie ʒika ɋaruc wiac barâ fisimbiŋ hâcne. 48 Eme docbapazi ine qanaŋ sâcmutâc kecʒiŋuc jazawec: “Muduckepe honerâ ine hâcne muhuc ronʒepieŋ.” 49 Eme fisirâ izia Jesurao rarâ, “O qaqazu‐nane” murâ muduckewec. 50 Eme Jesuzi ʒiŋuc âzâcnewec: “Âgo, gie bazo muhuc waremec i bazemec.” Mume jaŋe ware rorâ mene bândeŋnembiŋ. 51 Eme Jesuhec jumbiŋ jaŋeraonec moczi sâqe‐ticne becsahackonec unuckerâ taha bapa sâko kiŋaŋ motec‐ticne qaocte hazecne qatarawec. 52 Iŋuc eme Jesuzi ʒiŋuc âzâcnewec: “Sâqege becsahacko râec huoc. Moc e ʒika qarâ okacne ʒika jaha kiocmu. 53 Me go nore weniŋuc mukomec? Mamac‐nane numucnepe ʒiŋuczia mi aŋelo guru sâko 12 sorec‐jopame waha ŋezicnuniŋmu me? 54 Erâ waha ŋezicnupie ine mitio nore findaŋdâŋ mukicne i weniŋuc deŋkezac?” 55 Iŋuc murâ ŋicguru e roniŋte warembiŋ jaŋe ʒiŋuc jazawec: “Ŋoŋe nore manapie ʒika qaqa eme ʒika ɋaruc‐ŋeŋichec warerâ rocnuŋgopieŋ me? No ʒoaŋne ʒoaŋne taha ufuŋko ŋic miti qazu‐jarehuc juekopac, ehame ŋoŋe ira mi rocnumbiŋ. 56 Erâ wiac ʒi ine porofete jaŋere dâŋ sanaŋke‐fâreocte fua‐fârekac.” Eme motec jaŋe mâmâc sasawa Jesu beherâ wise‐fârembiŋ.

Jesu taha bapa sâkore ficko bafembiŋ

(Mar 14:53–65; Luk 22:54–55, 63–71; Joh 18:12–14, 19–24)

57 Momori jaŋe Jesu rorâ taha bapa sâko Kaifa erao barambiŋ. Ere ficko hâcne miti qaqazu â soŋaŋ tumaŋnerâ ŋembiŋ. 58 Eme Jesu barahapie Petoro e hone ŋetarac ejarehuc ʒâhec rawec. Raku fisirâ taha bapa sâkore sacmaŋko raʒirâ kiŋaŋ motec jaŋere ŋondeŋko ʒiŋuc muhuc waha ŋewec: “Jesure dâŋ weniŋuc mutaraniŋmu, i ʒira ŋehuc hone manac ezepac.”

59 Eme taha bapa micne â micne guru furu jaha ŋehuc Jesure dâŋburec bâfuarâ qorickehuc ʒikao râeniŋte dâŋ mana wosâembiŋ. 60 Ehuc dâŋburec bocjaha mufuarâ manapie ŋemâcne mi eme basahuc jaha ŋembiŋ. Eku ŋic jajahec fuarâ 61 ʒiŋuc mupic: “Jesu e, ‘noni Anuture ufuŋ heropierâ ʒoaŋ jahec â moc eha mocwâc bâzickepemu’ iŋuc mume manapec.” 62 Mupire taha bapa sâkozi faharerâ Jesu ʒiŋuc âzâcnewec: “Gore dâŋ muŋgopieŋ i ŋifecne moc muzo mukomec me aricne?” 63 Mume Jesuzi dâŋemâc domawec. Iŋuc domame taha bapa sâkozi mocwâc ecnerâ muwec, “Anutu juju sanaŋ ere maio esâicgupe musanaŋkec, go Kristo Anuture Ŋokâ me mâcne?” 64 Esâickeme Jesuzi ʒiŋuc muwec: “Ine hâcne mukomec. Erâ moc ŋazape mananiŋ: Juku Ŋic Fâri Wâtuŋne e tâpiri rune ere fârenao domahuc sambâŋ karorac faio waha fisime hone ʒâirenʒoŋgopieŋ.” 65 Iŋuc mume taha bapa sâkozi dâŋ i maname gâpâreme maŋrâŋgeŋ bâfuarâ ŋicfâcne ʒiŋuc jazawec: “E Anutu âkehockekac, irec wemocte mocwâc munaŋmu? 66 Dâŋ i ŋaŋac manarâ weniŋuc muŋgopieŋ?” Eme jaŋe mumbiŋ, “E ʒikare biŋe ekac.” 67 Iŋuc murâ Jesu ʒâŋe maine tâfeckehuc mehuhuŋzi he tutuŋ ecnembiŋ, â gâcnezi metatapezi maucnao qambiŋ. 68 Ehuc ʒiŋuc âzâcnembiŋ: “Kristo go porofete jukomeczi muc, ŋic gukac ʒâŋene mo?”

Petorozi Jesu mickewec

(Mar 14:66–72; Luk 22:54–62; Joh 18:15–18, 25–27)

69 Iŋuc ehuc juhapie Petoro e sacmaŋko hae ʒoŋao ŋewec. Ŋehame kiŋaŋ naru moczi erao rarâ muwec, “Goki hâcne Galilaia ŋic ehec juekomec.” 70 Eme eki ŋic ŋembiŋ jaŋere maio mic barâ muwec, “Go dâŋ mukomec i kâuc bakopac.” 71 Iŋuc murâ motâcko huzo ehame kiŋaŋ naru moczi honerâ ŋic ʒiŋuc jazawec: “Ŋic keci Jesu Nazarete haeonec ehec juekac.” 72 Jazame Petorozi Anuture maio mupaŋkehuc mocwâc mic barâ muwec, “No ŋic e mi honeekopac.” 73 Iŋuc murâ domahame ŋic jaŋe Petororao rarâ mumbiŋ, “Nâŋe dâŋ hawarige mana taraŋgopeneŋ, go jâmbomac jaŋere guruonec.” 74 Âzâcnepie mocwâc Anuture maio mupaŋkehuc dâŋ kosa muhuc ʒiŋuc jazawec: “No ŋic e mi honeekopac.” Mume izia qâqâc dâŋewec. 75 Eme Jesuzi dâŋ ʒiŋuc muwec: “Qâqâczi mi dâŋeha go mic bacnutec jahec â moc eocmu”, dâŋ i manasurâ rarâ ki kâcɋene kiowec.