11
Johane Jesure biŋe mumuzi Jesurao dâŋ râeme rawec
(Luk 7:18–35)
1 Jesuzi motecfâcne 12 dâŋ iŋuc jaza qomac ejare‐fârerâ beherâ hae gâcnao miti jaza qazuc eocte rawec. Mat 7:28; 13:53; 19:1; 26:1 2 Eme Johane e kâpâcwâru ficko ŋehuc Kristozi gie bawec irec biŋe manarâ motecfâcne sorec‐jopame jaŋe rarâ Mat 14:3 3 ʒiŋuc muhuc wiocnembiŋ: “Ware‐nâreocte mukicne go hâcne me? Me mocte woŋec junʒepeneŋ?” Mal 3:1; Dan 9:26 4 Mupie Jesuzi ʒiŋuc jazawec: “Ŋoŋe risierâ wiac hone manac eŋgopieŋ irec binaŋ bahuc Johane âzâcnenʒepieŋ: 5 Tiŋtuŋzi ʒâŋe fitâcneŋgopieŋ, puriŋzi hata juŋgopieŋ, wicsanaŋheczi sahac fâsâc eŋgopieŋ, qepoŋzi dâŋ mamana eŋgopieŋ, hâmokicnezi ɋâreŋgopieŋ â waha qaqanezi Biŋebiaŋ manaŋgopieŋ. Jes 35:5, 6; 61:1 6 Eme moc e mana gâpârehuc qiqikiŋ mi enareocmu, ere manape ʒerine ekac.” Mat 13:57; 26:31 7 Eme Johanere motecfâc jaŋe risierâ rahapie Jesu e ŋic jumbiŋ jaŋe Johanere ʒiŋuc jazawec: “Ŋoŋe mâreŋ tuhuo wemo honeniŋte rambiŋ? Saparac moc mâŋâŋzi batac bawarec eme honeniŋte rambiŋ me? Mat 3:1, 5 8 Me ŋic moc ŋaqi‐ticne eri qaraweŋnehec honeniŋte rambiŋ? Manaŋgopieŋ, ŋic ŋaqi eri qaraweŋnehec jaŋe ŋicwofuŋ ficko juju fofo eeŋgopieŋ. 9 Me porofete moc honezo rambiŋ? No ŋazape mananiŋ, ŋoŋe ŋic hone jumbieŋ e porofete gâcne jaŋere sâc aricne, e sâc moc. Luk 1:76 10 Ere hâcne dâŋqâreŋ moc kecʒiŋuc fokac:
‘Manakic, no biŋe mumu ŋicnane sorepe fâ maigao fuaocmu,
erâ hatage bâʒâwehuc bânie‐gareocmu’. Mal 3:1; Mar 1:2; Joh 3:28
11 No jâmbomac ŋazape, ŋokackonec fuakicne gâcne sasawa jaŋeraonec moczi Johane Miti Opâ fufuŋke mi qâhuckekac. Â sambâŋte uucmaŋ fua tâcneme maŋnao wahakicne juocmuzi sifu e qâhuckeocmu. Mat 13:17 12 Johane Miti Opâ fufuŋkezi gie qizeckewec dameŋ ira sambâŋte uucmaŋ fuŋkerâ tâpirihec ŋezurâ fuaweczi fuaekac. Eme ŋic ɋicwânʒâŋ eeŋgopieŋ jaŋe uucmaŋ i rauckeeŋgopieŋ. Luk 16:16; 13:24; Joh 6:15 13 Porofete â Mose jaŋe mâmâc sasawa findaŋdâŋ mu qâreŋ ewarekupie Johanerao tarawec. 14 Eme ŋoŋe dâŋ kecʒi ro maŋ ezo murâ eniŋ: Elia wareocte mukicne i Johane hâcne. Mal 4:5; Mat 17:10–13 15 Moc e hazecneheczi dâŋ i manazejec.
16 “Ŋicguru ʒi weni jaŋehec sâc hecjopape? Jaŋe naru motec iŋucne. Naru motec jaŋe hae ʒoŋao ŋehuc âgofâc‐jeŋic ʒiŋuc jazaeŋgopieŋ:
17 ‘Gae hepene wemocte mi woŋgopieŋ;
kimakuc hepene wemocte mi kioŋgopieŋ!’ Muq 29:9
18 Johanezi gie‐ticne fuŋkerâ nânâ qowi mi nânâ sowa jume honerâ mumbiŋ, ‘Demoŋzi ecnekac.’ Mat 3:4 19 Ŋic Fâri Wâtuŋnezi waharâ nânâ qowi nâme honerâ mueŋgopieŋ, ‘Kec, e ŋic nâ âmbâŋne, takesi roro â sâqocne bapa jaŋere âgo.’ Anuture mamana biri e ine fârinehec eme fuŋne‐ticne taniŋkeekac.” Mat 9:14, 15
Jesuzi Galilaia ŋic jaŋere uŋ muwec
(Luk 10:13–15)
20 Dameŋ ira Jesuzi hae gâcnao gie bahuc tâpiri‐ticnere fuŋne bataniŋkeme hone‐bipiehuc maŋjeŋic mi bârisiembiŋte dâŋ fuŋkerâ kecʒiŋuc muhuc hanec‐jopawec: 21 “Jei, Koraziŋ rune, jei, Besaida rune. Ŋoŋerao mâsi hâhâwicne fuawec i Tiro Sidoŋ haeo fuame muzac, jaŋe mârâc jaha ki busâqoc ehuc maŋjeŋic bârisienʒapiŋ. Jon 3:6 22 Irec ine ŋazape mananiŋ: Tiro â Sidoŋ haeonec ŋic jaŋe okac dameŋko katucne bawahahuc ejarezo â ŋoŋe ine katucne bafehuc eŋarezo. 23 Â Kafanaum rune go sambâŋko bafecguzo me? Aricne, go hârâcko tuŋguzo. Gorao mâsi hâhâwicne fuawec i Sodom haeo fuame muzac, hae i mi sirowehec dameŋ ʒiŋuczia ŋehuc juzac. Mat 4:13; 8:5; 9:1; Jes 14:13, 15 24 Irec ŋazape mananiŋ: Okac dameŋko Sodom haeonec katucne baafeckehuc ejarezo, â go ine katucne bâmâmâckehuc egarezo.” Mat 10:15
Jesuzi Mamac‐ticne muafeckewec
(Luk 10:21–22)
25 Dameŋ ira Jesuzi dâŋ kecʒiŋuc muwec: “Mamac, sambâŋ â mâreŋ irec Wofuŋ, go mamana‐jeŋicte manapie kâcɋene eekac ŋic iŋucne jaŋe mitidâŋge bâsoŋke‐jareekic, â maŋjeŋicte manapie gegecne eekac jaŋe ine mufua‐jareekic, no irec muteŋgukopac. Kor I 1:26–29 26 Mamac, go iŋuc fua raocte manatec biaŋkewec hâcne. 27 Mamac‐nane e wiac sasawa râe‐nare‐fârewec. Eme irec ŋic moczi Ŋokâre maŋ mi mana taraekac, Mamaczi buc ʒâŋitaekac. Erâ Mamacte maŋ iŋuc jaha ŋic moczi mi mana taraekac, Ŋokâzi buc ʒâŋitaekac, erâ Ŋokâzi ŋic moc Mamacte fuŋne mufuacneme e wâc mana taraocmu. Mat 28:18; Joh 3:35; 17:2; Fil 2:9
Jesuzi hefârec‐nâpoekac
28 “Koŋkoŋkehuc jueŋgopieŋ â kiutuc‐ŋopakicne jueŋgopieŋ ŋoŋe mâmâc sasawa norao ware‐fârepie bâgunuc‐ŋopape âke mâteŋ‐ŋopazejec. Mat 12:20; Jer 31:25 29 No buuruc â maŋhuhuŋ jukopacte warepie nore isic râe‐ŋarepe fuŋne‐nane mana‐hâmonʒepieŋ. Eme qâqâtâc‐ŋeŋic jumana‐hâmozejec. Jer 6:16 30 Nore isic i urucne â nore tagi i afecne.” Joh I 5:3