3
Johanezi gie‐ticne fuŋkewec
(Mar 1:2–8; Luk 3:1–18)
1 Dameŋ ira Johane Miti Opâ fufuŋkezi Judaia mâreŋko fua tâcnerâ mâreŋ tuhuo ra juhuc miti kecʒiŋuc muwec: Luk 1:13 2 “Sambâŋte uucmaŋzi maic‐ŋopakacte maŋŋeŋic bârisieniŋ.” Mat 4:17 3 Ŋic erao hâcne porofete Jesajazi dâŋ kecʒiŋuc muwec i qacnewec:
“Mâreŋ tuhuo wiwira fuakac:
Wofuŋte hata bâʒâweniŋ,
â hezu hemasec ekupie wâneŋkeoc.” Jes 40:3; Joh 1:23
4 Johane e ine ŋaqi moc kamele kanʒaŋnezi bakicne i rojuwec erâ becsahac moc ombâŋnao jomawec. Nânâ‐ticne ine baŋac â ɋâuc bisirec nâhuc juwec. Ŋic II 1:8 5 Eme Jerusalem haeonec â Judaia mâreŋkonec â Jordaŋ ʒiŋuc ocniŋuc ŋic heâckerâ erao rafârembiŋ. 6 Erâ sâqocne‐jeŋic mufuapie Jordaŋko opâ rua‐jarewec. 7 Eme farisaio â sadukaio Miti Opâre fisipie honec‐joparâ jazawec: “Homare ɋâric, ŋoŋe sâqocnere okacne fisizo ekac i wisecneniŋte mozi ŋazawec? Mat 12:34; 23:33; Fuf 3:15 8 Ŋoŋe maŋŋeŋic bârisiehuc irec sâcko fârine bâfuaniŋ me. 9 Erâ maŋŋeŋiczi ʒiŋuc mi muniŋ: Nâŋe Abrahamte ɋâricfâc. No ŋazape mananiŋ, Anutu e muzo murâ sâcne mume qânâ ʒizi Abrahamte ɋâric fuaniŋmu. Rom 2:28, 29; 4:12; Joh 8:33, 39 10 Râric biac jâcfuŋko râekicne. Irec jâc moc fâri tâmiric domame qafararâ ʒocko rikezo. Luk 13:6–9; Joh 15:6 11 No maŋŋeŋic bârisieniŋte opâ sawa rua‐ŋareekopac. Râpefuŋ‐naneo warehuc jukac e ine tâpiri sâc moc focnekac, e sâko no iŋucne maczi mafahe decnepe mi sâckeocmu. Eki hâcne Tiri Mâro â ʒoc rua‐ŋareocmu. Joh 1:15, 26, 27, 33; Apo 1:5 12 E oofaŋ‐ticnehec warerâ nânâfic‐ticne ʒumururuckeocmu, ehuc nânâ fârine wosâerâ ficko râeme ŋeocmu, â jawa rasa wiac ofaŋne behec eme ʒocsanaŋko ʒaocmu.” Mat 13:30
Johanezi Jesu Miti Opâ ruacnewec
(Mar 1:9–11; Luk 3:21–22; Joh 1:31–34)
13 Dameŋ ira Jesu e Galilaia mâreŋkonec Jordaŋ opâo rarâ Johanezi Miti Opâ ruacneocte âzâcnewec. 14 Eme Johane e maname ŋemâckeme ʒiŋuc âzâcnewec: “No iŋucnerao wemocte ware mukic? Goki no rua‐naretec sâckezac.” 15 Mume Jesuzi dâŋ kecʒiŋuc bâtikiecnewec: “Go miŋecgac manabâc behec, eme rereŋ gie jaha bapere sâckeoc.” Iŋuc mume Johanezi manacnewec. 16 Eme Jesu e opâ ruarâ izia Jordaŋkonec wefu wefuhuc honeha mi sambâŋ aŋkeme Anuture Mârozi hapâ tinac waha ere faio hezejec i! 17 Eme izia sambâŋkonec dâŋ moc ʒiŋuc wahawec: “Keci joroc Ŋokâ biaŋ‐nane, e hone aŋac ecneekopac.” Mat 17:5; Mi Mâ 2:7; Jes 42:1