JOHANE
Johane mamac‐ticne ʒâŋene Zebedaio â neŋgoc‐ticne Salome. Hahac‐ticne ʒâŋene Jakobo. Jaŋe Galilaia mâreŋko jumbiŋ. Hahac ɋazi mamac‐jekic bafickepire Genesarete riqicko qowi rojumbieŋ. Johane â Jakobo jahe Johane Miti Opâ fufuŋkezi fua tâcneme erao ra jupic. Eme eki juku motecfâcne Jesu jowatume jahe manarâ izia Jesurao rapic (Johane 1:37–40). I Judaia mâreŋko ekicne. Eme irecnec raku Galilaia mâreŋko fisirâ qowi gie mocwâc bahapire Jesu ijaha fisirâ hefârec‐jofame jahe mamac‐jekic â woke qowi beherâ Jesu bâjâpehuc jupic (Mareko 3:17). Johane â hahac‐ticne jahe ŋic ʒocne fârone, irec dameŋ mocko Jesuzi Samaria ŋic jaŋerao sambâŋkonec ʒoc mume wahaocte âzâcnepic (Luka 9:54). Ʒoaŋ mocko neŋgoc‐jekiczi Jesurao rarâ ʒiŋuc muhuc numucnewec: Juku Wofuŋ Sâko fua tâcnezokic dameŋ ira manatec ŋokâ jahec‐nane gâjoŋgao ŋifec â ŋifec ŋezepirec (Mataio 20:20). Jesuzi motecfâcne Ŋafe Tiwâ gumec‐jopawec ŋafe ira Johanezi Jesure maŋfuŋko ŋehuc qizec‐ticne Jesure amecko fohorewec (Johane 13:25). Râsi jaŋe Jesu ropie motec gâcne hâbi gogoroŋ ejare‐fâreme wisehapie Johane e mocjahazi Jesu bâjâperâ Hanasi ere sacmaŋko raʒiwec, erâ wâc Goligata ferâ Jesure maripoŋ maŋfuŋnao domawec. Domahame Jesuzi neŋgoc‐ticne Maria hone soŋaŋ ecneocte âzâcnewec (Johane 19:26). Jesu faharewec biŋene manarâ Johane e Petorohec gasackerâ ʒâŋeruŋko rapic (Johane 20:34). Eme juku Jesuzi motec gâcne Genesarete riqicko fua‐jareme Johane eki hâcne biac ʒâŋitawec (Johane 21:7).
Jesu e sambâŋko fehame Johane â Petoro jahe babafic erâ miti gie bahuc jupic. Ehuc ʒoaŋ mocko ŋicpuriŋ moc taha ufuŋ motâcko ŋewec e bâpiaŋkepic (Aposolo 3). Erâ wâc Samaria mâreŋko mâmâc rarâ miti murâ numupire ŋic ŋokac jaŋerao Mâro wahawec (Aposolo 8). Eme Johane eki hâcne Jerusalem haeo Jesure kikefuŋ jumbiŋ jaŋere jâcne erâ juwec. Juku Jerusalem hae tuhutac fuame Johane e Efeso haeo rarâ juwec. Ehuc Paulo â Petoro jahe hâmopicte eki Asia mâreŋ masunao hae sâc miti mamana jumbiŋ jaŋe mamac ejarewec.
Efeso haeo juhame miti ŋic ŋokac jaŋe Johane numucnekupie Jesure binaŋ qâreŋkewec. Jesure motecfâc gâcne hâmo‐fârehapie Johane e buc juhuc miti papia‐ticne qâreŋkewec. Qâreŋkehuc Mataio â Mareko â Luka jaŋere dâŋ hâsine i papia‐ticnao mi râewec. Aricne, i getâckehuc dâŋ furune gâcne fowec i qâreŋkewec. Jesuzi mâsi bawec irec binaŋ ŋic gâcnezi qâreŋkembiŋte i behehuc, mitidâŋ gâcne murawec i mana wosâerâ qâreŋkewec. Â mâsi â eebapa‐ticne gâcne ine moc moc sawa mufuahuc ira iticnerâ Jesure mickonec dâŋ hukicne birine birine ʒuhuckewec. Ŋafeo roniŋte dameŋne maickeme Jesuzi motecfâcne mâzoc‐jopahuc uŋdâŋ â miriŋdâŋ jazawec i â dâŋ gâcne gâcne i Johanezi qâreŋke‐fârewec. Johanezi Jesure Biŋebiaŋ qâreŋkeme hatane moc fuawec irec fuŋne e jahac mufuakac, kecʒiŋuc: “Qâreŋkekicne mac kecʒi ine ʒiŋucte qâreŋkekicne: Ŋoŋe wose manac erâ Jesu e Kristo, Anuture Ŋokâ, dâŋ i mana ʒakienʒepieŋ, erâ e jahacne manasiŋkehuc ʒâŋe biŋe‐ticnere erâ juju sanaŋhec enʒepieŋ” (Johane 20:31).
Papia maŋnao dâŋ neŋgocne birine birine râe rakicne ine kecʒiŋuc:
Gaŋ 1:1–18. Jesu e Anuture Micdâŋzi mâreŋko sahac biuhec fuawec. Dâŋ izi papia‐ticnere mumuʒâwe dâŋ ekac.
Gaŋ 1:19–51. Johane Miti Opâ fufuŋkezi gie‐ticne fuŋkehuc Jesure fuŋne mutaniŋkewec. Â Jesu e fuŋkerâ motecfâcne rocjopahuc fuŋne‐ticne jazawec.
Gaŋ 2—12. Jesu e gie‐ticne bahuc â miti muhuc Wofuŋ eri tatamac‐ticnere fuŋne bataniŋkewec.
Gaŋ 13—17. Jesu e motecfâcne mâzoc‐jopahuc sambâŋ tatamac‐ticnere fuŋne mufua‐jarehuc sambâŋ hata jaza jowatuc ewec.
Gaŋ 18—19. Jesu ʒâic mamana â hâmoc‐ticnere binaŋ.
Gaŋ 20—21. Jesu e hâmockonec faharerâ motecfâcne fua‐jarewec irec binaŋ gâcne.
1
Jesu e Anuture Micdâŋ
Micdâŋ e fuŋnao fuŋkerâ juwarehuc juwec. Erâ Micdâŋ e juju‐ticne Anuturao foha juhuc juwec. Erâ Micdâŋ e Anutu jaha wâc juwec. Joh I 1:2; Joh 17:5; Bar 19:13 E hâcne fuŋnao Anutuhec jurâ juwarewec. Muq 8:22 Erâ Micdâŋ e Anuture me wâc ehuc wiac sasawa bâfua‐fârewec, â wiac fuawec i e tâmiric moc mi fuawec. Kol 1:16, 17; Heb 1:2 Erâ juju irec rune erâ juwec. Â juju‐ticnezi ŋic tamae‐jarewec. Joh 5:26 Eme tatamaczi dapâcko tamaeme dapâczi guriŋkeocte eipiewec. Joh 3:19
Ŋic jaŋe Jesu âgo sâcne mi ecnembiŋ
Ŋic moc fuarâ juwec ʒâŋene Johane. Luk 1:13–17, 57–80; Mat 3:1; Mar 1:4 Eki tatamacte biŋedâŋ mufuame ŋic mâmâc sasawa jaŋe tatamac rune manasiŋkeniŋte Anutuzi sorewec. Luk 3:3 Johane e jahacne tatamac rune mi juwec, e mâc tatamac runere biŋe muwec. Joh 1:20 Tatamac rune ŋic mâreŋ sâc batamaec‐jopaekac, eki hâcne dameŋ ira mâreŋko fuarâ juwec. 10 E mâreŋko fufua i fuawec, erâ i sawa mâcne, mâreŋ i ekizia wâc bâfuawec, eme waharâ fuame mâreŋkonec ŋic jaŋe e sifu mi ʒâŋitambiŋ. Joh 1:3–5 11 E jahacne me hofao fisihame gurufâc‐ticne jaŋe âgo mi ecnembiŋ. 12 Â âgo ecnembiŋ jaŋe ine Anuture naru motecfâc eniŋte hata bâfua‐jarewec, i ʒâŋe‐ticne mana maŋ eeŋgopieŋ jaŋe hâcne iŋuc ejareekac. Gal 3:26 13 Jaŋe soc biucte hatao mi fuambiŋ, erâ ŋic mumupaŋte wâc mâcne, jaŋe Anuturaonec fuambiŋ. Joh 3:5, 6
14 Eme Micdâŋ e sahac biuchec fuarâ ŋondeŋ‐nâŋecko ŋeŋe juju ewec. Eme nâŋe Wofuŋ qâreŋ‐ticne honepene Mamacte Ŋokâ jâmbâŋ mocjaha ere Wofuŋ qâreŋ ewec hâcne. E aki anonoc kadahe â dâŋ fâri qizecne bawahawec. Jes 7:14; Pet II 1:16, 17; Jes 60:1; Luk 9:32 15 Fuŋne‐ticne ine Johanezi mutaniŋkerâ hahaŋne bahuc kecʒiŋuc muwec: “No ere hâcne ŋazapo, ʒâhec warekac e bâbâni juwec, eki no mi fuahape juwarehuc juwec hâcne.” Joh 1:27, 30; Mat 3:11 16 Nâŋe sasawa ere rowaŋkonec miti kadahe rorâ ro ehuc jumbeŋ. Joh 3:34; Kol 1:19 17 Mose e sâcmutâc dâŋ nârewec, â Jesu Kristo eki ine aki anonoc â dâŋ fâri qizecne tahac‐nâpowec. Rom 6:14; 10:4; Wah 34:6; Mi Mâ 25:10; 40:10; 85:10 18 Anutu e ŋic moczi moc mi honewec, Ŋokâ jâmbâŋ mocjaha, Mamacte bufuŋko juekaczi ine biŋe‐ticne bawaharâ mufua‐nârewec. Joh 6:46; Joh I 4:12; Mat 11:27; Luk 10:22; Tim I 6:16
Johane Miti Opâ fufuŋke ere dâŋ
(Mat 3:1–12; Mar 1:7–8; Luk 3:15–17)
19 Jerusalem haeonec Judaŋic jaŋe taha bapa â taha ufuŋte kiŋaŋŋic sorec‐jopapie Johanerao rarâ, go mo ŋic mo, muhuc wiocnepie fuŋne‐ticne jazawec. Luk 3:15, 16 20 E fuŋne‐ticne mi hesoŋkehuc mutaniŋkerâ kecʒiŋuc jazawec: “No Kristo aricne.” Apo 13:25 21 Mume jaŋe harierâ wiocnembiŋ, “Eme go mo, go Elia me?” Eme muwec, “No e aricne.” Eme mumbiŋ, “Go porofete‐nâŋec me?” Mupie muwec, “Aricne.” Mat 17:10; Sâc 18:15; Joh 6:14; 7:49 22 Eme jaŋe mumbiŋ: “Wiac go mo? Sorec‐nâpopie warembeneŋ, ra weniŋuc jazanaŋmu? Go gahacnere weniŋuc muekic?” 23 Eme jazarâ muwec: “Porofete Jesajazi mu qâreŋ ewec, i norao sanaŋkekac. No biŋe mumu ŋic, mâreŋ tuhuo juhuc kecʒiŋuc muekopac: ‘Wofuŋte hata bâʒâweniŋ.’ ” Jes 40:3; Mat 3:3; Mar 1:3; Luk 3:4 24 Ŋic Johanerao fisimbiŋ i jaŋe farisaio jaŋere guruonec. 25 Irec mocwâc indiŋkerâ mumbiŋ: “Go Kristo aricne, â Elia aricne, â porofete aricne, eme wemocte ŋic Miti Opâ rua‐jareekic?” Mat 21:25 26 Mupie Johanezi ʒiŋuc jazawec: “Noni ŋic opâ sawa rua‐jareekopac, â ŋondeŋ‐ŋeŋicko moc fuawec jukac, ŋoŋe e mi hone taraeŋgopieŋ, Mat 3:11; Mar 1:7, 8 27 eki hâcne râpefuŋ‐naneo warehuc jukac, e sâko no iŋucne maczi mafahe decnepe mi sâckeocmu.” Joh 3:26; Apo 13:25 28 Wiac i Betania haeo Jordaŋ ocniŋucnao fuawec. Ira hâcne Johanezi juhuc ŋic Miti Opâ rua‐jarewec. Mat 3:6, 13
Johanezi Jesure fuŋne jazawec
29 Hae fureme Jesuzi Johanerao rame taicko honerâ ŋic ʒiŋuc jazawec: “Honeniŋ, kecocni Anuture lama, eki mâreŋ sâc ŋic sâqocne‐jeŋic fainao feme âsickekac. Joh 1:36; Jes 53:7 30 Ere hâcne kecʒiŋuc ŋazapo: ‘Ʒâhec warekac, e bâbâni juwec, eki no mi fuahape juwarewec.’ Joh 15:27 31 No nahac mârâc e mi hone tarapo. Israe ŋic ŋoŋe biŋe‐ticne ŋazape mananiŋte hâcne fisirâ Miti Opâ fuŋkepo.” 32 Johane e iŋuc murâ muwec: “No Mârozi hapâ hawario sambâŋkonec waharâ fai‐ticnao herâ ŋeme honepo. Mat 3:16; Mar 1:10; Luk 3:22 33 No nahac mârâc mi hone tarahape Miti Opâre munareweczi ʒiŋuc nazawec: ‘Mâro waharâ fai‐ticnao herâ ŋeme honecmu eki ŋic Tiri Mâro rua‐jareocmu.’ Luk 3:2; Mat 3:16 34 No i hâcne honepore fuŋne‐ticne kecʒiŋuc mupo: ‘Eki hâcne Anuture Ŋokâ.’ ” Mat 3:17
Ŋic tucne jaŋe Jesu bâfuambiŋ
35 Hae fureme Johane erâ motecfâcne jaŋeraonec jajahec mâreŋ ijaha domambiŋ. 36 Domahapie Jesu e ijaha fotâcneme honerâ motec jasarâ muwec: “Honenic, Anuture lama kecocni.” Joh 1:29; Jes 53:7 37 Mume jahe dâŋ i manarâ Jesure râpefuŋko rapic. 38 Rapire Jesuzi forisierâ honec‐jofarâ muwec: “Ŋohe wemocte warekopirec?” Eme jahe mupic: “Rabi (nâŋâcne dâŋko: Qaqazu), go fic wena jukomec?” 39 Eme ʒiŋuc jasawec: “Ware honenic.” Mume jahe bâjâperâ fic honerâ ʒoaŋ gie bapa ira juweckoa jupic. I ʒoaŋ otewezo eha iŋuc epic. 40 Johanere dâŋ manarâ Jesu bâjâpepic moc ʒâŋene Anderea, Simoŋ Petoro ɋaticne. Mat 4:18–22 41 Eme eki biac hahac‐ticne Simoŋ bâfuarâ ʒiŋuc âzâcnewec: “Nâhe Mesia (Kristo hâcne) bâfuakoperec.” Sam I 2:10; Mi Mâ 2:2 42 Iŋuc murâ Jesurao jowame rapic. Eme Jesuzi honerâ muwec: “Go Simoŋ, Johanere ŋokâ, gore ʒâŋe Kefa mukopac” (nâŋâcne dâŋko: Haroŋaŋ). Mat 16:18; Mar 3:16
43 Hae fureme Jesu e Galilaia mâreŋko raocte ʒawierâ Filipo bâfuarâ âzâcnewec, “Go bâjâpecnuc.” Mat 8:22; Mar 2:14 44 Filipo e Besaida haeonec, Anderea â Petoro jahe hae irecteaŋ. 45 Eme Filipozi Natanae bâfuarâ ʒiŋuc âzâcnewec: “Mose e sâcmutâc dâŋqâhâcko findaŋdâŋ‐ticne qâreŋkewec, â porofete jaŋe wâc qâreŋkembiŋ, ŋic e hâcne bâfuaŋgopeneŋ, Jesu, Josefere ŋokâ, Nazarete haeonec.” Sâc 18:18; Jes 7:14; 53:2; Jer 23:5; Eʒek 34:23 46 Eme Natanaezi dâŋ ʒiŋuc bâtikiecnewec: “Nazarete haeonec wemo wiac bipinehec fuaocmu?” Mume Filipozi ʒiŋuc âzâcnewec: “Murâ ware honec.” Joh 7:41, 52 47 Eme Natanaezi Jesurao ra fisime honerâ muwec, “Honeniŋ, ŋic kecizi Israe ŋic fârine, maŋticnao sioc moc mi fokac.” Mi Mâ 32:2; 73:1; Fuf 25:27 48 Iŋuc mume Natanaezi wiocnerâ muwec: “Go wena jupe honecnumeŋ?” Eme Jesuzi muwec, “Filipozi mi hefârecguhame nemuja fuŋko ŋetec honecgupac.” 49 Mume Natanaezi ʒiŋuc âzâcnewec: “Qaqazu, go jâmbomac Anuture Ŋokâ, Israe ŋic nâŋere ŋicwofuŋ.” Sam II 7:14; Joh 6:69; Mi Mâ 2:7; Mat 14:33; 16:16 50 Eme Jesuzi muwec: “Nemuja fuŋko ŋemec i mufua‐garepe manasiŋnukomec, manakic, hone manac ekomec ʒi susucne sawa, fâri ombâŋne miŋecnea hone manac erahuc jucmu.” 51 Iŋuc murâ muwec, “No jâmbomac jâmbâŋ ŋazape: Ŋoŋe sambâŋ aŋkeme Anuture aŋelofâc jaŋe Ŋic Fâri Wâtuŋne erao fec wahac epie honec‐jopaniŋmu.” Fuf 28:12; Mat 4:11; Mar 1:13

1:1: Joh I 1:2; Joh 17:5; Bar 19:13

1:2: Muq 8:22

1:3: Kol 1:16, 17; Heb 1:2

1:4: Joh 5:26

1:5: Joh 3:19

1:6: Luk 1:13–17, 57–80; Mat 3:1; Mar 1:4

1:7: Luk 3:3

1:8: Joh 1:20

1:10: Joh 1:3–5

1:12: Gal 3:26

1:13: Joh 3:5, 6

1:14: Jes 7:14; Pet II 1:16, 17; Jes 60:1; Luk 9:32

1:15: Joh 1:27, 30; Mat 3:11

1:16: Joh 3:34; Kol 1:19

1:17: Rom 6:14; 10:4; Wah 34:6; Mi Mâ 25:10; 40:10; 85:10

1:18: Joh 6:46; Joh I 4:12; Mat 11:27; Luk 10:22; Tim I 6:16

1:19: Luk 3:15, 16

1:20: Apo 13:25

1:21: Mat 17:10; Sâc 18:15; Joh 6:14; 7:49

1:23: Jes 40:3; Mat 3:3; Mar 1:3; Luk 3:4

1:25: Mat 21:25

1:26: Mat 3:11; Mar 1:7, 8

1:27: Joh 3:26; Apo 13:25

1:28: Mat 3:6, 13

1:29: Joh 1:36; Jes 53:7

1:30: Joh 15:27

1:32: Mat 3:16; Mar 1:10; Luk 3:22

1:33: Luk 3:2; Mat 3:16

1:34: Mat 3:17

1:36: Joh 1:29; Jes 53:7

1:40: Mat 4:18–22

1:41: Sam I 2:10; Mi Mâ 2:2

1:42: Mat 16:18; Mar 3:16

1:43: Mat 8:22; Mar 2:14

1:45: Sâc 18:18; Jes 7:14; 53:2; Jer 23:5; Eʒek 34:23

1:46: Joh 7:41, 52

1:47: Mi Mâ 32:2; 73:1; Fuf 25:27

1:49: Sam II 7:14; Joh 6:69; Mi Mâ 2:7; Mat 14:33; 16:16

1:51: Fuf 28:12; Mat 4:11; Mar 1:13