1 Dameŋ ira Jesuzi micne bajareme sabata hombaŋko gie ŋondeŋko rambiŋ. Rahuc motecfâcne jaŋe nânâre hâmorâ padi unuckerâ hândâŋne nâmbiŋ. Sâc 5:14; 23:25 2 Iŋuc epie farisaio ŋic jaŋe i hone manac erâ Jesu âzâcne mumbiŋ, “Manakic, motecfâcge wiac eŋgopieŋ i sabata hombaŋko mi eene.” Wah 20:10 3 Mupie ʒiŋuc jazawec: “Dawidi â ŋicfâc‐ticne nânâre hâmohuc wiac embiŋ i ŋoŋe wose manac mi eeŋgopieŋ me? Sam I 21:1–6 4 Jaŋe Anuture ufuŋko ferâ poroŋ furu mukicne nâmbiŋ, poroŋ i e â ŋicfâcne jaŋe mi nânâne, taha bapa jaŋe micbuc‐jeŋic nâniŋte mana‐jarekicne. Tah 24:9 5 Me taha bapa jaŋere sâcmutâc dâŋqâhâc fokac i wose manac mi eeŋgopieŋ? Jaŋe sabata hombaŋko taha ufuŋko gie bahuc hombaŋ sipirickepie bahac mi eekac i. Ʒar 28:9 6 Noni ine ŋazape mananiŋ, mai‐ŋeŋicko domakac e ufuŋ sirickekac. 7 Dâŋqâreŋ moc ʒiŋuc fokac: ‘No tiwâ bâzi rike‐nareniŋte mâcne, jauŋhec juniŋte enarekac.’ Ŋoŋe dâŋ i manarâ muzac, bahac tâmiric ʒi maŋgâŋ dâŋ mi mujarenʒapiŋ. Mat 9:13; Hos 6:6 8 Ŋic Fâri Wâtuŋne e ine sabata hombaŋ irec rune jukac wâc.”

9 Iŋuc murâ irecnec rarâ mitific‐jeŋicko fewec. 10 Eme ira ŋic moc ŋewec e mene ɋaŋakicne. Eme ŋic jaŋe Jesu wiocnerâ mumbiŋ, “Ŋic sabata hombaŋko bâpiaŋ‐jopazo me aricne?” Jaŋe kâuc bahuc mâcne, bahac‐ticne moc bâfuarâ dâŋko râeniŋte manasuhuc mumbiŋ. Luk 14:3 11 Eme Jesuzi micjeŋicko rorâ muwec, “Ŋoŋeraonec moczi lama mocjaha macticne sabata hombaŋko nombâŋko hume hombaŋte erâ beheme foocmu me? 12 Lama e wiac omane, ŋic ŋoŋe ine fârine. Irec sabata hombaŋko eehâmo gie i sâcne bapane.” Luk 14:5 13 Iŋuc murâ ŋic âzâcnewec, “Mege fâretiŋnec.” Mume meticne sicneme biaŋkerâ ŋifecte sâc ewec. 14 Eme farisaio jaŋe i honerâ rafârerâ Jesu qaniŋte dâŋ mumockembiŋ. Joh 5:16

15 Eme Jesuzi i manarâ hae mâreŋ i beherâ mocko rawec. Eme ŋic bocjahazi bâjâpepie bâpiaŋ‐jopa‐fârewec. Mar 3:7–12 16 Eme jaŋe ŋic gâcne fuŋne‐ticne mi jazaniŋte mic muac sanaŋne ejarewec. Mat 8:4 17 Iŋuc eme porofete Jesajazi findaŋdâŋ qâreŋkewec i fârinehec ewec, dâŋ kecʒiŋuc: Jes 42:1–4; 41:9

22 Eme dameŋ ira ŋic moc demoŋzi ecneme tiŋtuŋ â nâŋguŋ ewec e Jesurao barambiŋ. Eme Jesuzi bâpiaŋkeme ŋic e dâŋ dâŋ ewec â ʒâŋe fiwec. 23 Eme ŋic hâmbâŋ sâko domambiŋ jaŋe i honerâ warecke sâqorerâ mumbiŋ, “Dawidire ɋâric wareocte mukicne ʒine hâcne wiac moc?” 24 Mupie farisaio jaŋe dâŋ i manarâ ʒiŋuc mumbiŋ: “Burec, demoŋ jaŋere ŋicbomboŋ ʒâŋene Beezebulu, eki neŋgoc ŋesiŋ ŋecnehame demoŋ jâpec‐jopaekac.” Mat 9:34 25 Eme Jesuzi maŋjeŋicko manarâ jaza muwec, “Mâreŋ moc irec ŋic jaŋe rârâsi kosa epie tuhu fuaocmu. Â hae moc me fic moc irec ŋic jaŋe kikisâ kosa epie hae‐jeŋic tâtieocmu. 26 Sataŋzia fâuckerâ Sataŋ jâpeme, gie‐ticne weniŋuc sanaŋkerâ foocmu? 27 Eme no Beezebulu ere neŋgoc ŋesiŋko demoŋ jâpec‐jopaekopacko, ŋaŋacne motecfâc jaŋe more ŋesiŋko demoŋ jâpec‐jopaeŋgopieŋ? Jaŋe hâcne qoqoric‐ŋeŋicte fuŋne bataniŋkeniŋmu. 28 No ine Anuture Mârozi neŋgoc ŋesiŋ ŋenarehame demoŋ jâpe‐jareekopacko Anuture Wofuŋ qâreŋzi maic‐ŋopakac hâcne. Joh I 3:8 29 Me mozi ŋic momori moc ŋeha ficticnao ferâ mafa jâoc roocmu? I aricne. Ŋic momori qanaŋ hâporâ me kikene qarâ ie mafa‐ticne jâoc rozo. Jes 49:24; Joh I 4:4 30 Moc e âgo mi enareocmuzi râsi enareocmu, â moc e gie‐nane hone maiŋ mi eocmuzi hetâtieocmu. Mar 9:40; Joh 11:52

31 “Irec ŋazape mananiŋ: Sâqocne fuŋne fuŋne â dâŋ gâgâpâcne fuŋne fuŋne irec kiŋ i bebehene fokac, Mâro wiac gâgâpâcne eecne irec kiŋ i bebehene ine mi fokac. Heb 6:4, 6; 10:26; Joh I 5:16 32 Moc e Ŋic Fâri Wâtuŋne musoriŋkeocmu, e sâqocne i bâtâmirecnezo, moc e Tiro Mâro musoriŋkeocmu, e ine sâqocne i mâreŋko me sambâŋko mi bâtâmirecnezo. Luk 12:10; Tim I 1:13 33 Ŋoŋe jâc mocte biaŋne muhuc fâri‐ticnere iŋuc jaha biaŋne munʒepieŋ. Me jâc mocte sâqocne muhuc fâri‐ticnere iŋuc jaha sâqocne munʒepieŋ. Jâcte fuŋne fârinezi bataniŋkeekac. Mat 7:17 34 Homare ɋâric, ŋoŋe sâqocnezi wemo dâŋ biaŋne mo muniŋmu? Maŋko wiac foekac ijaha micko wefuekac. Mat 3:7; Joh 8:43; 12:39; Rom 8:7 35 Ŋic biaŋnezi maŋrowaŋ‐ticne biaŋnaonec wiac biaŋne utuocmu, ŋic sâqocnezi maŋrowaŋ‐ticne sâqocnaonec wiac sâqocne utuocmu. Luk 6:45 36 No ŋazape mananiŋ: Dâŋ racne fuŋne fuŋne irec dâŋgie okac dameŋko banʒoŋgopieŋ. 37 Dâŋ muekic izi fuŋnege bataniŋkeme rocguzo, me dâŋ muekic izi fuŋnege bataniŋkeme behecguzo.”

38 Iŋuc muhuc jazame miti qaqazu â farisaio tucne jaŋe dâŋ kecʒiŋuc bâtikiecnembiŋ: “Qaqazu, go fuŋne qaqa mâsi moc batec fuame honenaŋ.” Mat 16:1; Kor I 1:22 39 Mupie jazawec, “Ŋic hehesicne â miti qiqikiŋ iŋucnezi fuŋne qaqa mâsire muŋgopieŋ me? Ŋoŋe mâsi furune moc aricne, porofete Jonarao fuawec ijaha fuame honeniŋmu. 40 Jona e ŋafe ʒoaŋ jahec â moc qowi sâkore bumaŋko fowec, iŋuc jaha Ŋic Fâri Wâtuŋnezi ŋafe ʒoaŋ jahec â moc mâreŋmaŋko foocmu. Jon 2:1, 2 41 Okac dameŋko ine Niniwe haeonec ŋic jaŋe fuarâ ŋicguru ʒi fuŋne‐ŋeŋic ritupie katucne roniŋmu. I mâc mâcne, Niniwe haeonec jaŋe Jonazi uŋ jazame manarâ maŋjeŋic bârisiembiŋ; â ʒi domakac e Jona sirickekac. Jon 3:5 42 Â juwic mâreŋkonec ŋokac wofuŋ e iŋuc jaha okac dameŋko ŋicguru ʒi fuŋne‐ŋeŋic ritume katucne roniŋmu. Erâ i mâc mâcne, ŋokac e Salomoraonec mamana fârine roocte mâreŋ qaŋeŋnaonec warewec; â ʒi domakac e Salomore sâc sirickekac. Ŋic I 10:1–10

43 “Demoŋzi ŋickonec wefurâ ra tuhuo miti qatarac juhuc ŋeŋe hae‐ticne basaocmu. 44 Basaku muocmu, ‘Ficnane beherâ warepo ijaha mocwâc risiezepac.’ Murâ risierâ honeocmu: Ru tâmiric, ʒure emasaŋ ekicne. 45 Iŋuc honerâ ra demoŋ âgofâc‐ticne 7, e jahacne sâc mâcne, repipicne jâmbâŋ iŋucne rocjopame ware fic ijaha ŋeŋe juju eniŋmu. Eme ŋic e mârâc jaha sâsâqocne juweczi ʒâhec sâqoc qaqore sanaŋkeocmu. Ŋicguru repicne ʒi ŋoŋerao iŋuc hâcne fuaocmu.” Pet II 2:20

46 Jesu e dâŋ i jazahuc juhame râpefuŋ‐jeŋicko neŋgoc ɋafâcne dâŋ âzâcneniŋte woŋec domambiŋ. Mat 13:55 47 Ehame moczi âzâcnerâ muwec, “Manakic, neŋgoc ɋafâcge dâŋ gazaniŋte râpefuŋ‐nâŋecko woŋec domaŋgopieŋ.” 48 Mume Jesuzi ʒiŋuc âzâcnewec: “Neŋgoc ɋafâc‐nane weni jaŋe?” Luk 2:49 49 Iŋuc murâ motecfâcne domambiŋkopec mene sicnerâ muwec, “Honec‐jopaniŋ, neŋgoc ɋafâc‐nane ʒi. 50 Sambâŋ Mamac‐nanere mic reŋkeeŋgopieŋ jaŋe hâcne neŋgoc qo ɋafâc‐nane.” Rom 8:29; Joh 15:14