1 Eme irec faicnao Wofuŋte dâŋzi Jonarao mocwâc fuame jajahec ewec ine kecʒiŋuc: 2 “Ajoc, go ʒawierâ Niniwe hae sâkoo rac, erâ hae rune dâŋ gazape sâc jazazemec.” 3 Iŋuc mume Jonazi faharerâ Wofuŋte micte Niniwe haeo rawec. Niniwe i hae sâko mako ŋewec, hae i fotâcneniŋte rahuc juhapie ʒoaŋ jahec â moc tara jujec. 4 Eme Jona e fuŋkerâ haeo ferâ rahame ʒoaŋ moc tarame dâŋ hahaŋne bahuc kecʒiŋuc muwec: “Ŋafe ʒoaŋ 40 sawa fokac, tarame Niniwe hae siroweocmu.” 5 Eme Niniwe hae rune jaŋe Anuture dâŋ mana ʒakiembiŋ â sowa juju fuaocte ʒâfo bambiŋ, ehuc kâcɋene mecne piticne mecne jaŋe mâmâc mateŋ hepie hufârewec.

6 Eme irec biŋe Niniwe ŋicwofuŋtao ra fisiwec. Fisime manarâ eri ŋeŋe‐ticnaonec waharâ eri ŋaqi‐ticne hetararâ mateŋ jaha heme hume ʒafeo waha ŋewec. 7 Erâ dâŋ kecʒiŋuc râeme raku Niniwe hae sâcke‐fârewec: “Ŋicwofuŋ â fekicnefâc‐ticne jaŋe dâŋ ʒiŋuc muŋgopieŋ: Moczi moc nânâ wiac mi nâjâmbâŋkezejec, ŋic â qowi mecne, lama bulimakao mecne, jaŋe nânâ opâ moc mi nânʒepieŋ. 8 Ehuc ŋic â qowi mateŋ hepie hufâreme Anutu samarierâ kio wâwâsic ecnenʒepieŋ, erâ eebapa sâqocne i ru sâc râpecke‐fârehuc ŋic bâbâʒâic‐jopa i behenʒepieŋ. 9 Iŋuc epene Anutuzi busâqoc mana‐nârehuc maŋne risieme kimbeŋ‐ticnere ʒocbâruŋ bâuruŋkerâ akic‐nâpome mi mecne sirowenaŋmu.”

10 Jaŋe iŋuc ehuc hata‐jeŋic sâqocne râpeckepie Anutuzi honewec. Honerâ busâqoc mana‐jarehuc maŋne risieme okacne fisi‐jareocte muwec i behewec.