1 Iŋuc eme Jona e mâretec mana sâqorerâ aarickewec. 2 Ehame Wofuŋ kecʒiŋuc numucnewec: “O Wofuŋ, no mâreŋ‐naneo juhuc irec hâcne mupo, erâ dameŋ ira iŋucte hâcne Tarasisi haeo rapemurâ wisepo; fuŋnege manapo, go aki anonoc â buurucgehec, kimbeŋge uneŋne â eehâmoge ʒâkâŋnehec, erâ ŋic kiŋ behe‐jarehuc âgo eejare i mai fogarekac. 3 Irec, Wofuŋ, go manahaŋtec hâmozepac; no hâmocte boc enareha jujure takicnukac.” 4 Eme Wofuŋ e dâŋ ʒiŋuc bâtikiecnewec: “Go aaric manakic i sâckekac me?” 5 Eme Jona e haeonec waharâ hae mendâŋko ʒoaŋ wewefuopec boze barâ maŋnao mumucko ŋewec, hae iŋuc me iŋuc fuacneme i honeocte.

6 Ŋehame Wofuŋ Anutu e mume turajâc moc ututuŋ fua sokac ewec, i Jona mumuc biaŋ bâfuacneme bune urueocte. Eme Jona e turare boc aŋackewec. 7 Eme ŋafeo fohapie hae mi fure taniŋkeha Anutuzi paruc moc ecneme fisi tura fuŋne nâŋgârâŋkeme ururuckewec. 8 Izi ʒoaŋ wefume Anutuzi mume ʒoaŋ wewefunaonec mâŋâŋ fârone qawec. Eme ʒoaŋzi Jona qizecnao âeckekume docke sâqorerâ hâmoocte ecneme muwec: “No juju qikiŋnehuc hâmocte manape biaŋkekac.” 9 Eme Anutuzi Jona âzâcnewec: “Go turare aaricgukac i sâckekac me?” Jonazi muwec: “Aaricnukac i sâckekac, â hâmozo mukopac i sâckekac jaha.” 10 Eme Wofuŋzi dâŋ ʒiŋuc bâtikiecnewec: “Go tura giene moc mi bamec â mi jauŋketec fua sokac ejec, i ŋafe mocko fuajec â ŋafe mocko omaejec, eme irec buge sâqorekac. 11 Eme Niniwe hae sâkoo ŋic ŋokac naru motec jaŋere ʒare 120 tauseŋ jâurukac jaŋe hata i me i âteniŋte kâuc baeŋgopieŋ, â bec qowi wemo afecne juŋgopieŋ wâc. Eme jaŋere erâ bunane mi sâqoreocte mukomec me?”