MIKA
Mika e Anuture porofete fârine moc juwec, Jesajare âgo qomâ. Erâ e Jesaja juhame fuarâ juwec jaha.
Judaŋic jaŋe dameŋ ira sindaŋ fuŋne fuŋne ehuc Anutu tatara ecnembiŋte Anutuzi okacne jarehuc qâpuc mana‐jareme ware jopa bâtâtiec ejarehuc ro bacjopa raniŋmu, dâŋ i hâcne Wofuŋzi Mika mufuacneme muropiewec. Irec dâŋticne i okacne fifisi‐jarere uŋdâŋ sasawa. E gie‐ticne i bahuctecne Israe â Judaŋic sâqocne â kiŋjeŋic mu rituc ejâmbâŋkewec. Eme irec manacnepie boc gâpârewec.
Okacne â uŋdâŋ irec ŋoŋondeŋ ine findaŋdâŋ qâreŋkewec wâc. Biŋe biaŋ kecʒiŋuc qâreŋkewec hâcne: Israe ŋic jaŋe maŋjeŋic bârisiepie Wofuŋzi mocwâc qânusuc‐jopaocmu. Erâ Israe ŋic jaŋere findaŋdâŋ sawa mâcne, Mesiare findaŋdâŋ i mâmâc mu qâreŋ ewec. Uŋdâŋ i ŋic guru sâko me ŋic omane jaŋe sawa mâcne, ŋic fekicne hehesic‐jeŋicte mâmâc jazarâ tutuc qajarehuc hanec‐jopawec. Irec jaŋe boc aaric‐jopame dâŋticne surehuc râsi ecne jumbieŋ wâc.
Mika papia‐ticne bâfâuckepene dâkâne 4 fuakac.
Dâkâne 1, gaŋ 1–3. Uŋsawaŋ dâŋ.
Gaŋ 1 irec maŋnao Israe â Judaŋic okacne fisi‐jareocmu irec uŋdâŋ. Gaŋ 2 ira ine ŋic fekicne â tâpirihec erâ porofete râsifâc‐ticne jaŋere uŋdâŋ fokac. Â gaŋ 3 ira ŋic kâcɋene, mumutara ŋic hâcne, jaŋe tiŋne juju qâsuahuc hehesic boc ejumbieŋte jaŋere uŋdâŋ mecne, erâ porofete burecne â taha bapa jaŋere uŋdâŋ i mâmâc qâreŋkekicne. Erâ Jerusalem hae tâtieocmu irec findaŋdâŋ i qâreŋkekicne fokac wâc.
Dâkâne 2, gaŋ 4–5. Findaŋdâŋ.
Gaŋ 4 ira Zioŋ hae heheɋâre â bâbâpiaŋ irec findaŋdâŋ fokâc. Jerusalem hae i ʒâic busâqoc maŋnao jukaczi juku mocwâc faharerâ bubiaŋ â wama faio juocmu irec findaŋdâŋ hâcne. Gaŋ 5 irec maŋnao ine Dawidi ɋâricne, (Mesiare mukicne) â kikefuŋfâc‐ticne erâ wama dameŋ‐ticne irec findaŋdâŋ fokac.
Dâkâne 3, gaŋ 6—gaŋ 7:7. Uŋsawaŋ dâŋ jaha.
Gaŋ 6 ira sâqocnere sohoŋmaŋko juŋgopieŋ jaŋeweniŋuc ehuc wefurâ biaŋkeniŋmu irec dâŋ qâreŋkekicne. I burec â sioc erâ eeatuc ŋic, Jerusalem hae rune jaŋere uŋdâŋ hâcne. Ʒiŋuc jazakac: “Go wiac tiŋne ebac ehuc maŋjauŋhec erâ Anutugere maio maŋhuhuŋ jucmurâ Wofuŋzi mugarekac hâcne.” (6:8b) Gaŋ 7 ira wâc iŋuc jaha juju â eebapa‐jeŋic sâqocne irec mu tutuc â uŋ sawaŋ ejarekicne.
Dâkâne 4, gaŋ 7:8–20.
Dâkâne irec maŋnao ine Zioŋ kikefuŋte nunumu gae jahec â moc qâreŋkekicne fokac. Erâ nunumu gae wiac i findaŋdâŋ tinac jaha.
1
Samaria â Jerusalem jahere uŋdâŋ
1 Jotam, Ahaʒi â Hisikia jaŋe Judaŋic jaŋere ŋicwofuŋ tuczi tuc juwefumbiŋ dameŋ ira Samaria â Jerusalem hae jahere erâ Wofuŋte dâŋ ŋic moc ʒâŋene Mika, Morese haeonec, erao fuame hone manac ewec ine kecʒiŋuc:
2 O ŋic gurune gurune ŋoŋe mana‐fâreniŋ,
erâ mâreŋ sâko mâreŋ â fainao wiac
fusucmarâ foraŋgopieŋ ŋoŋe hazec râe‐fâreniŋ,
ehame Wofuŋ Anutu e tiri ufuŋ‐ticnaonec waharâ
fuŋne‐ŋeŋic rituzejec.
3 Manaŋgopieŋ, Wofuŋ e faharerâ
ŋeŋe hae‐ticnaonec waharâ
mâreŋ facne sâc âtehuc raocmu.
4 Baŋac sâfâ ʒocko rikepene docke ʒaŋ eekac,
me opâzi hârâcko qambaraŋkerâ huekac,
irec sâc tiki jaŋe Wofuŋte kike rurumaŋko docke ʒaŋ eniŋmu,
â wâneŋ jaŋe fâuckeniŋmu.
5 Wiac i sasawa Jakobore kikefuŋ qaqatara‐jeŋicte
â Israe kikefuŋ hehesic‐jeŋicte erâ fuaocmu.
Jakobore kikefuŋ jaŋere qaqatara irec fuŋne wena fokac?
I Samaria haeo hâcne!
 Juda kikefuŋ jaŋere hehesic i wena fuaekac?
I Jerusalemko hâcne!
6 No irec hâcne Samaria hae ima bape sesucne fuarâ fozejec,
eme waiŋ gie he sarac eere mâreŋ efârezejec.
No qânâ wiac‐ticne tuŋkepe wâneŋko hufâreme
hobeteŋ‐ticne tâtâc fuarâ fozejec.
7 Ɋâŋ qâqâtâc‐ticne henʒaŋ qanʒaŋne‐fârezo,
â wiac tahackekicne i ʒoczi ʒâseŋkezejec,
eme no nemuɋâŋ‐ticne ima bafârepemu;
jaŋe boe saure furizi kitâc‐jopawecte
mocwâc boe saure furi jaha enʒepieŋ.
8 No ine wiac fuaocmu irec kio uu epemu,
ehuc ŋaqi faine hetararâ kikehuhu tâmiric mâc jupemu;
no busâqoc ehuc kâte qâto iŋucne qâu qapemu,
â qera motecne iŋucne fuŋgaŋkepemu.
9 Sisipiric fisi‐jarewec i mocwâc bâbârâriene mi ekac,
biac Juda mâreŋko fotâcnerâ fisiwec,
erâ ŋicfâc‐nane jaŋere motâcko,
Jerusalem haeo hâcne warekac.
10 Ŋoŋe irec dâŋ Gati haeo mi musokanʒepieŋ,
erâ moc mi kionʒepieŋ;
Bete‐Leafara haeo rufemaŋko foc forisic ehuc risimbiŋne qanʒepieŋ.
11 O Safiri hae rune,
ŋoŋe hata‐ŋeŋicko mimi busâqoc faio raniŋ,
Zanaŋ rune jaŋe hae‐jeŋickonec mocwâc mi wahaniŋmu,
â Bete‐Ezele haere busâqoczi ŋoŋerao fotâcnerâ fokac.
12 Wofuŋtaonec wiac hâhâwicnezi Jerusalem haere motâcko fisikacte
Maroti hae rune jaŋe jujuhâmore woŋec ŋeipieŋgopieŋ.
13 O Lakisi hae rune, ŋoŋe becâsic umbika râe‐jarehuc
keretac fâreniŋte baʒawiec‐jopaniŋ,
ŋoŋe hâcne Zioŋ kikefuŋ hehesicte micne bajarembiŋ,
erâ Israere qaqatara i ŋoŋerao fua taniŋkewec.
14 Ŋoŋe Morese‐Gati hae rune mâmâzoc papia jarenʒepieŋ;
Akaʒibi fic hae i nâŋere biŋe ŋekac,
Israe ŋicwofuŋ jaŋe iŋuc muhapie dâŋjeŋic racne ezejec.
15 O Maresa kikefuŋ, noni mupe
bomboŋ ɋâricne moc fua‐garerâ raucguzejec;
Israere ʒâŋe biŋe omaeocmu,
irec sâc jaha Adulam hae omaezejec.
16 Naru motec jorocfâc‐ŋeŋic jaŋere busâqocte erâ
qizec‐ŋeŋic rorâ utu pârâc junʒepieŋ;
jaŋe behec‐ŋoparâ kâpâcwâruo raniŋmure
ŋafe wipe iŋucne utu pârâc erâ junʒepieŋ.