8
Jesuzi ŋic moc wicsanaŋhec bâfâsâewec
(Mar 1:40–44; Luk 5:12–14)
1 Jesuzi tikionec wahahame ŋic ŋokac guru sâkozi bâjâpembiŋ. 2 Ehame ŋic moc wicsanaŋhec eki maŋfuŋ‐ticnao rarâ fodaperâ ʒiŋuc muhuc âzâcnewec: “Wofuŋ, go tâpirige fokacte wicnane bâsomiezo murâ sâcne bâsomie‐narecmu.” 3 Mume Jesuzi meticne sicnerâ sahac‐ticne bâuahuc muwec, “I mana‐garekopacte wicge somieoc.” Mume izia wicticne somieme sahacne biaŋke‐fârewec. 4 Jesuzi iŋuc ecnerâ muwec, “Go irec biŋe ŋic moc mi jazazemec, ra sahacge taha bapa jâututec honezejec. Ehuc Mosere micdâŋko bâzi riketec wiac fuajec irec fuŋne mana taranʒepieŋ.” Mat 9:30; Mar 7:36; Luk 17:14; Tah 13:49; 14:2–32
Kiŋaŋ motec moc hucticne bâniniŋkewec
(Luk 7:1–10)
5 Eme Jesuzi Kafanaum haeo ra fehame momori soŋaŋ moczi erao fisirâ wâsickehuc ʒiŋuc muwec: Joh 4:47 6 “Wofuŋ, kiŋaŋ motec‐nane ʒâic ŋemâcne ecneme puriŋ erâ fokac.” 7 Mume âzâcnewec, “Noni fârâ bâpiaŋkepemu.” 8 Iŋuc âzâcneme momori soŋaŋzi dâŋ ʒiŋuc bâtikiecnewec: “Wofuŋ, no ŋic wemo biaŋnere nore ficko fâcmu, go ʒira juhuc dâŋ sawa mutec motec‐nane biaŋkeocmu. 9 No fekicne jaŋere kiŋaŋ qaqa, â nore wahamicne momorifâc‐nane juŋgopieŋ wâc. Eme jaŋeraonec moc ‘rac’ mupe raocmu, moc ‘warec’ mupe wareocmu, â kiŋaŋ motec‐nane ‘gie i bac’ mupe baocmu.” 10 Mume Jesuzi dâŋ i manarâ seckehuc, bâjâpembiŋ jaŋe jaza muwec, “No jâmbomac ŋazape, Israe ŋic ŋoŋerao mamanasiŋ sâc iŋucne mi bâfuaekopac. Mat 15:28 11 Irec ʒiŋuc ŋazakopac: Ʒoaŋ wewefunaonec â huhunaonec ŋic bocjahazi fisirâ Abraham, Isaka â Jakobo jaŋehec sambâŋte uucmaŋko tumaŋnehuc tiwâ bâzi nâ ʒeri eniŋmu. Luk 13:28, 29; Jes 49:12; 59:19; Mal 1:11; Mi Mâ 107:3 12 Ehame sambâŋte mârâc hefârec‐jopakicnezi ine dapâcko hurâ ki oowa ehuc mic kikiaric kiniŋmu.” Mat 22:13; 24:51; 25:30 13 Iŋuc murâ momori soŋaŋ ʒiŋuc âzâcnewec: “Go rac, mamanasiŋgere fârine fua‐gareoc.” Eme kiŋaŋ motec‐ticne dameŋ ijaha jâmbâŋ biaŋkewec. Mat 9:29; 15:28
Ŋic ŋokac gâcne hucjeŋic bâniniŋkewec
(Mar 1:29–34; Luk 4:38–41)
14 Eme Jesuzi Petorore ficko ferâ safeŋ‐ticne huc ʒocnehec fome honewec. Kor I 9:5 15 Honerâ menao bame huc âke niniŋkewec. Eme ŋokac e faharerâ Jesu nânâ rike gumec ecnewec. 16 Ehame hae owâeme ŋic ŋokac demoŋhec bocjaha bacjopa fisimbiŋ. Eme Jesuzi demoŋ‐jeŋic micticnezi jâpec‐jopawec erâ ŋic gâcne huc ʒâic‐jeŋic bâmâteŋke‐fârewec. 17 Iŋuc eme porofete Jesajazi dâŋ kecʒiŋuc qâreŋkewec i sanaŋkewec: “E dodocne‐nâŋec nâwoc rowec â hucnâŋec âsickewec.” Jes 53:4
Jesu bâjâpenaŋte dâŋ
(Luk 9:57–60)
18 Ŋic ŋokac bocjahazi Jesurao fisi orâŋkepie honec‐joparâ motecfâc‐ticne riqic ocniŋucnao wokecke raniŋte jazawec. Mar 4:35; Luk 8:22 19 Eme razo ehapie miti qaqazu moczi maŋfuŋnao rarâ ʒiŋuc âzâcnewec: “Qaqazu, go ira me ira razo mutecne no bâjâpecgupemu.” 20 Mume Jesuzi dâŋ kecʒiŋuc bâtikiecnewec: “Qowi jaŋe hawec‐jeŋichec â sawa wipe jaŋe sareŋ‐jeŋichec, Ŋic Fâri Wâtuŋne e ine fofo roŋgâŋ basaekac.” Kor II 8:9 21 Eme qâjâpecfâcne jaŋeraonec moczi âzâcnewec, “Wofuŋ, manatecne qanaŋ rarâ mamac‐nane duckerâ warezepac.” Ŋic I 19:20 22 Mume Jesuzi ʒiŋuc âzâcnewec: “Go bâjâpecnuhaŋtec qâŋɋâŋzia qâŋɋâŋfâc‐jeŋic ducjopanʒepieŋ.” Joh 1:43; 5:25; Rom 6:13
Mâŋâŋzi micne reŋkewec
(Mar 4:36–41; Luk 8:23–25)
23 Iŋuc murâ wokeo feme motecfâcne jaŋe fepie rambiŋ. 24 Rahapie onʒoŋ jaha mâŋâŋ hâhâwicne fisirâ qame riqic sâqoreme sirizi wokemaŋko huwec. Ehame Jesu e guŋ fowec. Mi Mâ 4:8 25 Eme motecfâcne jaŋe ra wiwickerâ âzâcnembiŋ, “Wofuŋ, ŋezic‐nâpoc, opâo huzo eŋgopeneŋ.” 26 Mupie ʒiŋuc jazawec: “Mamanasiŋ gogoroŋ, ŋoŋe wemocte maŋŋeŋic biac betaŋkekac?” Iŋuc jazarâ faharerâ mâŋâŋ â riqic muac‐jofame benoŋ bawec. Mat 14:31; 16:8 27 Eme ŋic jaŋe i honerâ bipic‐jeŋic tarame mumbiŋ, “E ŋic mo iŋucne, irec mâŋâŋ â riqic jahe dâŋticne reŋkekopirec?”
Jesuzi ŋic jajahec demoŋ jâpe‐jactewec
(Mar 5:1–17; Luk 8:26–37)
28 Eme riqic fotâcnerâ ocniŋucnao Gadara ŋic jaŋere mâreŋko ra fisiwec. Fisime ŋic jajahec domoŋ‐jekichec ware e bâfuapic. Jahe ʒâŋeruŋ gieonec warerâ momori jâmbâŋ epire ŋic jaŋe hâwic‐jopame ira sicne fotâc mi embiŋ. 29 Eme jahe mi owackehuc ʒiŋuc muzepirec i: “Go Anuture Ŋokâzi weniŋuc enâctecmurâ warekomec? Go dameŋ mi maickeha ʒâic gie nâctezo mukomec me?” Luk 4:41; Pet II 2:4 30 Eme taicko bec guru sâko qondaŋko jumbiŋ. 31 Eme irec demoŋ jaŋe Jesu kecʒiŋuc muhuc numucnembiŋ: “Jâpec‐nâpozo murâ sorec‐nâpotec becmaŋko raʒinaŋ.” 32 Mupie ʒiŋuc jazawec: “Ajoc, wiseniŋ!” Eme jaŋe ŋic jahere maŋkonec wefurâ becmaŋko raʒimbiŋ. Raʒipie bec jaŋe mi heâŋko sururuerâ hurâ juwic riqic ŋewec ira hurâ hâmo‐fârenʒepieŋ i! 33 Eme soŋaŋ jaŋe wiserâ haeo ferâ bec jaŋere binaŋ â ŋic demoŋ‐jekichec jahere binaŋ ŋic mâmâc bajarembiŋ. 34 Bajarepie izia ŋic ŋokac mâmâc sasawa jaŋe Jesu honeniŋte haeonec wahambiŋ. Waha honerâ mâreŋ‐jeŋic beheocte mu hezuc ecnembiŋ.