1 Eme farisaio â sadukaio ŋic jaŋe Jesurao fisirâ mu esâic ecnehuc mumbiŋ, “Go mutec sambâŋko fuŋne qaqa mâsi moc fuame honenaŋ.” Mat 12:38 2 Mupie jazawec, “Ŋoŋe hae ŋafezo eme mueŋgopieŋ, ‘Furic karorac emasaŋkekacte tomâcko ʒoaŋ qaocmu.’ Luk 12:54–56 3 Â hae fureme mueŋgopieŋ, ‘Dudupi sâsâoc fuakacte hoe heocmu.’ Ŋoŋe karorac qânikiŋ irec fuŋne manaeŋgopieŋ, â dameŋ ʒirec fuŋne sâcne mi manaeŋgopieŋ me? Mat 11:4 4 Ŋic hehesicne â miti qiqikiŋ ŋoŋe mâsi moc honeniŋte muŋgopieŋ. Ŋoŋe furune moc mâcne, Jonarao fuawec mâsi i sawa fuame honeniŋmu.” Iŋuc murâ behec‐joparâ rawec. Joh 2:1; Mat 12:39, 40

5 Eme motec jaŋe poroŋte nikec‐jopame foha Jesuhec riqic fotâcnerâ ocniŋucnao fisihuc manasumbiŋ. 6 Ehame Jesuzi ʒiŋuc jazawec: “Ŋoŋe farisaio â sadukaio hâmu goreŋ‐jeŋic bâec bacnehuc paŋsawa junʒepieŋ.” Luk 12:1 7 Iŋuc jazame jaŋe ʒiŋuc muhuc nazaŋ gazaŋ embiŋ: “Poroŋ foha warembeneŋte iŋuc nâzâkac.” 8 Dâŋ muhapie hazec‐ticnao hume manarâ jazawec, “Oi, mamanasiŋ gogoroŋ, ŋoŋe wemocte poroŋ behembieŋ irec nazaŋ gazaŋ eŋgopieŋ? Mat 6:30 9 No wiac epo irec biac nikec‐ŋopawecte mi manasuŋgopieŋ me? No poroŋ memoc izi ŋic 5 tauseŋ gumec‐jopape nâ gapec erâ tiwâne ro qânusuc epie sasac wezimuc fusewec? Mat 14:17–21 10 Â poroŋ 7 izi ŋic 4 tauseŋ gumec‐jopape nâ gapec erâ tiwâne ro qânusuc epie sasac wezimuc fusewec? Mat 15:34–38 11 No poroŋte mi ŋazapac i weniŋucte mi mana tarambieŋ? Farisaio â sadukaio goreŋ‐jeŋicte paŋsawa erâ junʒepieŋ, iŋuc mukopac.” 12 Dâŋ i jazame miŋecne mana‐hâmorâ mumbiŋ, “O, goreŋ jâmbâŋte mi mujec, farisaio â sadukaio miti mumu‐jeŋicte mujec.” Joh 6:27

13 Jesu e Kaisarea hae, ŋicwofuŋ Filipozi mume bambiŋ, i bâqiŋkezo ehuc motecfâcne mu indiŋ ejarerâ muwec, “Ŋic jaŋe Ŋic Fâri Wâtuŋne ere mo muŋgopieŋ?” 14 Eme jaŋe âzâcnerâ mumbiŋ, “Gâcnezi Johane Miti Opâ fufuŋke mueŋgopieŋ, gâcnezi Elia, â gâcnezi Jeremia me porofete moc, iŋuc mueŋgopieŋ.” Mat 14:2; 17:10 15 Iŋuc muhuc âzâcnepie wio‐jarerâ muwec, “Â ŋaŋacne ine nore mo muŋgopieŋ?” 16 Wio‐jareme Simoŋ Petorozi muwec, “Go Kristo, Anutu juju sanaŋ ere Ŋokâ.” Joh 6:69 17 Mume Jesuzi ʒiŋuc âzâcnewec: “Simoŋ Jonare ŋokâ, gore manape ʒerine ekac, mamana i ŋicmaŋkonec mi fua‐garekac, sambâŋ Mamac‐nanezi mujaŋgeŋke‐garewec. Gal 1:15, 16; Mat 17:4, 5 18 Irec gazape manac, go ʒâŋege Petoro,* Kâtedâŋtu: Haroŋaŋ. eme noni haroŋaŋ irec faio kikefuŋ gurufâc‐nane râec‐jopape hârâcte tâpirizi mi qâhoc‐jopaocmu. Joh 1:42; Efe 2:20 19 Erâ no sambâŋ uucmaŋte ki garepemu. Eme go mâreŋko niniŋgiŋ gie batec sambâŋko wâc fârio qaocmu, â mâreŋko gogoroŋ gie batec sambâŋko wâc fârio qaocmu.” Mat 18:18 20 Iŋuc murâ motecfâcne mic muac sanaŋne ejarehuc muwec, “No Kristo jukopac, irec ŋic moc mi jaza‐jâmbâŋkenʒepieŋ.” Mat 17:9

21 Dameŋ ira Jesuzi fuŋkerâ, juku wiac fuacneocmu irec dâŋ motecfâcne mufua‐jarewec. Ehuc Jerusalem haeo feme soŋaŋ â taha bapa micne â miti qaqazu jaŋe wiac gâgâpâcne ecnehuc qapie hâmorâ ʒoaŋ jahec â moc eha ɋârerâ fahareocmu, irec dâŋ jaza‐fârewec. Mat 12:40; Joh 2:19 22 Jazame Petorozi bucko hefârerâ qataracnehuc muwec, “Wofuŋ, Anutuzi ŋezicgume wiac iŋucne mi mac fua‐gare‐jâmbâŋkeocmu.” 23 Mume fotikierâ Petoro ʒiŋuc âzâcnewec: “Sataŋ go râriec, go hata ŋeŋezic enarekic, go dâŋ mukomec i Anuture dâŋ aricne, i ŋicdâŋ ekac.”

24 Dameŋ ijaha Jesuzi motecfâcne ʒuhuckerâ ʒiŋuc jazawec: “Ŋic moczi no bâjâpecnuzo murâ maŋ sahac‐ticnere dâŋ qikiŋnehuc maripoŋ‐ticne hâporâ bâjâpecnuzejec. Mat 10:38, 39 25 Moc e juju‐ticne sakareme sifuckecneocmu, â moc e nore erâ qikiŋneme fuacneocmu. 26 Moc e mâreŋte wiac sasawa hure‐fâreku kinduŋ bânduŋ bajuhame juju‐ticne omaeme wemo wiac fârine focneocmu? Me juju‐ticnere kiwiric wemo wiac rome risiecneocmu? Mat 4:8 27 Manaŋgopieŋ, Ŋic Fâri Wâtuŋne e Mamac‐ticnere tatamaczi fainao uucne riŋkeha aŋelofâc‐ticne amec‐jopame wahaniŋmu, eme ŋic mâmâc sasawa juju bapa‐jeŋicte sâc okacne bazu‐jareocmu. Joh 5:29; Rom 2:6; Mi Mâ 62:12; Muq 24:12 28 No jâmbomac ŋazape: Domaŋgopieŋ ʒi ŋoŋeraonec gâcne hâmoczi mi bâqiŋ‐ŋopaha Ŋic Fâri Wâtuŋnezi waharâ Wofuŋ juju‐ticne tâtâc bâfuame honenʒoŋgopieŋ.” Mat 10:23