1 Jesu e motecfâcne 12 ejareme fisipie demoŋ jâpec‐jopaniŋte â huc wic ʒâic fuŋne fuŋne bâmâteŋke‐jareniŋte tâpiri râe‐jarewec. 2 Aposolo 12 jaŋere ʒâŋe ine ʒiŋuc: Micne Simoŋ, ʒâŋe‐ticne moc Petoro, â ɋaticne Anderea, erâ Jakobo Ʒebedaiore ŋokâ, â ɋaticne Johane. Mar 3:14–19; Luk 6:13–16; Joh 1:40–49 3 Erâ Filipo â Batolomaio, erâ Toma â Mataio takesi roro, erâ Jakobo Alifaiore ŋokâ â Tadaio. 4 Erâ Simoŋ Kananaio â Juda Karioto haeonec, e juku Jesu doc bawec.

5 Eme motec 12 jaŋe hâcne jaza sorec ehuc muwec, “Ŋoŋe qâpuc mâreŋko mi âtenʒepieŋ â Samaria ŋic jaŋere hae ŋerakac ira mi ranʒepieŋ. 6 Israe ŋicguruonec lama qâsoriekicne jaŋe sawa iqic‐jopanʒepieŋ. Mat 15:24; Apo 13:46; Jer 50:6 Mat 4:17; Luk 10:9 7 Rahuc miti ʒiŋuc munʒepieŋ: ‘Sambâŋte uucmaŋzi maic‐ŋopakac.’ 8 Erâ huchec bâgunuc‐jopanʒepieŋ, hâmokicne bâɋârec‐jopanʒepieŋ, wicsanaŋhec bâsomiec‐jopanʒepieŋ â demoŋ jâpe‐jarenʒepieŋ. Erâ wiac furimâc ŋarekicnere furimâc ejarenʒepieŋ. Apo 20:33 9 Moneŋ kâcɋene me piticne moc mi ŋihe amec enʒepieŋ. 10 He mi rupenʒepieŋ, fârire ŋaqi jajahec mâcne, kikehuhuhec mâcne, gunuhec wâc mâcne, mâc metariŋ junʒepieŋ. Gie bapa ŋic jaŋe wiac furimâc jare gumec ezo. Luk 10:4; Tim I 5:18; Ʒar 18:31 11 Hae ira me ira fisirâ qanaŋ haeru fuŋne‐jeŋicte mu wioc enʒepieŋ. Eme mocte manapie sâckeme ere ficko ferâ ijaha ŋeŋe fofo eku ranʒepieŋ. 12 Ficjeŋicko fehuc ʒiŋuc jazanʒepieŋ: ‘Wama ŋoŋerao fozejec.’ Luk 10:5, 6 13 Eme ficrunezi jupie sâckeme dâŋŋeŋic jaŋerao fârinehec ezejec. Jupie mi sâckeme wamadâŋ‐ŋeŋicte fârinezi ŋoŋerao mocwâc risiezejec. 14 Hae mocko me fic mocko qikiŋ‐ŋopahuc dâŋŋeŋicte takic‐jopame râpec‐joparâ ranʒepieŋ, ehuc kike‐ŋeŋickonec gâc wândoc‐jeŋic âteickepie wahazejec. Luk 10:10–12; Apo 13:51; 18:6 15 No jâmbomac ŋazape: Sodom Gomora ŋic okac dameŋko wiac wahakicne ejarehuc hae irec ŋic ine wiac ŋemâcne ejarezo. Mat 11:24; Luk 20:47

16 “Manaŋgopieŋ, lama kâte qâto jaŋere ŋondeŋko mi sosorec‐jopane i noni ŋoŋe hâcne sorec‐ŋopakopac; irec ŋoŋe homa iŋucne aimuŋ junʒepieŋ, erâ hapâ iŋucne siocmâc junʒepieŋ. Luk 10:3; Joh 10:12; Apo 20:29; Rom 16:19; Efe 5:15 17 Ŋoŋe ŋic jaŋere sawaŋ‐ŋeŋic qahuc junʒepieŋ. Jaŋe dâŋfic‐jeŋicko bacŋopa raniŋmu, â mitific‐jeŋicko kâcbiŋzi ŋopaniŋmu. Mat 24:9 18 Erâ i sawa mâcne, ŋoŋe nore motecfâc juŋgopieŋ irec erâ kia â ŋicwofuŋ jaŋerao bacŋopa rapie dâŋgie baniŋmu. Eme ŋoŋe jaŋere maio â qâpuc jaŋere maio sanaŋkerâ miti mutaniŋkenʒepieŋ. Mat 24:14; Apo 25:23; 27:24 19 Jaŋe kiarao râec‐ŋopapie dâŋ weniŋuc munaŋmu muhuc mana mezac mi enʒepieŋ. Dameŋ ira dâŋ muniŋte i Mârozi maŋŋeŋicko râeocmu. Luk 12:11, 12 20 Iŋuc eŋareha dâŋ mupie ŋoŋere dâŋ mi eocmu, Mamac‐ŋeŋicte Mâro maŋŋeŋicko juocmu ere dâŋ eocmu. Joh 14:26; Kor I 2:4 21 Eme hahac moczi ɋaticne doc bame qaniŋmu â mamac moczi ŋokâ‐ticne doc bame qaniŋmu â naru motec jaŋe neŋgoc mamacfâc‐jeŋic kisâ ejarehuc doc bacjopapie jopaniŋmu. Mat 10:35; Mik 7:6 22 Eme ʒâŋe biŋe‐nanere erâ ŋic sasawa jaŋe ŋoŋere manapie aaricnehec eocmu. Eme moc e miti paŋnea barâ domakume dameŋ‐ticne tarame sambâŋ hotâckeocmu. Mat 24:9, 13; Joh 15:21 23 Eme hae mocko juhapie ŋopa jâpec eŋarepie hae mocko wiserâ ranʒepieŋ. No jâmbomac ŋazape: Israe hae sâc ŋerakac i rakupie mi taraha Ŋic Fâri Wâtuŋnezi fisiocmu. Mat 16:28

24 “Moteczi wiʒec‐ticne sisiricke i mi fokac, â kiŋaŋ moteczi bomboŋ‐ticne sisiricke i wâc mi fokac. Luk 6:40; Joh 13:16; 15:20 25 Moteczi wiʒec‐ticnere sâc bâfuame sâckeocmu, â kiŋaŋ moteczi bomboŋ‐ticnere sâc bâfuame sâckeocmu jaha. Ficte micne Beezebulu mucnembiŋte garikiŋfâcne wiac iŋucnea fehuc ejareniŋmu. Mat 12:24 26 Irec jaŋere mi hâwic‐ŋopazejec. Wiac soŋsoŋ fokac i foku mi foocmu, i juku bataniŋkezo, â wiac hemackekicne fokac i foku mi foocmu, i juku qaratie‐fârezo. Mar 4:22; Luk 8:17 27 Noni gâmbuŋko dâŋ ŋazaekopac i guru sâkoo mufuanʒepieŋ, â arec faio ŋazaekopac i hofaoa musokanʒepieŋ. 28 Sahac‐ŋeŋic sawa qarâ qâqâtâc‐ŋeŋic qaniŋte tâpiri basaniŋmu jaŋere mi hâwic‐ŋopazejec, qâqâtâc mecne sahac mecne mâmâc jaha sârockeme hârâcko huocte tâpiri focnekac ere ine hâwic‐ŋopazejec. Jak 4:12 29 Sawa hehetâc wipe e wiac omane, e furine mi bazo, eme Mamac‐ŋeŋiczi mi manaha wemocko moc waha qaocmu. 30 Â ŋic ŋoŋerao ine qizec susuc‐ŋeŋicte ʒare i wâc mana‐fâreekac. 31 Irec ŋoŋe hâhâwicmâc junʒepieŋ, ŋoŋe sawa hehetâc mâcne, ŋoŋe ŋic. Mat 12:12

32 “Moc e ŋic jaŋere maio muɋaɋacnuocmu, e noni iŋuc jaha sambâŋ Mamac‐nanere maio muɋaɋackepemu. 33 Moc e ŋic jaŋere maio mic bacnume e noni iŋuc jaha sambâŋ Mamac‐nanere maio mic bapemu. Luk 9:26 34 Ŋoŋe nore ʒiŋuc mi munʒepieŋ: E wama bâfuaocte wahawec. No wama mâcne, ʒika bâfuapemurâ wahapo. 35 No ŋic bâfâuc‐jopazore wahapo hâcne, irec mame ŋokâ jahe fâfâuc enicmu â neŋgoc motec jahe fâfâuc enicmu â jojoŋao jahe fâfâuc enicmu. Mik 7:6 36 Â ŋic moc e garikiŋfâc‐ticne jaŋeraoneczi kisâ ecneniŋmu. 37 Eme moc e neŋgoc mamac maŋjauŋ kâcɋene ejactehuc no piticne enareocmu, e nore biŋe mi juocmu, â moc e naru motecfâcne maŋjauŋ kâcɋene ejarehuc no piticne enareocmu, e nore biŋe wâc mi juocmu. Sâc 33:9; Luk 14:26, 27 38 Â moc e maripoŋ‐ticne mi hâporâ bâjâpecnuocmu, e iŋuc jaha nore biŋe mi juocmu. Mat 16:24, 25 39 Moc e juju‐ticne ro sakac eocmu, e sifuckecneocmu, â moc e nore erâ juju‐ticne qikiŋneocmu, e ine bâfuaocmu. Luk 17:33; Joh 12:25

40 “Ŋic moc e ŋoŋe hezu hewâneŋ eŋareocmuzi no enareocmu, â no hezu hewâneŋ enareocmuzi sorecnuwec e ecneocmu. Mat 18:5; Luk 10:16; Joh 12:44; 13:20 41 Ŋic moczi porofete moc porofete jukacte hezu hewâneŋ ecneocmu, e porofetere sâc furine roocmu. Â moczi mitiŋic moc mitiŋic jukacte hezu hewâneŋ ecneocmu, e mitiŋicte sâc furine roocmu. 42 No jâmbomac ŋazape, moczi wahakicne ʒi jaŋeraonec moc mac moc, nore motec jukacte, opâ ɋâricne fia gumec ecneocmu, wiac iŋucne maczi furi tâmiric wâc mi foocmu.” Mat 25:40; Mar 9:41