1 Jesu e taha ufuŋkonec waha rame motecfâcne jaŋe erao rarâ ufuŋte ficbiri hone qârâwiŋ eocte esockembiŋ. 2 Eme dâŋ ʒiŋuc bâtikie‐jarewec: “Wiac sasawa ʒi ŋeme honeŋgopieŋ? No jâmbomac ŋazape, râsi jaŋe ufuŋ i heropiepie ŋetâ qâtâtiezokac.” Luk 19:44 3 Eme Oliwa tikio ferâ ŋeme motecfâcne jaŋackoaŋ maŋfuŋnao rarâ wiocnerâ mumbiŋ, “Wiac mumec i wezimucko fuazokac? Erâ go gahacne fifisi dameŋ â mâreŋ hâmoc dameŋ‐ticne maickezo eha wemo sowi mo fuazokac?” 4 Iŋuc mupie Jesuzi ʒiŋuc jazawec: “Juku maŋ bâsifuc eŋarenʒipiŋte sawaŋ‐ŋeŋic qahuc junʒepieŋ. 5 Ŋic bocjahazi fisirâ nore ʒâŋeo âke hotahuc, ‘No Kristo hâcne’ muhuctecne ŋic wemo afecne maŋ bâsifuc ejareniŋmu. Mat 24:24; Joh 5:43; Apo 5:36, 37; Joh I 2:18 6 Erâ ʒika fârine â ojowane fuame manarâ maŋŋeŋic gâckeme dameŋ tarakac mi munʒepieŋ. Wiac i mâc jauraŋne fuaocmu. Dan 2:28 7 Mâreŋne mâreŋne ŋic guru sâko guru pitic jaŋe rârâsi efârerâ ra qa ware qa ehuc qaqac ranʒoŋgopieŋ. Ehame roroczi roroc fuazokac, â homeŋ ra ba ware ba ezokac. Jes 19:2; Bin II 15:6 8 Erâ i mâc gozi kikine sawa fuazokac.

9 “Eme dameŋ ira bugâpâcko râec‐ŋopahuc ŋopa qâhâmoc eŋarenʒoŋgopieŋ. Erâ mâreŋ sâc ŋic jaŋe nore erâ aaric mana‐ŋarehuc qaisoc‐ŋopanʒoŋgopieŋ. Mat 10:17, 22; Joh 16:2 10 Wiac i fuame ŋic bocjahazi miti beherâ doc babac ehuc kikisâ enʒoŋgopieŋ. Dan 11:41 11 Erâ wâc porofete jawane fisirâ ŋic bocjaha maŋ bâsifuc ejarenʒoŋgopieŋ. Mat 7:15; Joh I 4:1 12 Erâ miti ima qaqazi haŋ bame maŋjauŋ i ŋic bocjaha jâmbâŋ jaŋerao omaeocmu. Tes II 2:10; Tim II 3:1–5 13 Eme moc e miti paŋnea barâ domakume ine dameŋ tarame rozo. Mat 10:22; Bar 13:10 14 Eme uucmaŋte Biŋebiaŋ ʒizi haŋ barahuc ŋic gurune gurune fuŋne bataniŋke‐jare‐fâreme dameŋ taraocmu. Mat 28:19; 10:18

15 “Eme porofete Daniezi dâŋ qâreŋkewec i aimuŋ mac wose manac enʒepieŋ. Dâŋ i hâcne sanaŋkeme wiac mamakâcne sisipiric‐ticnehec tiri ufuŋko domame honeniŋmu. Dan 9:26, 27; 12:11 16 Iŋuc honerâ Judaia mâreŋko juniŋmuzi tiki mâreŋko wiserâ ranʒepieŋ. 17 Ehuc moc e hae ʒoŋao juocmuzi ficmaŋ‐ticnao risie ferâ mafa‐ticne mi rozejec. Luk 17:31 18 Â moc e gieo juocmuzi risierâ haeo mi rarâ ŋaqi bilaŋke‐ticne rozejec. 19 Jei, ŋokac kiwecheczi â susuonecheczi ine weniŋuc enʒoŋgopieŋ! 20 Ŋoŋe Wofuŋ numucnepie maname wiwise‐ŋeŋic hoemaŋko me sabata hombaŋko mi fuazejec. Apo 1:12 21 Eme dameŋ ira bâŋeŋkerâ weaŋsicne nânâ femicne sâko fuazokac, sâc iŋucne mâreŋ fuaweckonecteaŋ mi fuawec â ʒâhec wâc mi fuazokac. Dan 12:1; Joe 2:2 22 Eme Wofuŋzi dameŋ i mi bâtâcneme muzac, ŋic moczi miti barâ jukume rorone i mi fua‐jâmbâŋkezac. Fuŋfuŋfâc‐ticne jaŋere erâ ine dameŋ i bâtâcnezokac.

23 “Eme ‘Kristo e ʒira nâŋerao fuakac’, ‘Kristo e ocna jaŋerao fuakac’, dâŋ iŋuc ra mu ware mu epie mi mananʒepieŋ. 24 Dameŋ ira Kristo burec burec â porofete jabane fisirâ mâsi â wiac ʒâŋe furu hâhâwicne bahuc ŋic maŋ bâsifuc ejare‐fâreniŋmu. Ehuc Anuture fuŋfuŋfâc maŋjeŋic wâc bâsifuckeniŋte gie sâko baniŋmu. Erâ jaŋe maŋ bâsifuc eejarene mi fokacte eipieniŋmu. Mat 5:11; Sâc 13:1–3; Tes II 2:8, 9 25 No qanaŋ ŋazakopacte juku fuame mutuc mi enʒepieŋ. 26 Eme irec ‘Mâreŋ tuhuo Kristo fuame honembeneŋ’ mupie mi ranʒepieŋ, me ‘Fic ira me ira fuajec’ mupie i wâc mi mananʒepieŋ. 27 Bâbâriczi ŋifec ʒoaŋ wewefunao bâricneme tatamacnezi ŋifec ʒoaŋ huhunao qataraekac, Ŋic Fâri Wâtuŋne fifisi‐ticne sâc iŋucko fuazokac. Luk 17:23, 24 28 Âsu gâreczi keŋwipe fârec‐jopame fisi tumaŋneeŋgopieŋ. Hio 39:30; Hab 1:8; Luk 17:37

29 “Ʒâic fâro â fific guguriŋ i qaʒueha ʒoaŋ gâpârezokac â mosare tatamac arictac ezokac â bâpiŋzi sambâŋkonec tararâ wahanʒoŋgopieŋ. Ehame sambâŋ qiriŋ qame tâpirine ŋeŋgoroŋkezokac. Jes 13:10; 34:4; Pet II 3:10 30 Eme Ŋic Fâri Wâtuŋne ere maqâreŋ sambâŋko fuame ŋic mâreŋne mâreŋne kio wâwâsic ehapie Ŋic Fâri Wâtuŋne e sambâŋ karorac faio tâpiri huriri sâko‐ticnehec fisime honenʒoŋgopieŋ. Bar 1:7; Mat 26:64; Dan 7:13, 14; Ʒek 12:10; Bar 19:11 31 Eme aŋelofâc‐ticne ejareme jaŋe qeŋ fânâŋ sâko ehuc mâreŋ ŋifec â ŋifec, faic â juwic bâwosâecfâc‐ticne qânusuc‐jopanʒoŋgopieŋ. Kor I 15:52; Tes I 4:16; Bar 8:1, 2; Jes 27:13; Ʒek 2:6; Sâc 30:4

32 “Firindoacte hata fokac irec manasuhuc fuŋne mananʒepieŋ. E âric qame ʒoaŋ dameŋ bembeŋkekac mueŋgopieŋ. 33 Eme ŋoŋe iŋuc jaha, ŋazakopac wiac i fua‐fâreme ʒiŋuc munʒepieŋ: E bâqiŋ‐nâpojec, motâc râpeo domakac. 34 No jâmbomac ŋazape: Mâreŋ ʒirec rune mi sisirowe jufehuc juhapie wiac sasawa fua tarazokac. 35 Sambâŋ â mâreŋ sirowezokopirec, â nore dâŋ ine mi sirowe‐jâmbâŋkezokac. Mat 5:18 36 Erâ wiac fufua irec ʒoaŋ me aua dameŋ ŋic moczi mi mana‐jâmbâŋkekac. Sambâŋ aŋelo jaŋe iŋuc jaha mi manaŋgopieŋ, Ŋokâzi wâc iŋuc jaha mi manakac, Mamac e bucticne manakac. Tes I 5:1, 2 37 Noa juwec dameŋ ira ŋic jaŋe wiac embiŋ, ijaha Ŋic Fâri Wâtuŋne ere fifisi dameŋ maickeha enʒoŋgopieŋ. Fuf 6:11–13; Luk 17:26, 27 38 Jaŋe rumi fisizo ehame nânâ qowi nâmbiŋ, huc ʒocʒu nâmbiŋ, ŋokac nareŋ gareŋ embiŋ. Qâoma iŋuc hâcne ehuc juhapie Noa wokeo fewec. Pet II 3:5, 6; Fuf 7:7 39 Eme izi rumi sâko fisirâ bârârâŋ‐jopawec. Ŋic Fâri Wâtuŋne ere fifisi dameŋko sâc ijaha enʒoŋgopieŋ. 40 Dameŋ ira ŋic jajahec gieo juhapire moc rohuc moc qikiŋnezo. Luk 17:35, 36 41 Ŋokac jajahec nânâ sufiehuc ŋehapire moc rohuc moc qikiŋnezo. 42 Wofuŋ‐ŋeŋiczi dameŋ ira me ira fisiocmu i mi manaŋgopieŋte maŋŋeŋiczi rucjari bahuc junʒepieŋ. Mat 25:13 43 Ŋoŋe fuŋne ʒiŋuc mananiŋ, hae mocte ŋic jaŋe, râsi ŋafe ira fisiniŋmu, dameŋ iŋuc manarâ mâŋɋâri jaha juhuc hae‐jeŋic soŋaŋkeniŋmu. Luk 12:39–46 44 Eme Ŋic Fâri Wâtuŋne e ine dameŋ mi manahapie fisiocmu, irec ŋoŋe wâc ʒawiehuc jaha junʒepieŋ. Bar 16:15

45 “Ŋicbomboŋ moczi kiŋaŋ qaqafâc‐ticne jaŋere soŋaŋ moc râehuc ʒiŋuc âzâcneocmu: ‘No ra juhape go soŋaŋ‐jopahuc dameŋ sâc nânâ qowi sâckoa jarehuc juzemec.’ Eme e weniŋuc jume soŋaŋ miti â micrereŋhec mucnezo? 46 Soŋaŋ e gie mucnekicne i aimuŋ jaha bahuc juhame bomboŋ‐ticnezi fisirâ maname biaŋkeocmu. 47 No jâmbomac ŋazape, e soŋaŋ kâcɋene râehuc wiac‐ticne mâmâc sasawa soŋaŋkeocte mucneocmu. Mat 25:21, 23 48 Me ŋic e soŋaŋ sâqocne juhuc maŋticnezi ʒiŋuc muocmu: ‘Bomboŋ‐nane e jâpec mâcne, juku jaha risiezokac.’ Mi Mu 8:11 49 Iŋuc muhuc kiŋaŋ qaqa qa imac ejarehuc opâ kâteo ra qâoma erâ juocmu. 50 Ehuc ŋicbomboŋ‐ticne fisiocmu dameŋ irec mi mamanasu mâc juhame e ututuŋ fisirâ 51 hetâc qâtâcnerâ miti bâbâsifuc ŋic jaŋere jujuo râeocmu. Ira ki oowa ehuc mic kikiaric kihuc foocmu. Mat 8:12