19
Johane e sambâŋko ʒeri mumuteŋ fuame manawec
1 Eme no sambâŋko ŋic guru sâko jaŋere micʒonʒoŋ tinac manapo, jaŋe musereckerâ ʒiŋuc mumbiŋ:
“Haleluja, bâbâpiaŋ â eri tatamac â tâpiri ɋuŋɋasaŋ,
i Anutu‐nâŋec erao fokac. Mi Mâ 104:35; Bar 11:15
2 Eki hâcne okac babazu gie bame
fârinehec â sâckoa eekac.
Sasec ŋokac sâko e mâreŋ sâc ŋic
sasec qazu‐jarehuc sipiric‐jopawec
ere kiŋtofa bazuwec,
ehuc ŋicfâc‐ticne jaŋere socte kiŋ
fowec i batarawec.” Ŋic II 9:7; Sâc 32:43; Mi Mâ 19:9; 119:137; Bar 16:7; 6:10
3 Iŋuc murâ harierâ musereckerâ mumbiŋ:
“Haleluja, hae sâko ere hosâczi
ŋezurâ ŋezu fehuc foocmu sanaŋ.” Mi Mâ 104:35; Jes 34:10
4 Eme ŋicqizec 24 â wiac jujune 4 jaŋe waha fodaperâ Anutu eri ŋeŋe‐ticnao ŋewec e muteŋkehuc ʒiŋuc mumbiŋ: “Jâmbomac, Haleluja.” Bar 5:14; Jes 6:1; Mi Mâ 47:8; 106:48 5 Eme eri ŋeŋe ŋeweckonec dâŋ ʒiŋuc fuawec:
“Anuture kiŋaŋŋicfâc ŋoŋe e muteŋke‐fâreniŋ,
fekicne wahakicne araŋ bacneeŋgopieŋzi iŋuc hâcne eniŋ.” Mi Mâ 22:23; 115:13; 134:1; 135:1
Lamare ʒeri hombaŋ
6 Eme no micʒonʒoŋ sâko tinac mocwâc manapo, i opâ sâro fânâŋ â ɋuŋfânâŋ tinac ewec. Ine wiwira dâŋ ʒiŋuc fuawec:
“Haleluja, Wofuŋ Anutu‐nâŋec bapafâre
e guriŋ bapa gie‐ticne tâtâc fuŋkekac. Dan 10:6; Bar 11:15; Eʒek 1:24; 43:2; Mi Mâ 93:1; 97:1; 99:1
7 Irec nâŋâc ʒeri bubiaŋ ecnehuc mumbiaŋkenaŋ.
Lamare ʒeri hombaŋ maickekacte biŋefâc‐ticne ʒawieŋgopieŋ. Mi Mâ 118:24; Bar 21:2, 9
8 Jaŋe ŋaqi qaŋqaŋ kisieckekicne rojuniŋte mana‐jarekicne.”
Wofuŋte tiriŋicfâc eebapa tiŋne bâfuambiŋ, izi ŋaqi‐jeŋic ekac hâcne. Mi Mâ 45:14; Jes 61:10 9 Eme dâŋ moc nazawec, “Go kecʒiŋuc qâreŋkec: Lamare ʒeri hombaŋko tiwâ bâzi nâniŋte hefârec‐jopakicne, jaŋe ʒeri bubiaŋ mana‐jarezo.” Iŋuc murâ muwec: “Dâŋ gazakopac i Anuture dâŋ fâri hândâŋne jâmbâŋ.” Luk 14:15 10 Iŋuc nazame no dieŋzi hecnerâ numucnezo ehape qatara‐narerâ muwec: “Misac, iŋuc mi ec, no kiŋaŋ qaqa âgoge, â qomâfâcge Jesu hâwicmâc mutaniŋkeeŋgopieŋ jaŋere âgo jaha. Go Anutu e jahacne sawa daŋge nunumu ecnec.” Jesu mumutaniŋke i findaŋdâŋ mumu Mâro ere gie. Bar 12:11; 22:8; Apo 10:25, 26
Johanezi Jesu â momorifâcne honec‐jopawec
11 Eme no ʒâŋe firâ mi sambâŋ aŋkeme becâsic qaŋqaŋ moc honezepac i! Eme fainao ŋewec e ʒâŋene Mume sasanaŋ â Fârine mumu. E okac babazu gie â ʒika gie bâbâsifuc tâmiric sâkoa baekac. Eʒek 1:1; Mi Mâ 96:13; Bar 3:14; Jes 11:4 12 Ʒâŋe jahec‐ticne ʒocbâruŋ iŋucne, qizec‐ticnao ŋicwofuŋ du bocjaha ŋewec. Erâ ʒâŋe qâreŋ‐ticne fowec i e jahaczia buc wose manac eekac. Dan 10:6; Bar 1:14; 2:18; 3:12 13 Ŋaqi ʒora‐ticne i soc ruacnekicne, erâ ʒâŋe‐ticne i “Anuture Micdâŋ” mukicne. Jes 63:1; Joh 1:1 14 Rame sambâŋkonec momori gurune gurune jaŋe becâsic qaŋqaŋkoa ŋehuc bâjâpembiŋ. Ŋaqi‐jeŋic qaŋqaŋ kisieckekicne. Bar 17:14 15 Micticnaonec ine sâqe ʒika mictara moc wefuwec, izi hâcne ŋicne ŋicne jopa bâtiŋ ejareocmu. Erâ aeŋ gunu bajuhuc soŋaŋ‐jopaocmu. Erâ Anutu bapafâre ere kimbeŋ bajaŋgeŋkehuc tofa babazu gie baocmu. Bar 12:5; 14:20; Jes 11:4; 63:3 16 Ŋaqi‐ticne ombâŋnao ʒâŋe qâreŋ‐ticne ʒiŋuc fokac, ŋicwofuŋ jaŋere Wofuŋ Sâko, fekicne jaŋere Fekicne. Sâc 10:17; Dan 2:47; Bar 17:14; Tim I 6:15
Jesu e micticnaonec ʒikazi râsifâcne jopa‐fâreocmu
17 Eme no ʒâŋe firâ aŋelo moc ʒoaŋko domame honepo. E ira domahuc wipe sawao rac warec embiŋ jaŋe mâmâc sasawa wiwic jaha wira‐jarehuc muwec: “Anutuzi ʒepec sâko bâfuakacte ware tumaŋne‐fâreniŋ, Eʒek 39:4, 17–20 18 ehuc ŋicwofuŋ jaŋere sahac biuc â fekicne jaŋere sahac biuc â ŋic sanaŋne jaŋere sahac biuc, erâ becâsic â momorifâc‐jeŋic jaŋere sahac biuc erâ ŋic mâmâc sasawa, ŋicbomboŋ â kiŋaŋ qaqa, fekicne â wahakicne jaŋere sahac biuc nâfârenʒepieŋ.” 19 Eme no qowi mimicne e â mâreŋ sâc ŋicwofuŋ â momorifâc‐jeŋic tumaŋne‐fârepie honec‐jopapo. Jaŋe becâsic qaŋqaŋko ŋewec e â momorifâcne râsi ejareniŋte fisimbiŋ. Mi Mâ 2:2; Bar 16:16 20 Eme qowi mimicne â porofete burecne‐ticne jahe dockepic. Porofete burecne eki hâcne qowi mimicnere maio mâsi fuŋne fuŋne bawec, ehuc qowi mimicnere ʒâŋe qâreŋ bajumbiŋ â hawari‐ticne dieŋzi hecnembiŋ ŋic i maŋ bâsifuc ejarewec. Eme jahe ɋâricne rocjofarâ lambe opâre riqiczi ʒoc ʒahuc foekac ira behec‐jofapie hupic. Bar 13:11–17; 20:10; Dan 7:11, 26 21 Gâcne sâko jaŋe ine becâsic qaŋqaŋko ŋewec ere mickonec sâqe ʒikazi waharâ jopa‐fârewec. Eme wipe jaŋe fisirâ sahac biuc‐jeŋic nârâ gagapec embiŋ. Eʒek 39:17, 20
19:2: Ŋic II 9:7; Sâc 32:43; Mi Mâ 19:9; 119:137; Bar 16:7; 6:10
19:4: Bar 5:14; Jes 6:1; Mi Mâ 47:8; 106:48
19:5: Mi Mâ 22:23; 115:13; 134:1; 135:1
19:6: Dan 10:6; Bar 11:15; Eʒek 1:24; 43:2; Mi Mâ 93:1; 97:1; 99:1
19:7: Mi Mâ 118:24; Bar 21:2, 9
19:10: Bar 12:11; 22:8; Apo 10:25, 26
19:11: Eʒek 1:1; Mi Mâ 96:13; Bar 3:14; Jes 11:4
19:12: Dan 10:6; Bar 1:14; 2:18; 3:12
19:15: Bar 12:5; 14:20; Jes 11:4; 63:3
19:16: Sâc 10:17; Dan 2:47; Bar 17:14; Tim I 6:15
19:17: Eʒek 39:4, 17–20
19:20: Bar 13:11–17; 20:10; Dan 7:11, 26