45
Ŋicwofuŋzi ŋokac rokac irec hombaŋte gae
1 Biŋedâŋ biaŋnezi maŋnane fusucmarâ qâmbâriŋkekac;
gae‐nanere dâŋ ŋicwofuŋ mufuacnepe;
nameŋ‐nanezi qâqâreŋ ŋicsaric moc ere kirifi iŋucne.
2 Hawari biaŋge mâreŋŋic gâcne jaŋere siricke‐fârekac;
micbipicge kereŋ bareŋne,
Anutuzi jambuŋgu sanaŋkekacte iŋuc ekac.
3 Qac momori, go ʒika sâqege becsahachec ombâŋgao jomac,
eri qaraweŋ ɋuŋɋasaŋgehec go!
4 Ʒai ʒonʒoŋgehec ʒikare keretacko ɋicwânʒâŋ jaha rac!
Ʒâziriŋ dâŋ dopeckezemec, tiŋne juju ŋezickezemec!
Mefâregezi wiac hâhâwicne bâfuame honezemec.
5 Tepe motecge mictara,
râsifâcge buhândâŋ‐jeŋicko kizejec,
ŋicne ŋicne maigao rândiŋkerâ jopazejec.
6 Ŋicwofuŋ ŋeŋege Anuturaonec, ŋeŋe sanaŋ ŋeocmu,
ŋicwofuŋ gunuge i bâbâtiŋ gunu.
7 Go tiŋne jauŋkehuc sindaŋ qaisockeekic.
Irec Anutu, gore Anutu hâcne, eki wokemaŋ rua‐garewec,
ʒerire wokemaŋ i âgofâcge ruaeŋgopieŋ irec sâc jâurukac,
8 Ŋaqigere âsu mumundoŋ i ʒineŋ saŋkarac â tokic âsu;
erificge i elefaŋte micsieczi bakicne,
maŋnao musi bapie mana aŋac eekic.
9 Kiŋaŋ narufâcge jaŋere guruo
ŋicwofuŋ gâcne jaŋere otâfâc wâc juŋgopieŋ,
mefâregao ŋonâŋge Ofiri mâreŋkonec gol qonaŋke domakac.
10 Otâ‐mae manac, ʒâŋe fitec wareme hazec râec:
Mame sâkofâcge â mamacgere ficte nikecguzejec.
11 Ŋicwofuŋ e hawari biaŋgere ecneocmu,
erâ e kâcɋenege jukacte dapecnezemec.
12 Tiro hae rune jaŋe taha barâ fisiniŋmu,
mafa sâkoheczi âgo bacguniŋte wiac amecke wareniŋmu.
13 Ficmaŋko ŋicwofuŋte otâ erickekicne ŋekac,
ŋaqi‐ticne golzi basarickekicne.
14 Ŋaqi qâreŋ biaŋ rojuha ŋicwofuŋtao jowa wareŋgopieŋ,
naru ʒeŋoŋ âgofâc‐ticne eraoa jowac‐jopa fisiŋgopieŋ.
15 Ʒeri bari ehuc bubiaŋhec jowac‐jopa fisipie
ŋicwofuŋ erific‐ticnao feŋgopieŋ.
16 O ŋicwofuŋ, ŋokâfâcge jaŋe
kâcɋenefâcge jaŋere jujutacko juniŋmu;
goki hâcne mâreŋ sâc ŋicbomboŋ âkendâŋ‐jopacmu.
17 No ʒâŋe biŋege ŋic gaŋne gaŋne jaŋerao bafaharepemu;
irec ŋicne ŋicne jaŋe tatara tâmiric
muteŋguhuc juniŋmu.