44
Sâcmutâc dâŋrereŋ jaŋe râsizi imac‐jopakupie Anutu wâsickeŋgopieŋ
1 O Anutu, go mârâc jaha, mimiŋne jaŋere dameŋko,
gie fâri basarickehuc bameŋ,
i kâcɋenefâc‐nâŋec jaŋe binaŋne banârepie,
hazec fâri‐nâŋeczi manambeŋ.
2 Go gahacne mezi qâpuc guru jâpec‐jopameŋ,
ehuc ŋicfâcge sarac‐jopameŋ;
go ŋic gurune gurune bâsirowec‐jopameŋ,
ehuc jaŋe basawec‐jopameŋ.
3 Jaŋe jaŋacne ʒikazi mâreŋ i mi rombiŋ,
â jaŋacne mezi sasanaŋ mi bâfuambiŋ;
aricne, go jaŋere aŋacguwecte
mefâregezi â ʒâŋe maigere tatamaczi bâfua‐jaremeŋ.
4 Go Wofuŋ Sâko â Anutu‐nane jukomec,
goki mutec Jakobozi sasanaŋ bâfuaekac.
5 Gore tâpirire râsifâc‐nâŋec bâsuec‐jopaeŋgopeneŋ,
ʒâŋegere erâ âtemac‐jopaeŋgopeneŋ.
6 No tepe‐nanere mamanac mi juekopac,
â ʒika sâqe‐nanezi wâc sâcne mi baficnuekac.
7 Goki ine râsifâc‐nâŋec jopanaŋte bafic‐nâpoekic,
â qaisoc‐nâpoeŋgopieŋ jaŋe bâtâtiec‐jopaekic.
8 Anutu gore mu qâqiŋ ʒuʒuhuc jaha eeŋgopeneŋ,
erâ tofamâc daŋge mumuteŋ egarehuc junaŋmu.
9 Eme go sifu suŋgiŋ‐nâpohuc mimi faio râec‐nâpomeŋ,
â momorifâc‐nâŋec mi qâtec‐jopameŋ.
10 Goki manahaŋ râsifâc‐nâŋec wise‐jarembeŋ,
eme jaŋe mafa wiac‐nâŋec nâwoc rombiŋ.
11 Goki enâretec lama hehezure biŋe jaŋere sâc embeŋ,
â qâpuc gurune gurune jaŋerao bâtâtiec‐nâpomeŋ.
12 Go ŋicfâcge wiac afecnere qikiŋ‐jopameŋ,
furine ŋemâcne bazu‐gareniŋte mi mumeŋ.
13 Goki manahaŋ mendâŋ‐nâŋecko juŋgopieŋzi âke sisic enâreeŋgopieŋ,
ŋicguru rârec rârec mu ruruc enârehuc
gâwie‐nâreeŋgopieŋ.
14 Goki enâretec qâpuc ŋicne ŋicne jaŋere mu qâqiŋ embeŋ,
â ŋicne ŋicne jaŋe mana wahac‐nâpohuc
gâwie‐nâreeŋgopieŋ.
15 Ŋafe ʒoaŋ sâc mimizi ŋecnukume,
ʒâŋe mai‐nane bâsoŋkehuc dunduŋ dadape juekopac,
16 i âke sisic â mumusoriŋ ŋic dâŋjeŋic manahuc juekopacte,
â râsi â qaqaisoc ŋic honec‐jopahuc juekopacte iŋuc eekopac.
17 Nâŋe gore mi nikec‐nâpoha,
â ʒâʒâficge mi hetâcnehuc eatucguhapene,
wiac sasawa i sifu fai‐nâŋecko fewec.
18 Maŋnâŋeczi go mi râpecguhame,
â kike‐nâŋeczi hatage mi kizuhame,
19 go sifu kâte qâto jaŋere hae mâreŋko qanʒaŋ‐nâpohuc
duŋdapâc maŋnao râec‐nâpomeŋ.
20 Anutu ʒâŋegere nikec‐nâpozacko,
me nemuɋâŋ jabane numu hefârec ejarenʒapeŋko,
21 Anutu goki mi hone tarac‐nâponʒaŋ me?
Go ŋicmaŋko dâŋ soŋne mana jaŋgeŋkeekic i!
22 Aricne, gore erâ ʒoaŋne ʒoaŋne qa imac enâreeŋgopieŋ,
â lama qa hezuc eejarene jaŋere sâcko râec‐nâpoŋgopieŋ.
23 Wofuŋ, qiriŋ qac! Wemocte guŋ fokomec?
Mana ɋâɋârec! Bebehe sanaŋ mi behec‐nâpoc!
24 Wemocte ʒâŋe maige bâsoŋkekomec,
ehuc imac‐nâpokicne â bâuruŋ‐nâpokicne irec nikecgukac?
25 Jei, maŋ qâqâtâc‐nâŋec i rufeo bâutuckekicne;
sahac‐nâŋec i mâreŋko bohotarâ fokac.
26 Fahare bafic‐nâpoc!
Aki anonocgere erâ batarac‐nâpoc!