46
Mamanasiŋte gae mimiŋ
1 Anutu e dapeŋ sâko‐nâŋec â tâpiri‐nâŋec,
ʒârâ ʒâpâo mi hetiric‐nâpohuc bafic‐nâpoekac.
2 Irec mâreŋ e hetikieme bipic tatara mi enaŋmu,
tiki jaŋe hâwecmaŋko huzo murâ huniŋ.
3 Siri jaŋe fânâŋ ehuc wânʒâŋnehec qaniŋ,
tiki mâreŋkopec hewiwickekupie qiriŋ qaoc.
4 Rowaŋkonec opâ ʒâŋene ʒâŋene fisihuc
Anuture haeo aŋac ʒeri bâfuaŋgopieŋ;
hae i Femicne sâkore ŋeŋe hae hâcne.
5 Anutu e maŋnao jukacte qiriŋ mi qaocmu,
Anutu e furic uupictea ŋezickeocmu.
6 Ŋic gurune gurune jaŋe iima sâko eŋgopieŋ,
ŋicwofuŋ ŋeŋe ɋiɋitecke rakac,
Anuture marac fânâŋte mâreŋ tâpirine goroŋkekac:
7 Anutu Tâpiri Ɋuŋɋasaŋ Wofuŋzi nâŋâcnehec jukac,
Jakobore Anutuzi huec sanaŋ‐nâŋec ekac.
8 Wofuŋzi gie baekac i moc ware honeniŋ,
mâreŋko ima sâko bâfuaekac hâcne.
9 Mâreŋ qaŋeŋnao ʒikane ʒikane bâniniŋkeekac,
tepe bazuekac, damu âte ʒuekac,
â ʒikare keretac ʒoczi rikeekac.
10 “Niniŋkerâ, no Anutu jukopac i mana taraniŋ,
ŋicne ŋicne jaŋe sâsecnupie fekopac,
mâreŋte faio sâsecnupie fekopac hâcne.”
11 Anutu Tâpiri Ɋuŋɋasaŋ Wofuŋzi nâŋâcnehec jukac,
Jakobore Anutuzi huec sanaŋ‐nâŋec ekac.