47
Anutu e ŋicne ŋicne jaŋere Wofuŋ Sâko
1 Ŋicne ŋicne, me qahuc aŋara heniŋ!
Anutu fânâŋkecnehuc ʒeri gae heniŋ!
2 Wofuŋ, Femicne sâko, e qeŋ bipinehec,
e mâreŋ sâko mâreŋ irec Wofuŋ Sâko jukac.
3 E ŋicne ŋicne bawahac‐jopame dape‐nârembiŋ,
qâpuc guru jaŋe nâŋâcne kiŋaŋ qaqa embiŋ.
4 E merafâc mâreŋ qizec‐nâŋec bâwosâe‐nârewec,
Jakobore ecnewecte furi sâko i râcnewec.
5 Anutu e aŋara faio hâŋ jaha fewec,
qeŋfânâŋ fuahame Wofuŋ e fewec.
6 Anutu mumuteŋ gae hecneniŋ, hecneniŋ!
Wofuŋ Sâko‐nâŋec mumuteŋ gae hecneniŋ, hecneniŋ!
7 Anutu e mâreŋ sâko mâreŋ irec Wofuŋ Sâko jukac,
mumuteŋ gae hesarickerâ hecneniŋ!
8 Anutu e ŋicne ŋicne guriŋ bajarekac,
Anutu e tiri ŋeŋe‐ticnao ŋekac.
9 Ŋicne ŋicne fekicnefâc‐jeŋic jaŋe turehuc
Abrahamte Anuture ŋicfâc eŋgopieŋ.
Mâreŋ sâc maro‐jeŋic Anutuzi rauckekac,
eki jowaru‐fârerâ fekac.