104
Anutu sambâŋ mâreŋ bâbâfua eri tatamac‐ticnere gae
1 Maŋ qâqâtâc‐nane, go Wofuŋ muteŋkec.
O Wofuŋ Anutu‐nane, go kâcɋene sâko
eri tatamac â ʒai ʒonʒoŋge hetec hume jukomec.
2 Go tatamaczi qoruc egareme rufarâ juekic,
go sambâŋ i selific iŋucne fâremeŋ ŋegarekac.
3 Go erificgere woke qâtâc opâ faio râemeŋ,
karorac âzâcnetec keretac egarewec,
mâŋâŋte fakec faio rac warec eekic.
4 Mâŋâŋ sorec‐jopatec dâŋge baraeŋgopieŋ,
ʒocbâruŋ mujaretec kiŋaŋ qagareeŋgopieŋ.
5 Go mâreŋ i hobeteŋ‐ticnao basanaŋkerâ râemeŋ,
eme qiŋ herâ ŋekac, qiriŋ moc mi qaocmu.
6 Go rumi sâko qoruc iŋucnezi mâreŋ qofackemeŋ,
eme opâ jaŋe tiki qâuruckembiŋ.
7 Erâ hanec‐jopatec tâtiembiŋ,
ehuc parandaŋgere fânâŋte wisembiŋ.
8 Tiki jaŋe faharembiŋ â wâc jaŋe humbiŋ,
ehuc mupaŋke‐jaremeŋko sanaŋkerâ ŋembiŋ.
9 Ma bajaremeŋ i mocwâc mi jâuruniŋmu,
â mâreŋ mocwâc mi qofackeniŋmu.
10 Mâreŋ wâwâcnao opâ ʒâŋe bâfuameŋ,
eme opâzi tiki ŋondeŋko rahuc foekac.
11 Qowine qowine nâruac‐jeŋic fuawec,
kâte doŋgi jaŋe opâre hâmorâ nâqiŋneeŋgopieŋ.
12 Opâ mecnao sawa wipe jaŋe ŋec juc eeŋgopieŋ,
jâctieŋko ŋehuc gae‐jeŋic heeŋgopieŋ.
13 Go faic ŋehuc tiki gumecqiŋ‐jopaekic,
mâreŋzi giegere fârine nâ gapec eekac.
14 Go mutec bulimakao sopâc kecɋaŋ fua‐jareekac,
â nânâ monʒaŋ, ine ŋiczi he sarac eocte.
E giene bakume mâreŋkonec nânâ fuaekac.
15 Erâ waiŋ bâfuacneme nâhuc aŋac manaekac.
Tokic bâfuame ruarâ ʒâŋe maine sâsâreekac,
erâ wâc poroŋ bâfuame ŋicmaŋ qacfiric eekac.
16 Wofuŋzi jâckâte‐ticne opâzi bâgunuckeekac,
Lebanoŋ tikio jâmâzâc sarawec i hâcne.
17 Jacmaŋko wipe jaŋe sareŋ‐jeŋic baeŋgopieŋ,
qeʒo e bizojâcko fic hae eekac.
18 Tiki ʒora i kâte noniŋ jaŋere ŋeŋe juju,
qânâuŋko mâreŋpecne jaŋe soŋkerâ foeŋgopieŋ.
19 Go dameŋ qâtâc‐ticne fuaocte mosa râemeŋ,
â ʒoaŋ e huhu‐ticnere dameŋ manaekac.
20 Goki dapâc bâfuatec hae ŋafeekac,
eme kâte qowi jaŋe qiriŋ qafâreeŋgopieŋ.
21 Laioŋ motec jaŋe qowi‐jeŋicte owackeeŋgopieŋ,
ehuc Anuturaonec nânâ basa raeŋgopieŋ.
22 Ʒoaŋ wefume fâre suruckeeŋgopieŋ,
ehuc jawa‐jeŋicko soŋkerâ foeŋgopieŋ.
23 Ŋiczi ine gie‐ticnao fahare raekac,
erâ he sarac ehuc juha hae ŋafeekac.
24 O Wofuŋ, go wiac bâfuameŋ ʒarene fekicne!
Mana sarickehuc bâfua‐fâremeŋ,
mâreŋ i meqâreŋgezi fusucmawec fokac.
25 Hâwec fokac ocni, qaratiekicne sâko,
maŋnao wiac ʒare tâmiric gerec gerec bahuc fokac,
wiac jujune kâcɋene â piticne.
26 Ira wokezi rac warec ehuc jueŋgopieŋ,
gaʒu gaʒu wâc râemeŋ, hâwec masirickeocte.
27 Goki dameŋ mukicnao nânâ jarecmurâ,
gorao ʒeŋgoma ʒâŋe fieŋgopieŋ.
28 Goki jaretec ro nuse eeŋgopieŋ,
mege baratietec wiac biaŋ nâ gapec eeŋgopieŋ.
29 Ʒâŋe maige bâsoŋketec bipic tara‐jareekac,
nokafe‐jeŋic jowac rotec hâmoeŋgopieŋ,
ehuc gâc wândocko risie raeŋgopieŋ.
30 Micrombâŋge ficne‐jaretec harierâ fuaeŋgopieŋ,
eme mâreŋ ʒâŋe maine mocwâc qacfiric eekac.
31 Wofuŋte ʒâŋe biŋe forahuc jaha juzejec,
Wofuŋ e meqâreŋ‐ticne hone aŋac ezejec.
32 Mâreŋko firâ râqâreme mâreŋ ɋiɋiteckeocmu,
tiki bâuac‐jopame hosâc qaniŋmu.
33 Jupemu sâc Wofuŋ gae hecnepemu,
juju fonareocmu sâc Anutu‐nane muteŋkepemu.
34 Mamanasu gie bakopac i mac maname sâckezejec,
no Wofuŋ mana aŋac ecnehuc jupemu.
35 Ŋic hehesicne mâreŋko omaenʒapiŋ me,
sindaŋne jaŋe hâcne arictac enʒapiŋ.
Maŋ qâqâtâc‐nane, go Wofuŋ muteŋkec.
Wofuŋ mumbiaŋkeniŋ.