103
Wofuŋ muteŋkezo
1 O maŋ qâqâtâc‐nane, go Wofuŋ muteŋkec,
erâ maŋnaneo wiac sasawa, go tiri ʒâŋe‐ticne muteŋkec.
2 O maŋ qâqâtâc‐nane, go Wofuŋ muteŋkec,
â wiac biaŋne egare warehuc juwec irec mi nikecguoc.
3 E kiŋ bahacge behe‐fâreekac,
â huc ʒâicge bâniniŋke‐fâreekac.
4 E jujuge sisipirickonec bataraekac,
erâ aki anonoc â buuruczi ericguekac.
5 E juekic sâc wiac qâmie‐gareme ro aŋac eekic,
erâ tucwipe iŋucne hati firierâ juhâmoekic.
6 Wofuŋ e bâbâtiŋ gie baekac,
â ro waha âte ejarekicne jaŋe ŋezic‐jopa‐fâreekac.
7 E hata‐ticne Mose qazucnewec,
wiac bapa‐ticne Israe ŋic jowatuwec.
8 Wofuŋ e buuruc â aki anonoc‐ticnehec,
kimbeŋ‐ticne uneŋne â miriŋ‐ticne ɋârâŋne.
9 E aaric dâŋ hati mi enâreocmu,
â kimbeŋ‐ticne tofamâc mi bajuocmu.
10 E sâqocne‐nâŋecte sâc wiac mi enâreekac,
â hehesic‐nâŋecte sâc okacne mi bazuekac.
11 Sambâŋzi mâreŋ qâhuckehuc fejâmbâŋkerâ ŋekac,
araŋ bacneeŋgopieŋ jaŋe irec sâc aki anonoc ejareekac.
12 Ʒoaŋ wewefune â huhune jahe rârâwiŋ jâmbâŋ fokopirec,
irec sâc kiŋ bahac‐nâŋec nâwoc rorâ taicko bawiseekac.
13 Mamac moc e ɋiefâcne jaŋere bune sâqoreekac,
irec sâc Wofuŋ e araŋ bacneeŋgopieŋ jaŋe busâqoc mana‐jareekac.
14 Nâŋâc wemo wiaczi bacnâpokicne i kâuc mi baekac i.
Gâc wândockonec fuambeŋ i manasuekac.
15 Ŋic e juju dameŋ‐ticne kecɋaŋte fua hâmoc iŋucne,
erâ e ʒariŋ ârire sâc fua biaŋ eekac.
16 Ehame mâŋâŋzi ficne sueme omatac fuaekac,
â ŋeŋetac‐ticnezi e kâuc baekac.
17 Wofuŋte aki anonoc ine dameŋ tâmiricko fuakicnezi,
dameŋ tâmiric jaha forahuc juzokac,
araŋ bacneeŋgopieŋ jaŋerao hâcne.
 tiŋne‐ticnezi naru motec apa ŋosa
jaŋerao forahuc juzokac.
18 Ine ehec ʒâʒâfic ekicne i basanaŋkerâ bajuniŋmu,
ehuc sâcmutâc dâŋticne reŋkeniŋmu jaŋerao hâcne.
19 Wofuŋ e eri ŋeŋe‐ticne sambâŋko hewec ŋekac,
â guriŋ bapa‐ticnezi wiac ʒeŋgoma qâhâckekac.
20 O aŋelofâcne, tâpiri wânʒâŋ‐ŋeŋichec,
marac‐ticnere hazec râehuc micticne reŋkeeŋgopieŋ,
ŋoŋe hâcne Wofuŋ muteŋkeniŋ.
21 O momorifâc‐ticne sasawa,
kiŋaŋ qaqazi mamana‐ticnere sâcko gie baeŋgopieŋ,
ŋoŋe hâcne Wofuŋ muteŋkeniŋ.
22 O meqâreŋfâcne sasawa,
uucmaŋ‐ticnao ira me ira juraŋgopieŋ,
ŋoŋe hâcne Wofuŋ muteŋkeniŋ.
O maŋ qâqâtâc‐nane, go Wofuŋ muteŋkec.