102
Ŋic qarâ suriŋne moczi Wofuŋ numucnewec
1 O Wofuŋ, go nunumu‐nane manac;
kinanezi fârâ gorao fisioc.
2 Norao hâhâwic dameŋ maickeme,
ʒâŋe maige mi bâsoŋke‐narezemec.
Go hazec râe‐narec; no wira‐garepemu
ʒoaŋ ira micnaneo biac rozemec.
3 Ʒoaŋ gie bapa‐nanezi hosâc iŋucne ratâmireeŋgopieŋ;
me kike‐naneo ʒocbâruŋ iŋucne ʒacnuekac.
4 Bunane kecɋaŋ iŋucne hâmo ɋaŋac eekac,
eme nânâ nâzore nikecnuekac.
5 No samarierâ owackekupe,
siec‐nanezi biuc‐naneo bohotaekac.
6 No mâreŋ tuhuo piʒu piʒu iŋucne ekopac,
â hae sesuctacko qâoŋ wipe iŋucne.
7 No guŋɋâri fohuc juekopac,
ficbupuo wipe moc bucticne ŋehuc kioekac iŋucne.
8 Râsifâc‐nane jaŋe dameŋ sâc musoriŋnueŋgopieŋ,
nifepupu enarehuc sâwecnueŋgopieŋ.
9 Ʒafezi nânâ tinac enareekac,
â ʒâŋeuc‐nanezi opâhec sisifuc eme nâekopac.
10 Aaricgere â kimbeŋgere fârine fuakac hâcne.
Goki bafaharecnuku mocwâc behecnumeŋ.
11 Ʒoaŋ gie bapa‐nane i owa ririŋte nâkumuc fuaekac iŋucne;
no kecɋaŋ iŋucne hâmo ɋaŋac ekopac.
12 Wofuŋ, go ine eri ŋeŋegao ŋesanaŋkeekic;
ʒâŋege ɋâric jaŋerao fosanaŋkeocmu.
13 Goki faharerâ Zioŋ busâqoc manacnecmu;
e aki anonoc ecnezore dameŋ maickekac,
ʒâfo bakicne i fuakac hâcne.
14 Kiŋaŋŋicfâcge jaŋe qânâ‐ticnere aŋac‐jopakac,
â sesuc‐ticnere busâqoc manaŋgopieŋ.
15 Ŋicne ŋicne jaŋe Wofuŋ gore ʒâŋe araŋ bacneniŋmu,
â mâreŋte ŋicwofuŋzi eri tatamacgere hâhâwic eniŋmu.
16 Wofuŋ e Zioŋ mocwâc heɋâreocmu hâcne,
e eri tatamac‐ticnehec fua tâcneocmu.
17 E bebekâne jaŋere nunumure hazec râeocmu,
â wâwâsic‐jeŋic mi suŋgiŋkeocmu.
18 Dâŋ ʒi ɋâric ʒâhec fuaniŋmu jaŋere biŋe qâreŋkezo,
eme kikefuŋ miŋecnea fuaocmuzi Wofuŋ mumbiaŋkezejec.
19 E faic tiri hae‐ticnaonec fime wahawec,
Wofuŋzi sambâŋkonec mâreŋko fime wahawec.
20 Ehuc kâpâcwâru ŋic huhuse‐jeŋic manawec,
â hâmocte biŋe qacjopakicne jaŋe firuec‐jopawec.
21 Eme ŋiczi Zioŋko Wofuŋte ʒâŋe mutaniŋkenʒepieŋ,
â Jerusalem hae wâc mumbiaŋkenʒepieŋ.
22 Ira hâcne ŋicne ŋicne heâckerâ tumaŋne‐fâreniŋmu,
ŋicwofuŋ â gurufâc‐jeŋic jaŋe Wofuŋ kiŋaŋ qacneniŋmu.
23 E hata ombâŋko tâpiri‐nane bâomaekac,
ehuc juju dameŋ‐nane bâmbembeŋkekac.
24 Eme wâsicgukopac, “O Anutu‐nane,
go jarage tatara tâmiric fohuc juocmuzi,
no dameŋ‐nane mi taraha mi bârâriecnuc.”
25 Go fufuŋkenao mâreŋte hobeteŋne râemeŋ,
â sambâŋne sambâŋne jaŋe megere qâreŋ.
26 Jaŋe siroweniŋmu, go ine jusanaŋkekic;
jaŋe ŋaqi iŋucne raŋɋaŋkeniŋmu.
Eme ŋaqi heherisie iŋucne herisiec‐jopatec,
jaŋe hawari moc eniŋmu.
27 Go ine jukiczi juraʒihuc jucmu,
â jarage moc mi taraocmu.
28 Kiŋaŋŋicfâcge jaŋere naru moteczi juhâmoniŋmu,
â ɋâricfâc‐jeŋic jaŋe gore maio jusanaŋkeniŋmu.