1 Eme i tara‐fâreme sâc bapa ŋic e jowacnume ʒoaŋ wewefunaopec motâc fowec ira fisipec. 2 Fisipere mi Israere Anutu ere huriri qâreŋzi ʒoaŋ wewefunaonec jaha fuarâ warezejec i! Wareme fânâŋ fuawec i opâ sâkore fânâŋ tinac, erâ huriri qâreŋ‐ticnezi mâreŋ batamae‐fârewec. 3 Ehame maŋʒâŋe‐nane ŋerisieme wiac hone manac epo i mârâc jaha hae sâko ima baocte wareme honepo iŋucne, erâ Kebara opâo ŋehuc wiac hone manac epo irec sâc. Wiac i hone manac erâ mâreŋko hetutuckerâ fopo. 4 Eme Wofuŋte huriri qâreŋzi motâc ʒoaŋ wewefunaopec fowec i fotâcnerâ taha ufuŋko feme 5 Mârozi baafecnume hae ʒoŋa piticnao raʒipo. Ehuc mi Wofuŋte huriri qâreŋzi taha ufuŋ fusucmame honezepac i!

6 Eme sâc bapa ŋic e nore heririŋko domahame taha ufuŋkonec moczi dâŋ ʒiŋuc mume manapo: 7 “Ŋicte ɋâric, fic ʒizi hâcne eri ŋeŋe‐nanere hae â kike‐nanere ââtesiŋ ekac. No fic ʒira hâcne Israe ŋic jaŋehec ŋeŋe juju ehuc jupemu sanaŋ. Ehame Israe kikefuŋ jaŋe ʒâŋe biŋe‐nane mocwâc mi bawahanʒepieŋ. Jaŋe jaŋacne mecne ŋicwofuŋfâc‐jeŋic mecne sasec gie‐jeŋiczi me ŋicwofuŋfâc‐jeŋic jaŋere qâŋɋâŋzi wâwânâŋ mocwâc mi enarenʒepieŋ. 8 Jaŋe ŋifec no araŋ banarehuc kiŋaŋ qanarembiŋ â ŋifec ine nemuɋâŋfâc‐jeŋic araŋ bajarehuc kiŋaŋ qajarembiŋ wâc. Jaŋe iŋuc ehuc wiac‐jeŋic mamakâcnezi ʒâŋe biŋe‐nane bawahambiŋ, eme no irec hâcne aaricko bâsirowec‐jopapo. 9 Ʒi ine ɋâŋ qâqâtâcfâc‐jeŋic â ŋicwofuŋfâc‐jeŋic jaŋere qâŋɋâŋ i nore maionec bârâriec‐jopa‐fârepie no jaŋehec jusanaŋkepemu.

10 “Ŋicte ɋâric, goki Israe kikefuŋ taha ufuŋ kecʒirec fuŋne â hawari‐ticne mutâcne‐jarezemec, eme jaŋe manarâ hehesic‐jeŋicte manasurâ mimienʒepieŋ. 11 Ehuc wiac ebac embiŋ irec mimieniŋmuo goki taha ufuŋ â irec maŋnao wiac fofârekac erâ motâc wiac‐ticne â ufuŋ hawari‐ticne jaza mutâc ezemec; ehuc irec mumutâc â sâcmutâc dâŋticne i wâc jazatec mana‐fârenʒepieŋ. Erâ jaŋe sâcmutâc â mumutâc‐ticne i hâcne bajuhuc irec sâcko wiac ebac eniŋte qâreŋketec hone‐fârenʒepieŋ. 12 Taha ufuŋte sâcmutâc ine kecʒiŋuc: Tiklo ufuŋ râreckehuc mâreŋ forakac izi ine furu jâmbâŋ fozejec. Manakic, taha ufuŋte sâcmutâc ine hâcne.

13 “Bâzi ririke alatare sâc ine kubi ʒoricne kecʒiŋuc: Ŋesiŋ‐ticne mâreŋkonec fekac i kubi 1 â otecnere sâc i kubi 1 jaha, erâ râreckehuc mecqaŋeŋne fokac i metapere sâc. 14 Alata ʒoricne‐ticnere sâc ine kecʒiŋuc: Ŋesiŋ‐ticnaonec feŋgaŋne namba 1 fuŋkerâ fekac i kubi 2 â otecnere sâc i kubi 1. Eme irecnec feŋgaŋne namba 2 fekac ine kubi 4 â otecnere sâc i kubi 1 jaha. 15 Alata faine fe tarakac i kubi 4. Eme alata tuturuŋne 4 irecnec ʒuŋene 4 jaŋe kubi 1 ferâ domambiŋ. 16 Alata botâŋne irec hâŋne i kubi 12 â otecne i kubi 12 jaha. 17 Feŋgaŋne namba 2 hâŋne‐ticnere sâc i kubi 14 â otecnere sâc i kubi 14 jaha. Erâ mecqaŋeŋ‐ticne râreckehuc fokac i kubi nâfocne irec sâc â ŋesiŋ‐ticne rârec rârec irec sâc i kubi 1. Alata riri‐ticne ine ʒoaŋ wewefunaopec fokac.”

18 Eme Wofuŋzi ʒiŋuc nazawec: “Ŋicte ɋâric, Wofuŋ Anutu no dâŋ kecʒiŋuc mukopac: Alatare sâcmutâc fokac ine kecʒiŋuc: Taha bâzi rikeniŋte â soc tieniŋte alata bapie tarame ʒoaŋ ira 19 Zadokore garikiŋfâc, Lewire taha bapa no kiŋaŋ qanarehuc maicnueŋgopieŋ jaŋe bulimakao ŋicne moc jaretec bâzi rikepie ŋic jaŋere sâqocne tâmirezejec. Wofuŋ Anutu nore dâŋ iŋuc. 20 Ehame go soc gâcne rorâ alata ʒuŋene 4 â kenʒuŋne 4 erâ mecqaŋeŋ‐ticne ruacnezemec; go iŋuc ehuc alata ʒure ɋaɋackerâ ematauckezemec. 21 Erâ bulimakao sâqocne tâtâmire tahare biŋe mukicne i mâmâc rorâ taha ufuŋ râpenao hae ʒoŋa mutâcnekicne ira rikezemec. 22 Eme ʒoaŋ namba 2 ira noniŋ ŋicne biaŋne moc rorâ sâqocne tâtâmire taha rikezemec, ehuc bulimakao taha râehuc alata ematauckemeŋ iŋuc jaha ematauckezemec. 23 Go iŋuc etec tarame bulimakao ŋicne biaŋne moc erâ lama ŋicne biaŋne moc rocjofarâ taha râec‐jofazemec. 24 Go Wofuŋte maio râec‐jofatec taha bapa jaŋe hâwec rua‐jacterâ Wofuŋte biŋe qahuc bâzi rikenʒepieŋ. 25 Go ʒoaŋne ʒoaŋne noniŋ moc sâqocne tâtâmire tahare biŋe râehuc juhaŋtec ʒoaŋ gie bapa 7 tarazejec. Ehame bulimakao â lama ŋicne moc biaŋne jahe mâmâc râec‐jofazemec. 26 Jaŋe alata ematauckerâ ʒure ɋaɋackehuc juhapie ʒoaŋ 7 tarame tirine erâ ŋezejec. 27 Eme ʒoaŋ gie bapa 7 tarame taha bapa jaŋe alata faio qowi bâzi â wamare bâzi‐jeŋic rikehuc junʒepieŋ; eme noni aki anonoc eŋarepemu. Wofuŋ Anutu nore dâŋ iŋuc.”