1 Eme jowacnurâ hae ʒoŋa piticnao fisirâ faic mâreŋkopec rarâ fic maŋne gâcne taha ufuŋte hae ʒoŋa ŋifecnao â faic mâreŋkopec ŋerawec ira ra fisipec. 2 Fic faic mâreŋkopec ŋewec ʒoricne‐ticnere sâc i kubi 100 â bembeŋne‐ticnere sâc i kubi 50. 3 Hae ʒoŋa piticnere sawane moc fowec sâcticne kubi 20, erâ hae ʒoŋa kâcɋenere sac râreckehuc qânâ herakicne ŋoŋondeŋ ira ʒae wiac feŋgaŋne jahec â moc bakicne. 4 Eme fic maŋne maŋne i jaŋere heririŋko hata gâŋgâŋne moc fowec bembeŋne‐ticnere sâc i kubi 10 â ʒoricne‐ticnere sâc i kubi 100, erâ fic maŋne i jaŋere motâc wiac i faic mâreŋkopec fofârewec. 5 Fic maŋne faic fofembiŋ jaŋe juwic â ʒâʒâŋiŋko fo wahambiŋ jaŋere wahamicne, i ʒae boc bâsokakicnere iŋuc fuawec. 6 Fic maŋne i jaŋe feŋgaŋne feŋgaŋne fofepie jahec â moc ewec; erâ hae ʒoŋa kâcɋenere wâtuŋ doma rambiŋ wâtuŋ iŋucne faic ira moc mi domawec, eme irec hâcne fic maŋne forambiŋ jaŋe ââke tirinehec bakicne. 7 Eme fic maŋne i jaŋere heririŋko qânâsac moc hae ʒoŋa sâko maickerâ fowec, sac ʒoricne‐ticnere sâc kubi 50. 8 Fic maŋne hae ʒoŋa sâko maickehuc forambiŋ ʒoricne‐jeŋicte sâc i kubi 50, â fic maŋne taha ufuŋ maickehuc forambiŋ ʒoricne‐jeŋicte sâc ine kubi 100. 9 Fic maŋne juwicpec forambiŋ jaŋere motâc ʒoaŋ wewefunaopec hae ʒoŋa sâko fowec ira forambiŋ. 10 Ira hâcne hae ʒoŋa sâkore qânâsac fuŋkerâ rawec.

Eme juwic mâreŋkopec hae ʒoŋa fowec â fic heririŋko fic maŋne gâcne forambiŋ wâc. 11 Hata‐jeŋic gâŋgâŋnezi ine mamai fowec. Jaŋe fic maŋne faic mâreŋkopec forambiŋ jaŋere sâc jaha, ʒoricne‐jeŋic â bembeŋne‐jeŋic i sâc mocjaha, erâ riri motâc‐jeŋic i sâc ijaha sasawa. 12 Juwic mâreŋkopec fic maŋne forambiŋ jaŋere motâc i ʒoaŋ wewefunaopec hata gâŋgâŋne fowecko ira fowec, ŋifecnao ine qânâsac forawec.

13 Eme sâc bapa ŋic e kecʒiŋuc nazawec: “Faic â juwic mâreŋkopec fic maŋne foraŋgopieŋ jaŋe furu mukicne sasawa, ira hâcne taha bapa Wofuŋ maickeeŋgopieŋ jaŋe tiwâ bâzi nâniŋte mukicne. Erâ fic maŋne i tiri fokacte taha bâzi erâ sâqocnere taha erâ kiŋ tatarare taha ira râenʒepieŋ. 14 Taha bapa jaŋe furuficko ferâ izia hae ʒoŋa sâkoo mi wahanʒepieŋ. Jaŋe qanaŋ gie ŋaqi‐jeŋic ficmaŋ‐jeŋicko hetara‐fârerâ ŋaqi wiac omane hepie hume ŋic ŋokac jaŋerao wahanʒepieŋ.”

15 Eme sâc bapa ŋic e sacmaŋko taha ufuŋ ŋewec irec sâc rome tarame jowacnume ʒoaŋ wewefunaopec motâc fowec ira fotâcnehuc sâc sahacnao waharâ rârec rârec irec sâc rowec. 16 Ehuc ʒoaŋ wewefunao sac forawec irec sâc rome kubi 500 ewec. 17 Izi faic mâreŋkopec sac fowec irec sâc rome kubi 500 jaha ewec. 18 Izi juwic mâreŋkopec sac fowec irec sâc rome kubi 500 jaha ewec. 19 I tarame ʒoaŋ huhunaopec sac fowec irec sâc rome kubi 500 jaha ewec. 20 Ine hâcne ŋifec â ŋifec erâ faic â juwic qânâsac forawec hâŋne‐ticne â otecne‐ticne i kubi 500 sasawa. Sac izi hâcne tirificte hae ʒoŋa â hae ʒoŋa omane jahe bârâwiŋ‐jofaocte iŋuc bakicne.