1 Eme sâc bapa ŋic e jowacnume risierâ furu ufuŋte sacmotâc ʒoaŋ wewefunaopec fowec ira rapec. Rarâ honepere motâc i hehe fowec. 2 Eme Wofuŋzi ʒiŋuc nazawec: “Motâc ʒizi hehe jaha fohame moc mi raʒinʒepieŋ. Israere Wofuŋ Anutu noni raʒikopacte moczi moc ira mi raʒinʒepieŋ; motâc i irec hâcne hehe jaha fozejec. 3 Ŋic fekicne e mocjahazi raʒirâ ŋehuc Wofuŋ nore maio nânâ poroŋ nâocte manacnekicne, eki hae gâŋgâŋnere motâcko fec wahac ezejec.”

4 Eme ŋic ekizia jowacnume faic mâreŋkopec motâc fowec i fotâcnerâ taha ufuŋte hae ʒoŋao fisipec. Fisirâ honepe mi Wofuŋte huriri qâreŋzi ufuŋ fusucmazejec i! Iŋuc honerâ ʒâŋe mai‐nane mâreŋko hetutuckepo. 5 Ehame Wofuŋzi ʒiŋuc nazawec: “Ŋicte ɋâric, go manac, Wofuŋ no taha ufuŋ‐nanere mumutâc â sâcmutâc dâŋ gaza mutâc epe hone manac ezemec; erâ taha ufuŋko feniŋte mana‐jarekicne â mi feniŋte aka hejarekicne jaŋe wâc hone wosâc ejarezemec. 6 Ehuc Israe kikefuŋ qaqatarahec ʒiŋuc jazazemec: Wofuŋ Anutuzi kecʒiŋuc mukac: O Israe kikefuŋ, ŋoŋe eebapa‐ŋeŋic mamakâcne behe‐fârenʒepieŋ. 7 Ŋoŋe ŋic furune maŋ sahac‐jeŋicko ma mi bakicne jaŋe mana‐jarepie tiri ufuŋ‐naneo ferâ hegâpârembiŋ. Ŋoŋe ŋifec iŋuc ehuc ŋifec nânâ wiac â wokemaŋ erâ soc tahare biŋe râe‐narehuc ʒâʒâfic‐nane hetâcnembiŋ hâcne. 8 Ŋoŋe tiri ufuŋ‐naneo wiac‐nane tirine forakac i hone soŋaŋ biaŋne mi ehuc ŋic furune jaŋe soŋaŋkeniŋte râec‐jopambiŋ.

9 “Irec hâcne Wofuŋ Anutu no dâŋ kecʒiŋuc mukopac: Israe ŋic jaŋere ŋondeŋko ŋic furune maŋ sahac‐jeŋicko ma mi bakicnezi juŋgopieŋ jaŋeraonec moczi tiri ufuŋ‐naneo moc mi raʒizejec. 10 Ehame Israe ŋic jaŋe qâsoriehapie Lewiŋic jaŋe no behecnurâ qâsoriehuc jaha nemuɋâŋfâc‐jeŋic kiŋaŋ qajarembiŋte okacne roniŋmu. 11 Ehuc tiri ufuŋ‐naneo gie ʒiŋuc hâcne baniŋmu: Taha ufuŋte motâcko ruc bahuc ufuŋ soŋaŋkehuc domaniŋmu, erâ ŋic jaŋere okacne bâzi ririkere qowi qa hezuc ejareniŋmu, ehuc ŋic jaŋerao kiŋaŋ gie baniŋmu. 12 Jaŋe nemuɋâŋfâc‐jeŋic jaŋere maio ŋic kiŋaŋ qajarehuc Israe ŋic jaŋe sipirickeniŋte doc bacjopambiŋ. Eme no irec hâcne okacne fua‐jareocte mupaŋkepo, Wofuŋ Anutu no iŋuc mukopac. 13 Jaŋe no maicnurâ taha gie mi banʒepieŋ â wiac bâtirikicne me furu dindiŋ irec heririŋko wâc mi warenʒepieŋ. Aricne, jaŋe wiac mamakâcne ebac embiŋte mimi busâqoczi fai‐jeŋicko fezejec. 14 No ine sifu taha ufuŋte soŋaŋ râec‐jopape maŋnao juhuc kiŋaŋ qaqa gie bafârenʒepieŋ.”

15 Wofuŋ Anutuzi dâŋ ʒiŋuc mukac: “Lewire ŋicfâc taha bapa, Zadokore ɋâricfâc hâcne, jaŋe Israe ŋic qâsoriehuc juhapie tiri ufuŋ‐nane soŋaŋkehuc jumbiŋte maicnuhuc kiŋaŋ qanarenʒepieŋ. Ehuc mai‐naneo fuarâ wokemaŋ â soc râe‐narenʒepieŋ. 16 Jaŋe tiri ufuŋ‐naneo ferâ soŋaŋkehuc kiŋaŋ qanareniŋte alata‐nane maickenʒepieŋ. 17 Jaŋe hae ʒoŋa piticnere motâc fotâcnezo murâ qoruc sawa qanʒepieŋ. Jaŋe motâcko me hae ʒoŋa piticnao gie bahuc ŋaqi qoruc hâroŋne mi rojunʒepieŋ. 18 Qizec‐jeŋicko qoruczi aʒo barâ fozunʒepieŋ; â kike ŋaqi wâc hepie huzejec. Erâ fofoŋa henʒipiŋte ŋaqi wiac‐jeŋic becsahaczi mi basanaŋkenʒepieŋ. 19 Erâ ŋic ŋokac jaŋerao hae ʒoŋa sâkoo huzo murâ gie ŋaqi wiac‐jeŋic hetararâ fic ʒuhucne mutirikicnao râenʒepieŋ, ehuc wiac tirinezi ŋic ŋondeŋko rahuc wâwânâŋhec ezacte ŋaqi wiac omane hepie huzejec. 20 Qizec‐jeŋic mi orackenʒepieŋ; â qizec susuc‐jeŋic ɋoɋoru i boc mi ʒorazejec, jaŋe qizec susuc‐jeŋic i akickehuc bâtâcnenʒepieŋ. 21 Taha bapa moc e hae ʒoŋa piticnao fezo murâ waiŋ opâ moc mi nâzejec. 22 Jaŋe hozec me ŋokac ʒuhuc bâtâc ekicne moc mi rocjopahuc Israe kikefuŋkonec ŋokac ʒeŋoŋ me taha bapa mocte hozec ine sâcne rocjopaniŋmu.

23 “Ehuc ŋicfâc‐nane jaŋe wiac tirine â omane irec fuŋne mana taraniŋte qazu‐jarenʒepieŋ â wiac biaŋne â sâqocne mana râwiŋ‐jofaniŋte jaza jowatuc enʒepieŋ. 24 Dâŋgie fuame mumutara ŋic erâ nore mumutiŋ dâŋte sâcko dâŋ mutaranʒepieŋ. Â hombaŋ dameŋ‐nane mukicne irec sâcmutâc â dâŋsanaŋ i mana rereŋ ehuc sabata‐nane soŋaŋkepie tiri fozejec. 25 Jaŋe qâŋɋâŋficko rarâ juju‐jeŋic mi hegâparenʒepieŋ; mâc neŋgoc mamac me naru motec me hahac ɋa me seŋfâc‐jeŋic mesawane jaŋere erâ sawa ezo murâ enʒepieŋ. 26 Iŋuc erâ maŋ sahac‐jeŋic ʒure ɋaɋackerâ ʒoaŋ gie bapa 7 mâc jufehuc ɋaɋacke‐hâmonʒepieŋ. 27 Erâ taha gie baniŋte hae ʒoŋa piticnao mocwâc feniŋmu ʒoaŋ ira qanaŋ jaŋe jaŋacnere manasuhuc sâqocne tâtâmire taha râenʒepieŋ; Wofuŋ Anutu nore dâŋ iŋuc.

28 “Noni hâcne merâfâc‐jeŋic ekopacte jaŋe merâfâc wiac omane moc mi bajunʒepieŋ, noni jufu sesuc‐jeŋic ekopacte jaŋe Israe mâreŋko jufu sesuc moc mi jarezemec. 29 Jaŋe taha bâzi â sâqocne tâtâmire taha â kiŋ tatarare taha irec wiac nâ bac enʒepieŋ, ehame Israe ŋondeŋko wiac moc Wofuŋ nore biŋe qahuc murâriekicne i jaŋere biŋe ezejec. 30 Gie ɋârionec nânâ wiac nânâsune biaŋne gâcne erâ taha wiac‐ŋeŋic gâcne sasawa Wofuŋ nore biŋe râeeŋgopieŋ i taha bapa jaŋere biŋe jaha; ehame gie ɋârionec nânâzi poroŋ baniŋmu irec nâfocne i taha bapa jaŋere biŋe râepie fic hae‐ŋeŋicko jambuŋ mâriri fuazejec. 31 Taha bapa jaŋe wipe qowi jaŋe jaŋac hâmombiŋ me qa sipiric ejarekicne i moc mi nâhuŋgaŋkenʒepieŋ.”