19
Anutu meqâreŋ‐ticne â micdâŋ‐ticnere biŋe rara
1 Sambâŋ jaŋe Anuture eri tatamac mufuaeŋgopieŋ,
meqâreŋ‐ticne qânikiŋzi musokaekac.
2 Ʒoaŋ moczi ʒoaŋ âgone dâŋ qâmockecneekac,
ŋafe moczi ŋafe âgone biŋe âzâcneekac.
3 I mumac qamanac eene mâcne, me nazaŋ gazaŋ wâc arictac,
marac fânâŋ hazeczi mi mamanane;
4 eha sifu micfânâŋ‐jeŋiczi mâreŋ sâcke‐fâreekac,
â dâŋjeŋiczi mâreŋ qaŋeŋnao fisiekac.
Ira hâcne Anutuzi ʒoaŋ boze bacnewec.
5 Eme eki socɋâri moczi ficticnaonec fahareekac irec sâc wefuekac,
ehuc momori ŋic iŋucne hata‐ticne âteocte aŋackeekac.
6 Wewefu‐ticne sambâŋ qaŋeŋnao wefuekac,
â huhu‐ticne sambâŋ dowaŋnao huekac,
â fâroroc‐ticnezi wiac moc mi bâtiriekac.
7 Wofuŋte sâcmutâc dâŋ i qarâ biaŋ,
maŋ qâqâtâc âke ɋâreekac;
Wofuŋte mumutaniŋ dâŋ i fârine,
ŋic maŋtac maŋɋârâŋ bacjopaekac;
8 Wofuŋte muqâmoc dâŋ i fâretiŋ,
ʒeri bubiaŋ bâfuaekac;
Wofuŋte sâcmutâc sanaŋ i nanaŋ ʒurec ʒurecne,
ŋicʒâŋe batamaeekac;
9 Wofuŋ araŋ babacne i ɋaɋacne,
dameŋ sâc fohuc juocmu;
Wofuŋte mumutâc dâŋ i fâri fideteŋhec,
erâ tiŋne sasawa.
10 Erâ i gol sirickehuc furi sâko ekac,
gol emataucke‐hâmokicne mâmâc sirickekac;
erâ wâc baŋacte aŋac qâhucke‐fârekac,
â bore wâc iŋuc jaha.
11 Dâŋ i sasawazi kiŋaŋŋicge nore uŋsawaŋ eekac wâc;
moczi reŋkeocmu e furine fekicne roocmu.
12 Erâ mozi bâbâsifuc‐ticne hone taraocmu?
Bahac soŋne mutâmire‐narec.
13 Maŋfefe bahac irec wâc sabecnuzemec,
izi ŋicbomboŋ mi enarezejec.
Eme no ŋicsaric juhuc,
bahac ŋemâcne mi bâfuapemu.
14 Go micbipic‐nanere dâŋ â maŋnanere mamanasu,
i hone manac etec sâckezejec,
o Wofuŋ, jâcnane â bâbâpiaŋ‐nane.