18
Wofuŋ bafic‐ticnere daŋge mumuteŋ dâŋ
(Sam II 22:1–51)
1 O Wofuŋ, tâpiri‐nane, no maŋzi jauŋgukopac.
2 Wofuŋ e qânâ tiki‐nane â huec‐nane â babatara‐nane.
Anutu‐nane e nore jâc, dapeŋ‐ticnao soŋkekopac.
E maro‐nane â bâbâpiaŋte wâtuŋ‐nane â hae sanaŋ‐nane.
3 No Wofuŋ, mumuteŋte hozi, e wira wâwâsic ecneekopac,
eme râsifâc‐nane jaŋeraonec bataracnuekac.
4 Hâmocte repazi hariŋnuwec,
sisipiricte rumizi bârârâŋnuwec;
5 hâmoc haere niŋgiŋ qâfisecnuwec,
hâmocte bitiŋ bâmbeŋkepo.
6 Bipic tara‐nareme Wofuŋ wâsickepo,
Anutu‐nanezi baficnuocte ki owa epo.
Ufuŋ‐ticnao marac fânâŋ‐nane manawec,
ki owa‐nanezi hazec‐ticnao qaqazuwec.
7 Eme mâreŋzi ɋiɋiteckerâ suriŋkewec;
tikire hobeteŋne wâc ɋarac ɋarac qawec;
i ere kimbeŋte iŋuc fuawec.
8 Sâke hawec‐ticnaonec hosâc wahawec,
micticnaonec ʒocbâruŋ wefuwec,
ʒoc kine iiŋnerâ râwiŋnewec.
9 E sambâŋ bârâriehuc tara wahawec,
kike rurumaŋ‐ticnao duŋdapâc fowec;
10 kerubim fainao ŋehuc sawao warewec,
mâŋâŋte faio acmâc jaha wahawec.
11 Dapâczi foŋkehuc ŋaqi ecnewec,
karorac opâneheczi orâŋkehuc ficboze ecnewec.
12 Mai‐ticnao tatamac fowec irecnec
hoe sanaŋ hândâŋne â ʒoc uucne,
karorac‐ticne hemârâŋkerâ wahawec.
13 Wofuŋzi wâc sambâŋko ɋuŋ hewec,
Femicne Sâkozi dâŋfânâŋ ewec,
hoe sanaŋ hândâŋne â ʒoc uucnehec.
14 E tepe‐ticne qâtâcneme râwiŋnerâ rame tâtiembiŋ,
bâbâric‐ticne wicke‐jareme hâwic‐jopame wisembiŋ.
15 Eme hâwec ʒâkâŋ fâhâŋne tâtâc fuawec,
â mâreŋte hobeteŋzi fua taniŋkewec.
O Wofuŋ, hahanec dâŋgere iŋuc ewec,
kimbeŋgere micrombâŋ hâcne.
16 E faic juhuc meticne sicnerâ rocnuwec,
ʒâkâŋ sâkoonec fârecnume wefupo.
17 Râsi wânʒâŋ‐nanere meonec bataracnuwec,
â qaisocnumbiŋ jaŋere tâpirizi siricnuha
sifu mejeŋickonec bâhocnuwec.
18 Dameŋ gâgâpâcne maicnume quruŋ herâ fisi‐narembiŋ,
ehame Wofuŋzi ine sacfozic enarewec.
19 E unucnurâ toma sâkoo râecnuwec,
nore aŋackewecte bataracnuwec.
20 Wofuŋ e tiŋne jupo irec furine narewec,
menane ɋaɋacne honehuc okacne bazu‐narewec.
21 No Wofuŋte hata paŋʒâic bâjâpepo,
â sindaŋ ehuc Anutu‐nane mi râpeckepo.
22 Tiŋne juju‐ticnere dâŋ i dameŋ sâc hone dendeŋneekopac,
â dâŋsanaŋ‐ticne moc mi bâsuepe raekac.
23 No ere maio bahacmâc jupo,
â kiŋhec ezipore bâec bahuc jupo.
24 Irec Wofuŋzi tiŋne juju‐nanere sâcko okacne narewec,
menane ɋaɋacne fome ʒâŋenezi honewec irec sâcko.
25 Ŋic maŋuruchec e maŋuruc hawari fuacneekic,
ŋic siocmâc e siocmâc hawari fuacneekic.
26 Ŋic maŋɋaɋac e maŋɋaɋac hawari fuacneekic,
ŋic bâbâŋoricne e bâbâŋoricne hawari fuacneekic.
27 Ine hâcne, ŋic waha qaqane bafic‐jopaekic,
â maŋfefe ʒâŋe fieŋgopieŋ jaŋe ine bawahac‐jopaekic.
28 Jâmbomac, goki lambe qaze‐nareekic,
go Wofuŋ Anutu‐nanezi dapâc‐nane batamaeekic.
29 Jâmbomac, gohec râsi guru sâcne qâtâtiec‐jopapemu,
no Anutu‐nane gohec qânâsac sâcne qambaraŋkepemu.
30 Anuture hata i qarâ biaŋ,
Wofuŋte dâŋ i fâri fideteŋ,
ere dapeŋko soŋkeeŋgopieŋ jaŋe ʒeŋgoma sabec‐jopaekac.
31 Wiac Wofuŋtao ʒuhuckehuc mo Anutu mo jukac?
Me Anutu‐nâŋectao ʒuhuckehuc mo qânâ sanaŋ mo domakac?
32 Anutu eki hâcne tâpiri joma‐narewec,
erâ wâc hata‐naneo ʒârâ ʒâpâ bârâriewec.
33 Kike râe‐narewec i kâte bulimakao jaŋere kike iŋucne,
erâ tikitoŋko âkendâŋnuwec.
34 E menane ʒika gie qazucnewec,
eme aeŋ tepe neŋgoc sâcne fârehuc juekopac.
35 Goki sâsâoc maro biaŋge tahacnumeŋ,
â mefâregezi âkesiŋnumeŋ,
erâ hone maiŋ enarehaŋ sokapo.
36 Go âte sanaŋkepemurâ mâreŋ sawane bâfua‐naremeŋ,
eme kike‐nanezi biric borocne mi ewec.
37 No râsifâc‐nane jâpec‐jopa raku siric‐jopapo,
erâ omaec‐jopaku jaha risiepo.
38 Henʒaŋ‐jopakupe fahareniŋte eipiembiŋ,
kike‐nanere rurumaŋko rândiŋkerâ fombiŋ.
39 Ʒika qaqare tâpiri joma‐naremeŋ,
ehuc râsifâc‐nane bârokawec‐jopatec docke‐narembiŋ.
40 Go râsifâc‐nane ejarekutec râpecnurâ wisembiŋ,
eme qaisocnumbiŋ jaŋe imac‐jopapo.
41 Jaŋe kio wâwâsic embiŋ, eme ŋeŋezic moc mi fuawec;
i Wofuŋtao embiŋ, eme dâŋ okacne mi risiewec.
42 Henʒaŋ‐jopakupe mâŋâŋzi rufe ficne sueekac iŋucne embiŋ,
hae ʒoŋaonec jawa sânʒâŋ beheeŋgopeneŋ irec sâc behec‐jopapo.
43 Ŋicne ŋicne jaŋehec ʒika qawefuhape baficnumeŋ,
qâpuc guru jaŋere micne râecnumeŋ,
ŋicguru kâuc bacjopapo jaŋe kiŋaŋ qanarembiŋ.
44 Biŋe‐nane manarâ izia micnane reŋkembiŋ,
ŋic furunezi fisirâ dape‐narembiŋ.
45 Ŋic furune jaŋe hâbi‐jeŋic goroŋkewec,
eme ɋarac ɋarac qahuc huec‐jeŋickonec wahambiŋ.
46 Wofuŋ e jukac. Qânâ sanaŋ‐nane e muteŋkezo,
bâbâpiaŋ Anutu‐nane e mucne bacnezo.
47 Anutu eki hâcne mana‐nareha okacne bazu‐jarepo,
e hâcne ŋicguru bâuruŋ‐jopame nore rurumaŋko raʒimbiŋ.
48 E hâcne râsifâc‐nane jaŋeraonec bataracnuwec.
Jâmbomac, goki bafaharecnutec râsifâc‐nane siric‐jopapo,
jâmbomac, goki ʒika qaqa jaŋeraonec bataracnumeŋ.
49 Wofuŋ, go iŋuc emeŋte qâpuc jaŋere guruo muafecgupe,
â ʒâŋege mumuteŋ gae hecnepe.
50 Go ŋicwofuŋge aŋac ʒeri tahackekic,
â wokemaŋ ruacnemeŋ aki anonoc bâfuacnekic,
Dawidi â ɋâricfâcne tatara tâmiric.