18
Babe hae tâtieocmu irec dâŋ
1 Eme no aŋelo moc sambâŋkonec wahame honepo. E tâpiri kâcɋene focnewec â tatamac‐ticnezi mâreŋ batamae‐fârewec. Bar 10:1; Eʒek 43:2 2 E wira owa ehuc ʒiŋuc muwec:
“Babe hae sâko iŋuc jaha tutuŋke sanaŋ tuŋkezo,
Ehuc demoŋ jaŋere hae gie ekac,
demoŋ mamakâcne jaŋe tuhu‐ticnao soŋkeniŋmu,
homa â bioc bioc mamakâcne jaŋere fic hae ekac. Dan 4:30; Bar 14:8; Jes 13:21; 21:9; 34:11; Jer 9:11; 50:39; 51:8
3 Mâreŋ sâc ŋic jaŋe sasec‐ticnere waiŋ opâ nâhuc jumbiŋ,
mâreŋ sâc ŋicwofuŋ jaŋe warerâ sasec gie bahuc jumbiŋ,
hae sâc siricfâc‐ticne fisi mazuc mâriri‐ticnere erâ
moneŋ mafa sâko hurembiŋ, irec hâcne tâtiekac.” Jes 23:17; Nah 3:4; Jer 25:15, 27; 51:7
Hae sâko e Anuture micte ima qazo
4 Eme sambâŋkonec dâŋ wiwira moc ʒiŋuc wahame manapo:
“Ŋicfâc‐nane ŋoŋe hae i beherâ wiseniŋ,
ira juhuc sâqocnere bafickenʒipiŋte
â wiac micne ʒâicne ŋoŋerao fotâcnezacte. Jes 48:20; 52:11; Jer 50:8; 51:6, 9, 45
5 Hae izi sâqocne fainezi faine hefekume sambâŋ heuakac.
Eme ʒi Anutuzi kiŋticnere mukac. Fuf 18:20, 21; Jer 51:9
6 Irec fisicnerâ eŋarewec sâc ecnenʒepieŋ,
ehuc sâc bafehuc okacne bazucnenʒepieŋ,
katucne oto gomba ijaha bafehuc râcnenʒepieŋ. Mi Mâ 137:8; Tes II 1:6; Jer 50:15, 29
7 Sahac bapa ehuc nâ aŋac â gae woŋgâŋ bajuwec
irec sâc ʒâic serereŋ â ki busâqoc bâfuacnenʒepieŋ.
E maŋticnezi muekac, ‘No ʒi ŋokac bomboŋ sâko,
no hozec aricne, bubiaŋ faioa jurahuc jupemu.’ Jer 50:29; Jes 47:7, 8
8 Iŋuc muekacte ʒoaŋ gie bapa ijaha
erao wiac micne ʒârâne fuaocmu,
huc hâmoc, ki mamakuc â roroc,
erâ wâc ʒocte temane eocmu.
Wofuŋ Anutu e tâpiri runezi kiŋticne batarakac hâcne.” Jes 47:9; Jer 50:34; Bar 17:16
Siricfâc‐ticne ki busâqoc eniŋmu
9 Eme mâreŋ sâc ŋicwofuŋ ehec sasec â tiwâ ʒepec gae wowo ehuc jumbiŋ, jaŋe ʒoc hosâc‐ticne feme honerâ ki mamakuc â hobu heheric eniŋmu. Eʒek 26:16; 27:30–35; Jes 23:17; Bar 17:2 10 Ehuc ima‐ticne honerâ bipic tatara ejareme taicko domahuc wâsickerâ muniŋmu:
“Jei, jei, hae sâko!
Babe hae sanaŋ go,
okacne ɋeŋfâfâc jaha fisi‐garekac ine.” Dan 4:30; Eʒek 26:17; Jes 21:9; Jer 51:8; Bar 14:8
11 Â haene haene siricfâc‐ticne jaŋe mozi mafa‐nâŋec furine baocmu muhuc iŋuc jaha ki busâqoc eniŋmu. Eʒek 27:31, 36 12 Mafa ine kecʒiŋuc nareŋ gareŋ embiŋ: Gol â siliwa â kubu furi sâko â qoruc erinehec sasawa, qaŋqaŋ â bâbâroŋ, hameŋne â ɋâfoŋne, erâ mondaŋjâczi wiac bakicne â elefante ʒuŋenezi wiac bakicne, erâ bonezi â aeŋzi â wapazi â qânâzi wiac bakicne, Eʒek 27:12, 13, 22 13 erâ musijâc sahacne â tokic â kâŋâ â opâ âsu â hosâc âsu biaŋ, erâ waiŋ opâ â saŋ fâric â hâmu gai, erâ lama bulimakao â becâsic keretac wiac, â kiŋaŋ qaqa motec. Eʒek 27:13
14 “Ʒi ine mâririge honeriŋ qâriŋ ehuc juekic i arictac efârewec.
Erâ ʒâmbâŋ titikucge qaʒuewec,
â eri qaraweŋge somarewec,
wemocko mocwâc fua‐gareocmu!”
15 Eme siricfâc‐ticne wiac iŋucne ehec nareŋ gareŋ ehuc moneŋ mafa sâkohec embiŋ, jaŋe ima‐ticne honerâ wiwicko domahuc ki mamakuc erâ wâsickehuc ʒiŋuc muniŋmu: Eʒek 27:31, 36
16 “Jei, jei, hae sâko,
go ŋaqi qoruc qâreŋzia kirâ qârikuakicne roju jumec
â eri fuŋne fuŋne furi sâko irec maŋko jujumec! Bar 17:4
17 Ʒi mafa mâririge ɋeŋnea imacke‐fârekicne ine.”
Erâ wâc woke rune â wokeo gie bapa ŋic hâwecko rac warec eeŋgopieŋ, jaŋe iŋuc jaha ʒoc hosâc‐ticne feme honerâ taicko ŋehuc Jes 23:14; Eʒek 27:27–29 18 ki oowa erâ ʒiŋuc mumbiŋ:
“Busâqoc, hae sâko iŋucne moc wena ŋekac?” Eʒek 27:32; Jes 34:10
19 Iŋuc murâ mâsic ruarâ ki busâqoc â mu mamakuc erâ ʒiŋuc mumbiŋ:
“Jei, jei, hae sâko,
gore erâ woke rune moneŋ mafahec embiŋ.
Eme ʒi ututuŋ jaha hae sesuc fuawec. Eʒek 26:19; 27:30–34
20 Sambâŋ â tiriŋic â aposolo â porofete
ŋoŋe ine ʒeri bubiaŋ enʒepieŋ;
hae sâkore kiŋ ŋoŋerao fowec i Anutuzi batarakac hâcne.” Sâc 32:43; Jes 44:23; Jer 51:48
Hae sâko i tuhu erâ niniŋ siarereŋ foocte mukicne
21 Dâŋ iŋuc fuame aŋelo sanaŋne moczi buse sâko ro bafaharerâ hâwecko sârockeme huwec. Hume kecʒiŋuc muwec:
“Babe hae sâko iŋuc jaha tutuŋke sanaŋtuŋkezo,
eme omae‐jâmbâŋkezejec. Eʒek 26:21; Dan 4:30; Jer 51:63, 64
22 Eme musi bapa gita qaqa guru jaŋere marac fânâŋ
i gorao mocwâc mi fuazejec,
â metâ qâreŋ wiac bâbâfua
i gorao arictac ezejec.
Eme gie wiac fânâŋ tâmiric
nac gumororo barâ fozejec. Jes 24:8; Eʒek 26:13
23 Lambe ʒoc tatamacne
gorao moc mi fuazejec,
â ŋic ŋokac jaŋere dâŋ gâgâwi
iŋuc jaha moc mi fuazejec.
Siricfâcge jaŋe mâreŋ sâc ŋicbomboŋ sâko erâ jurambiŋ,
â gore qaŋgeczi mâreŋ sâc ŋic maŋjeŋic bâsifuckewec. Jer 7:34; 16:9; 25:10; Jes 23:8; 47:9
24 Erâ porofete â tiriŋic â mâreŋ sâc ŋic jopakicne
jaŋere socte kiŋ i gorao fokacte iŋuc egarezo.” Jer 51:9; Mat 23:35; Bar 6:10; 17:6; 19:2
18:2: Dan 4:30; Bar 14:8; Jes 13:21; 21:9; 34:11; Jer 9:11; 50:39; 51:8
18:3: Jes 23:17; Nah 3:4; Jer 25:15, 27; 51:7
18:4: Jes 48:20; 52:11; Jer 50:8; 51:6, 9, 45
18:5: Fuf 18:20, 21; Jer 51:9
18:6: Mi Mâ 137:8; Tes II 1:6; Jer 50:15, 29
18:8: Jes 47:9; Jer 50:34; Bar 17:16
18:9: Eʒek 26:16; 27:30–35; Jes 23:17; Bar 17:2
18:10: Dan 4:30; Eʒek 26:17; Jes 21:9; Jer 51:8; Bar 14:8
18:12: Eʒek 27:12, 13, 22
18:17: Jes 23:14; Eʒek 27:27–29
18:19: Eʒek 26:19; 27:30–34
18:20: Sâc 32:43; Jes 44:23; Jer 51:48
18:21: Eʒek 26:21; Dan 4:30; Jer 51:63, 64
18:23: Jer 7:34; 16:9; 25:10; Jes 23:8; 47:9
18:24: Jer 51:9; Mat 23:35; Bar 6:10; 17:6; 19:2