3
Jei, soc hohoŋke hae keci,
irec maŋnao ŋic kosa imac‐jopaeŋgopieŋ,
erâ eeatuc â fiuczi fusucmarâ foekac,
fiuc roro gie i erao moc mi taraekac!
Keci mananiŋ,
râsi jaŋe ŋâŋârâczi becâsic jopapie fânâŋkekac,
â ʒika keretaczi fisime fânâŋ‐ticnezi heumaŋkekac,
becâsic jaŋe gasackeŋgopieŋ,
â keretac jaŋe heherâ fisiŋgopieŋ.
Ŋic jaŋe becâsicko ŋehuc ʒocnehec fisiŋgopieŋ,
sâqe‐jeŋiczi bâricneha damu‐jeŋiczi qaqac ekac;
ŋic qâhâmoc‐jopakicne jaŋe guru sâko,
qâŋɋâŋjeŋic i wowosene tâmiric.
Ŋic jaŋe ira rahuc fâfâc‐jopakac.
Wiac i sasec hae hawari biaŋ ere sasec giere erâ fuakac,
e hâcne sasec gie‐ticnezi ŋicne ŋicne doc bacjopaekac,
â ŋic gurune gurune maŋ bâsifuc ejareekac.
 
Anutu Tâpiri Ɋuŋɋasaŋ Wofuŋzi ʒiŋuc mukac:
“Manakic, no râsi egarekopac,
ehuc qorucge qafiruŋkepe biuctac domahaŋtecne
ŋicne ŋicne jaŋe mimige honenʒepieŋ.
No sohoŋ rua‐garehuc mimi qaqa egarepe
ŋic maio mamakucne ezemec.
Eme honecguniŋmu jaŋe râpecguhuc muniŋmu:
‘Niniwe hae e imackekicne,
mozi ere busâqoc moc manaocmu?’
Bâbâmiriŋ ŋic wenirec bâfuac‐joparâ ejarepe
ra bâmiriŋkeniŋmu?”
 
Niniwe hae, go Tabesi hae irec sâc sirickehuc
biaŋne moc ŋeekic me?
E Nilu opâ heririŋ ŋehame opâzi râreckehuc fowec,
erâ opâzia sacsanaŋ‐ticne erâ fowec.
Etiopia â Aigita mâreŋ jahe tâpiri‐ticnere rowaŋ erâ fohuc jupic,
â Puti â Libia ŋic jaŋe wâc babaficfâc‐ticne erâ jumbiŋ.
 
10 Ehame sifu ŋecjucfâc‐ticne imac‐joparâ
kâpâcwâruo bacjopa rambiŋ;
naru motecfâc‐ticne jaŋe hae ʒoŋao henʒaŋ qanʒaŋ‐jopambiŋ,
â fekicnefâc‐ticne jaŋere erâ qaŋgec qambiŋ,
erâ ŋicfâc‐jeŋic kâcɋene jaŋe aeŋ niŋgiŋko râec‐jopambiŋ.
11 Eme go iŋuc jaha maŋge bibiriwame maŋmutuc fua‐garezejec.
Go râsi jaŋere maio haesoŋko soŋkezo murâ eipiecmu.
12 Ficsanaŋ wiacge i nemuja jâczi fua qeuec eekac irec sâc.
Ehame itiriŋkepie hândâŋne ŋetara wahame
ŋic jaŋe ro nâc eeŋgopieŋ.
13 Manakic, momorifâcge jaŋe ŋokac hawari sasawa.
Haegere motâc i râsifâcge jaŋere maio aaŋ fokac,
ʒoczi motâc babasanaŋge ʒâtâmirewec hâcne.
 
14 Somâ rârâe dameŋko opâ basazicte
qanaŋ fiatec haeo fezejec,
ehame ficsanaŋ wiacge basac qasanaŋkezemec,
â afe fokacko rarâ âte dockera izi fic bapa qânâ bazemec.
15 Eme sifu ira ʒoczi ʒâtâmirecguocmu,
â ʒikazi nâmiziecguocmu,
i hâpic jaŋe wiac nanʒaŋneeŋgopieŋ irec sâc fua‐gareocmu.
Ŋoŋe hâpic â ɋirikiŋ jaŋe sawe mâririackeeŋgopieŋ
irec sâc jaha sawezo murâ sawenʒepieŋ.
 
16 Me âbârâ gieŋicfâc‐ŋeŋic jaŋe sambâŋko bâpiŋ ŋeraŋgopieŋ
jaŋere sâc sirickezo murâ sirickenʒepieŋ;
erâ sifu hâpic jaŋe ine fakec‐jeŋic hedâmârerâ
fahare ratâmireeŋgopieŋ irec sâc ehuc omaeniŋmu.
17 Fekicnefâcge jaŋe ɋirikiŋ iŋucne,
â qâreŋŋicfâcge jaŋe hâpic jaŋere sâc,
jaŋe mâmâteŋ dameŋko qânâsacko ferâ ŋeeŋgopieŋ,
ʒoaŋ wefume ine fahare raeŋgopieŋ,
eme mâreŋ wena raeŋgopieŋ
i ŋic moczi moc mi manaekac.
 
18 O Asiria ŋicwofuŋ,
soŋaŋfâcge jaŋe guŋ biac foŋgopieŋ,
â fekicnefâcge jaŋe qâmâc‐jopakac,
ehame momorifâcge jaŋe tiki mâreŋko siŋsaŋ qarâ juhapie
mozi moc hetumaŋ‐jopazac.
19 Ʒâpâ gukicne i bâbâpiaŋkenere sâc mi ekac
â wicsâkoge i wâc bâbâsomienere sâc aricne.
Biŋege mananiŋmu sâc mu âke sisic egarehuc me qagareniŋmu,
hehesicgezi dameŋ sâc bawahac‐jopahuc juwec hâcne.