HABAKUC
Porofete Habakuc juju‐ticnere binaŋ i papia‐ticnao boc mi fua taniŋkekac. Irec ere mâc ʒiŋuc sawa manaŋgopeneŋ: E Judaia mâreŋko Jerusalem hae bembeŋko Nahumte dameŋkoa juwec.
Habakuc papia‐ticne i bembeŋne jaha, gaŋticne jahec â moc sawa. E dâŋticne jara 625–612 B. C. dameŋ ŋondeŋ ira mecne qâreŋkewec. Nahumzi papia‐ticne fuŋkehuc Wofuŋte mumuteŋ gae qâreŋkewec, Habakuc eki ine makuc gae qâreŋkehuc papia‐ticne fuŋkewec. E Israe ŋic jaŋe ʒârâ ʒâpâ faio jumbiŋ irec maname boc ŋemâckeha iŋuc ewec.
Gaŋ 1 ombâŋne 6 ira dâŋ qâreŋkekicne fokac izi porofete dâŋ â gie‐ticne mananaŋte piticne bafic‐nâpokac. Ira Kaldea ʒâŋe fuakac. Kaldea ʒâŋe ine Babiloŋ ŋic jaŋere mukicne. Wofuŋ e Babiloŋ ŋic jaŋe hâcne ejareme Asiria ŋic râsi sâko ejarehuc qâhuc‐jopambiŋ. Eme papia maŋnao ŋicguru repicne â hehesicne jaŋere dâŋ mukicne i Asiria ŋic jaŋere hâcne.
Dâŋ qâreŋkekicne forakac ine kecʒiŋuc:
Gaŋ 1. Porofete e ŋicguru keci juju â eebapa‐jeŋic hehesicnere mu mamakuc ewec. Ehuc okacne fisi‐jareocmu irec findaŋdâŋ muhuc râsi jaŋe weniŋuc erâ fisiniŋmu irec dâŋ mufuawec. Jaŋe Israe ŋic fific guguriŋ boc ejarembiŋte maname mi sâckeme Wofuŋ fuŋnere mu wioc ecnewec.
Gaŋ 2:1–4. Porofete e Anuturaonec dâŋ okacnere woŋec juhame Wofuŋzi âzâcnewec. Eme Judaŋic jaŋe Wofuŋtao roweckehuc woŋec juniŋte jazawec. Ehuc kecʒiŋuc muwec: Moc e Wofuŋtao rowekeocmuzi mi qurutuaocmu.
Gaŋ 2:5–20. Ira râsi sâkozi ŋicguru gâcne qâhuc‐jopawec ere uŋdâŋ 5 mufuakicne fokac.
Gaŋ 3. Ira Wofuŋ e okac babazu gie baocte fuaocmu irec gae moc fokac. Eme porofete e Wofuŋzi okac babazu gie baocte fuame maname hâhâwicne ewec, ŋifec ine hâbi rowec â Wofuŋ manasiŋkewec.
1
Habakuc e eebapa hehesicnere maname sâqorewec
1 Porofete Habakuc e maŋʒâŋe‐ticnezi wiac hone manac ewec irec dâŋ.
2 O Wofuŋ, no mu wâwâsic egarehuc juhape
wezimucko moc mana‐narecmu?
“Jei, bâʒâicnu‐fâreeŋgopieŋ!”
No iŋuc muhuc wira wâwâsic egarehape
mi baficnuekic i.
3 Go wemocte wiac hehesicne nowatutec honeekopac,
â ŋic bâʒâic‐jopapie hone qâoma ejareekic?
Fiuc â bâbâʒâiczi mai‐naneo foha
mu qaqatarac â rârâsi epie honeekopac wâc.
4 Iŋuc fuame sâcmutâc dâŋzi tâpirimâc eekac,
â tiŋne hatazi mi fua taniŋkeekac.
Ŋic sindaŋne jaŋe ŋic tiŋne bawahac‐jopahuc jueŋgopieŋ,
â mumutiŋ dâŋ muhasickeeŋgopieŋ.
Kaldea ŋic jaŋe Judaŋic bâtiŋ‐jopaniŋmu
5 Ŋicne ŋicne jaŋerao ʒâŋe fipie rame
warecke sâqorehuc bipic tatara enʒepieŋ.
No ŋoŋere dameŋko gie fuŋmoc bapemu,
irec biŋe ŋazapie muzac mi mana ʒakienʒapiŋ.
6 Manaŋgopieŋ, no Kaldea ŋic râŋgeŋne
â qac momorihec jaŋe qafeŋ‐jopape
faharerâ ŋic furune jaŋere fic hae wiac ro rauc eniŋte
mâreŋne mâreŋne fotâcnerâ raeŋgopieŋ.
7 Jaŋe ŋic hâhâwicne â aaŋgiŋne juhuc
tiŋne jujure sâcmutâc i maŋjeŋicte kosa âkendâŋneeŋgopieŋ.
8 Becâsicfâc‐jeŋic jaŋere gagasaczi
qowi mimicne ʒâŋene lepad ere gagasac sirickehuc
kâte qâto jaŋere gagasac sirickeekac jaha.
Ŋicfâc‐jeŋic jaŋe becâsicko bune bune raeŋgopieŋ,
ine hâcne, jaŋe ʒorickonec ware fisieŋgopieŋ,
ehuc sisipiric gie baniŋte
tucwipezi qowi qaocte sâoekac
irec sâc eeŋgopieŋ.
9 Jaŋe bâbâʒâic gie baniŋte biŋe bâroŋzi mâreŋ sâcke‐fâreme fisieŋgopieŋ,
ehuc ŋic kâpâcwâru bacjopaeŋgopieŋ
i moŋgeŋ fokac irec sâc.
10 Jaŋe ŋicwofuŋ mana wahac‐jopaeŋgopieŋ,
â guriŋ bapa ŋic mu âke sisic ejareeŋgopieŋ.
Ficsanaŋte manapie gâgâwinehec eha
mâreŋ facne barâ ferâ domahuc ro rauc eeŋgopieŋ.
11 Iŋuc erâ mâŋâŋ iŋucne fotâcnerâ raeŋgopieŋ;
ŋic iŋucne jaŋe jaŋacne tâpirire manapie
Anutu‐jeŋic eekac.
Habakuczi Anuturao dâŋgie bawec
12 O Wofuŋ, Tiri Anutu‐nane,
go fuŋnaonecteaŋ juwarehuc jumeŋte mi hâmonaŋmu.
O Wofuŋ, go mumutara gie baniŋte mujaremeŋ.
O Haroŋaŋ, go bâbâtiŋ gie baniŋte hefârec‐jopameŋ.
13 Ʒâŋege ɋaɋacne fokacte
wiac sâqocne honezo mi egareekac,
ehame wemocte ŋic sindaŋnezi ŋic tiŋne ɋâckeocte eme
hone qâoma ecneekic?
14 Go ŋic ejaretec hâwec qowi iŋucne eeŋgopieŋ,
â wiac ru tâmiric foforâ juekac
irec sâc bâfuaeŋgopieŋ.
15 Râsi jaŋe hehawic‐jopa‐fâreeŋgopieŋ,
â wasaŋ‐jeŋic behepie jowa‐fâreeŋgopieŋ,
erâ ufic‐jeŋic fârehapie ira jowaeŋgopieŋ,
irec jaŋe bubiaŋ manahuc ʒeri eeŋgopieŋ.
16 Irec erâ wasaŋ‐jeŋic taha bâzi ecnehuc
ufic‐jeŋic hosâc âsu rikecneeŋgopieŋ,
eme wiac izi hâcne moneŋ mafa â nânâ mâriri sâko bâfua‐jareekac.
17 Jaŋe dameŋ sâc ŋicne ŋicne wasaŋzi ro hesiec ejarehuc
busâqoc tâmiric qâhâmoc‐jopapie sâckeocmu me?