2
Wofuŋzi Habakuc dâŋ okacne bâtikiecnewec
1 No ruc bapemu,
ehuc ruc bapa fic ira domahuc ʒâŋe fipemu,
ine Wofuŋtao dâŋgie bapo
irec okacne weniŋuc nazame manapemurâ iŋuc epemu.
2 Eme Wofuŋ e dâŋ ʒiŋuc bâtikie‐narewec:
“Maŋzi wiac hone manac ekomec i tafeo aijakic qâreŋketec
quŋquŋke tâmiric wosenʒepieŋ.
3 Wiac hone manac ekomec i wiac fârine,
erâ dameŋne maickeme fuaocmu,
erâ fuaocte dameŋne qândâŋkekac hâcne.
Dameŋ‐ticne qâsuame sifu woŋec juzemec,
juku dameŋ‐ticne maickeme fua‐jâmbâŋkeocmu.
4 Manakic, ŋic maŋsiocheczi qurutuaocmu,
â ŋic tiŋne e mamanasiŋ‐ticnere erâ juocmu.
5 Jei, ŋic ʒâʒâicne â waiŋ opâ âmbâŋ nâ areŋ eene!
E micticne ʒâŋeruŋ aaŋ foekac iŋucne,
erâ wâc hâmoc iŋucne nânâ gapemâc nâekac.
E ŋicne ŋicne hetumaŋ‐jopaekac,
â ŋic gurune gurune jaŋe e jahacne biŋe erâ juniŋte
ro qâzuc ejareekac.”
6 Eme ŋic jaŋe ʒoraŋ gae hecnehuc mu âke sisic ecnerâ dâŋ ʒiŋuc muniŋmu:
“Jei, ŋic gâcne jaŋere wiac e jahacne biŋe eocte
ro qâzuc eme tofa‐ticne fuaekac,
i wezimucko moc beheocmu?”
7 Tofa‐jeŋic gorao fokac ŋic i jaŋe faharerâ
onʒoŋ jaha râsi fisi‐garehuc wiac gowac ropie
bipic tatara egareocmu.
8 Go gahac ŋicne ŋicne jaŋere wiac kâŋgâc jowac rorâ
ŋicsoc hoŋkehuc hae mâreŋ imackerâ
ŋecjucfâc‐ticne bâʒâic‐jopameŋte
ŋic tiwâne jaŋe iŋuc jaha wiacge gowac roniŋmu.
9 Jei, burec ehuc mafa wiac hurerâ
ficticnao râe guruc eocmu,
ehuc sisipiric wisecnerâ juhâmoocte
huec sanaŋ‐ticne baocmu!
10 Go dâŋ manasu biric ehuc
ŋic gurune gurune sipiric‐jopameŋ,
irec fârine gahacne kikefuŋko mimi qaqa fuaocmu,
ehame jujugezi sipirickeocmu hâcne.
11 Qânâ jaŋe ficte sâpe erâ domahuc owackeniŋmu,
ehame sore safatariŋ jaŋe dâŋ okacne bâtikieniŋmu hâcne.
12 Jei, soc hoŋkehuc hae sâko baekac,
erâ sindaŋ ehuc fic biri ʒora bâfua raekac!
13 Manaŋgopieŋ, Anutu Tâpiri Ɋuŋɋasaŋ Wofuŋ
ere micte ʒiŋuc fuaekac:
Ŋic gurune gurune jaŋe gie baeŋgopieŋ
i ʒocte biŋe sasawa,
ehame ŋicne ŋicne jaŋe ʒâic gie i mâc maŋgâŋ baeŋgopieŋ.
14 Hâwec ʒâkâŋ sâko fokac irec sâc jaha
Wofuŋ huriri qâreŋ‐ticnezi hae mâreŋ fusucmarâ fohame
ŋic jaŋe hone mana tarac efâreniŋmu.
15 Jei, ŋic moc waiŋ â opâ momori bâsifuckerâ
âgofâc‐ticne gumec‐jopame maŋjeŋic sifuckeha
biuctac jupie honec‐joparâ bubiaŋ manaocmu!
16 Manakic, mimi busâqoczi bâumbeŋgume
ʒâŋe biŋege omaezejec.
Go gahacne wâc maŋsifuc opâ nârâ biric boroc ezemec.
Wofuŋte mefâreo râqâc fokac izi gorao fisime
ʒâŋe biŋegezi omaeme
mimi busâqoc fua‐gareocmu hâcne.
17 Go ŋic jaŋere soc hoŋkehuc hae mâreŋ sâko bâʒâickerâ
ŋecjucfâc‐ticne jopa sipiric ejaremeŋte
Lebanoŋ tiki imackekicne izi ŋemacgurâ bârârâŋguocmu.
 kâte qowi sipiric‐jopakicne
jaŋe wâc hâhâwic sâko bâfua‐gareniŋmu.
18 Metâ bapa eki ɋâŋ qâqâtâc fasaeekac,
me aeŋzi hawari wiac burecne baekac,
izi wemocko moc bafic‐nâpoocmu?
Metâ bapa e ɋâŋ qâqâtâc dâŋemâcne fasaerâ
e jahacne meqâreŋko roweckeekac hâcne.
19 Jei, ŋic moc eki wiac jâczi bakicne ʒiŋuc âzâcneocmu:
Go mana ɋâɋârec, me qânâ âzâcneocmu, go faharec!
Wiac iŋucnezi findaŋdâŋ sâcne muocmu me?
Manakic, wiac i siliwa â golzi bohotahuc foŋkekicne,
erâ nokafe moc mi heekac.
20 Wofuŋ eki ine tiri ufuŋ‐ticnao juekac,
irec mâreŋ sâko mâreŋ e ere maio tiŋbenoŋ fuarâ fozejec.