3
Habakuczi numuwec
1 Porofete Habakuc ere nunumu dâŋ moc ʒi.
2 O Wofuŋ, go gie bameŋ irec dâŋ binaŋ manapo,
i manasurâ ɋarac ɋarac qakopac.
Go jara sâc giege heɋârerâ bahuc
mocwâc fua tâcnezemec.
Erâ aaric manahuc sifu buurucgere manasuzemec.
3 Wofuŋ Tiri rune e Temaŋ hae mâreŋkonec,
â Paraŋ tikionec ware fisiwec,
ehame huriri qâreŋ‐ticnezi sambâŋ sâcke‐fârewec,
â mumuteŋ‐ticnezi mâreŋ fusucma‐fârerâ fowec.
4 Tatamac‐ticne i ʒoaŋ tatamac iŋucne,
â ʒâziriŋ‐ticnezi meticnao tamaewec,
ehame tâpiri‐ticne irec maŋnao soŋkerâ fowec.
5 Huc hâmoczi bâniecnewec,
â sisipiriczi râpefuŋnao bâjâpewec.
6 E niniŋkerâ domahame mâreŋzi ɋiɋiteckewec,
e ŋicne ŋicne honec‐jopahuc itiriŋ‐jopawec.
Iŋuc eme tiki ŋeŋe sanaŋ jaŋe fâuckerâ ŋetâtiembiŋ,
â mâreŋ facne jaŋe uruŋkerâ humbiŋ.
E jahacne ine hata sanaŋ‐ticnao jaha rahuc juwec.
7 No Kusaŋŋic jaŋe ʒârâ ʒâpâ faio ferâ juhapie honec‐jopapo,
â Midiaŋ ŋic jaŋe ɋarac ɋarac qambiŋ.
8 O Wofuŋ, go becâsic faio me keretac faio sanaŋkerâ
rahuc opâ kâcɋene sasawa aaric mana‐jaremeŋ me?
Me hâwec manacnetec sâqorewec me?
9 Go tepe neŋgocne gurutuc herâ
motecne tikocko he fâremeŋ.
Ehuc mutec mâreŋ fâuckeme
opâ kâcɋene fua‐fârewec.
10 Tiki jaŋe honecgurâ qiriŋ qambiŋ,
karorac jaŋe opâ hoŋkepie hoe micsâko hewec,
â hâwec sirizi fânâŋkewec.
11 Go mege bâfeŋnetec mosa â ʒoaŋ jahe niniŋkerâ ŋepic,
jahe tepe motecgere ʒâziriŋ
â damugere tatamac fuame weaŋkepic hâcne.
12 Go aaric manahuc mâreŋ sâc âterâ rameŋ,
ehuc kimbeŋko ŋicne ŋicne âtenʒaŋ‐jopameŋ.
13 Go ŋicfâcge bafic‐jopazore,
â wokemaŋ ruacnemeŋ e dopeckezore waha rameŋ.
Go ŋic sindaŋnere qizec qanʒaŋnemeŋ,
ehuc ficticnere woke qâtâc hetâtierâ
wâtuŋ‐ticne qârisie‐fâremeŋ.
14 Momorifâc‐ticne jaŋe guru bâgic enâreniŋte
ʒâʒâkiriŋ mâŋâŋ iŋucne warerâ
soŋsoŋko ŋic hapetac ɋâcjopaniŋte ehapie
tepe motecgezi qizec‐jeŋicko murumeŋ.
15 Becâsicfâcge jaŋe hâwec fotâcnerâ rapie
hâwec siri sâko qahuc fânâŋkewec.
16 Eme no irec fânâŋ manarâ mesahac‐nane jâjâwâckeha
bipic tatara enarekac,
erâ me kike‐nane betaŋke‐fâreme
hata razo ehape kike‐nanezi ɋarac ɋarac qakac.
No wiac nâwoc roeŋgopieŋ
ŋicguru i jaŋerao ʒârâ hâriŋ fuaocte
niniŋkerâ woŋec jupemu.
17 Jâmbojâczi mi ârickeocmu,
â waiŋ qaŋeŋnao fârine mi fuaocmu,
â oliwa jâczi fâri tâmiric jaha domaocmu,
â giegaŋko nânâ basaniŋmu.
Lama jaŋe sipiricke‐fâreniŋmu,
â bulimakao jaŋe ficko omaeniŋmu.
18 Wiac iŋuc fua‐fâreme no sifu Wofuŋte erâ ʒeri epemu,
bâbâpiaŋ‐nane Anutu ere erâ kiwaepemu hâcne.
19 Wofuŋ Anutu eki hâcne tâpiri‐nane,
e kike‐nane kâte bulimakao jaŋere kike iŋucne bâfua‐narehuc jowacnume
tiki botâŋko âte sanaŋkerâ raekopac.